يَآلشَّارذْ

يَآلشَّارذْ

*********
سُبحَان لْحَيّْ اللِّي مايْمُوت
سُبحَان لَعْظيم جَلّْ جْلالُو
مْخاوي لَعْدا وُمْعادي لْخُوت
مْسطَّرلَ لْخَلقْ فَ اللُّوح فْعَالو
لْبيبْ ذاك اللِّي دَار لْما بَعد لْمُوت
وهْبيل منْ طاعْ يبْلِيسْ فَ عْمَالُو
يَآلشَّارذْ لَعْمَرمَحدُود وْليَّام تْفُوت
لايْجَرفَك تيَّار الشَّرّْ لَ دْخالُو
وَتْعودْ كِ هْلال رَمْضَان مَنْعُوث
خْليل السُّوءْ تَرْكُو شُوف بْدَالُو
وْمنُّو تْبرَّا ، مَاهُوشْ مَلَك لْمُوت
ناظم لْحرْف واضَحْ فَ قْوالُو
لمْريني ادْريسْ وَاحدْ مَ لّْخُوت
قَصْراوي عْتِيقْ ، ظاهَرْمنْ حَالُو
اسْمو ظَاهرْ ماهُو عنُّو مبْحُوث
لَ خْيارليكْ تنْصَارفْ أَوْ تصْغَالو
رَاجي مُولْ لْقُدرَة  يْمدُّو بَ لْغُوثْ
وشْفاعة تنْجِيهْ يُوم لْحشْر وُهْوالُو
سُبحَانك ياقيُّوم حيّْ دايمْ ماتْمُوت
سُبْحانك يَاعْظِيمْ جَلّْ جْلاَلُو
سُبحَان لْحَيّْ اللِّي مايْمُوت
سُبحَان لَعْظيم جَلّْ جْلالُو

المريني ادريس
القصر الكبير بتاريخ : 05 / 05 / 2013