فَضَّاحْ لَسْرَارْ

فَضَّاحْ لَسْرَارْ

گَالِّي كُونْ هَانِي كْلاَمَكْ فْ لْحَفْظْ وُالصٌّونْ
سَرَّك فْبِيرْ مَدْفُونْ
لَعْجَبْ ثِقْتْ بِيهْ
ضْرَبْتْ ضْوِيرَة
فَآضَتْ لَخْمِيرَة
لْقِيتُو فَاكْسَاهَا لِلْجَزِيرَة
گُلْتْ مْعَ رَاسِي وَآيْنِّي حْرِيرَة
آَشْ دَّانيِ نْبُوحْ لِلْمَجْنُونْ
نْعِيدْ لِيهْ سْرَايْرِي وُلْمَكْنُونْ
تَّعْمَاتْلِي لَبْصِيرَة فَرَّشْتْ حْصِيرَة
وُبْقِيتْ حَاشَاكُومْ مَغْبُونْ
هَزِّيتْ تَلِفُونْ
سَرْسَرْت عْلِيه وْفَرْفَرْت ْ
جَاوْبْنِي  بِالتَّعْفِيرَة
گَالِّي شْكُونْ تْكُونْ ؟؟
رَدِّيتْ عْلِيهْ بَالتّْعَنْگِِيرََة
آَنَا الصَّايَعْ مُولْ سَبْع صْنَايَعْ
آَنَا مُولْ لَهْضِيرَة
آَنَا اللِّي زَاغْ  فُمِّي عْصِيتْ اُمِّي وُشْكِيتْلَكْ بْهَمِّي
حْسَبْتَكْ  خَالِي خُومِّي تْرَاعِي  لْدَمِّي  خْرَجْتِي لَيَّا عْرِيفَة  بُوعْرِيَّة
بَعْتِي وُشْرِيتِي فِيَّا بِالتَّدْوِيرَة
سْلاَم اللهْ عْليِكْ  اللهْ يَاخُذْ فِيكْ لْحَقّْ  وُيْشُوَّهْ لِيكْ التَّصْوِيرَة
المريني ادريس
القصر الكبير بتاريخ : 23 / 06 / 2012

سُوقْ الْحَرْفْ وْلَكْلاَمْ

سُوقْ الْحَرْفْ وْلَكْلاَمْ

تْخَلْطَاتْ لَعْرَارَمْ

كُلّْهَا يَضْرَبْ عْلاَ عَرُّومُو

قْصَاحْ رَاسْ بْنَادَمْ

رْجَعْنَا لْبَعْضْنَا نْلُومُو

ضَاعْ الصِّدْقْ وُلْحَقّْ اللاَزَمْ

وْكُلْ وَاحِدْ مْغَرَّقْ فْ هْمُومُو

كَثْرَاتْ لَجْيَافْ وُخْنَازْ اللّْحَمْ

وُبْدَاوْ الطُّوَّافَاتْ عْلِيهْ يْحُومُو

اللِّي تْقُولْ عْفِيفْ  تَلْگَاهْ لَمْتَاعْ النَّاسْ خْطِيفْ ، مَايْصُدُّو عْلِيهْ صْيَامْ

فَعَالُو فْعَالْ  شَمْعُونْ ، وُشْلُومُو

النْبِيشْ وْلَهْبيشْ عْلاَ طُولْ لِيَّامْ

عَنْدْ لَحْضُورْ ، النَّاسْ لِيهْ يْسَجْدُو وُيْقُومُو

عَنْدْ صَدُّو، يْهُرْشُو فْ قْفَاهْ بْلاَ شْوَارْ ، بْلاَ تَخْمَامْ

يَرَجّْعُوهْ گَدْوَارْ ، فْسُوقْ لْبَاليِ ، طَاحْ سُومُو

بالله عليكوم ، وآش مَازَالْ لْخِيرْ لْگُدَّامْ

أَوْ نْدَخْلُوُ جْوَانَا ، وْعَالْ لَكْلاَمْ  ، مْعَ هَآذْ لْقُومْ نْصُومُو؟

المريني ادريس

القصر الكبير بتاريخ : 22 / 06 / 2012

حْكَايَةْ شَعْبْ مَقْمُوع

حْكَايَةْ شَعْبْ مَقْمُوع

كَانْ يَاسِيدِي حَتَّى كَانْ فْ أَرْضْ اللهْ لْوَاحِدْ الدَّيَّانْ

 يَتْعَايِشْ  لْمَسْلَمْ وُلْكَافَرْ يْهُودْ وْيَسُوعْ

وُمْعَ طُولْ لِيَّامْ تْكُوْنَتْ حْكَايَة فْرْبَعْ مَنْ الرّْبُوعْ

حْكَايَةْ شَعْبْ مَقْمُوع ْ

فِيهْ لْمَقْهُورْ فِيهْ لْمَضْبُوعْ

فِيهْ الدَّانِي فِيهْ لْمَرْفُوعْ

فِيهْ لَبْكَمْ وْلْمَسْمُوعْ

فِيهْ مُولْ لْعَزْوَة  وُاللِّي مِنْ الشَّجْرَة مَقْطُوعْ

فِيهْ لْمُبَاحْ وَلْمَمْنُوعْ

فِيهْ الأَصْليِ وُلْمَرْگُوعْ

فِيهْ كُولْشِي وْقَلَّةْ الشِّي

فِيهْ السٌّجُودْ فِيهْ الرٌّكُوعْ

فِيهْ أَنَا وُنْتَ نَبْكِيوْ بِالدّْمُوعْ

فِيهْ الْعَامْ زِينْ فِيهْ قْلاَلْ الدِّينْ

فِيهْ كَيْتْسَاوَا الْبَاطَلْ ولْعَاطَلْ وُلْحَقْ لْمَطْبُوعْ

فِيهْ لَحْمَارْ وَالثٌّورْ وُلْفَيْلَسُوفْ لْمَغْمُورْ

فَيهْ الشَّكَّامْ وُالدَّلاَّلْ وُلْجَاسُوسْ لْمَدْفُوعْ

فٍِيهْ مُولْ لْفْهَامَة وْلَفْقِيهْ لْعَلاَّمَة  وْلْحْجَامَة بْلاَ مَا

فيهْ الْمَصَّانْ وٌالسَّفَّانْ  وُلْقَانُونْ بِاللَّفَّانْ وْبَزَّزْ ٱطٌّوعْ

فِيهْ التَّدْوِيرَة لْكْبِيرَة وُالصْغِيرَة فِيهْ الصْبِيطَارْ مْوُسَّخْ مَنْگُوعْ

فِيهْ سِيدِي مُولْ لَبْلِيغَة وْجَلاَّبْ السْفِيفَة

فِيهْ لاَلَّة الشْرِيفَة وْ دَارْ لَعْرِيفَة فِيهْ لِيعْتِقَالْ لَمْگَجْدَرْ

وُلْحَبْسْ لْمَشْرُوع ْ

طَاحَتْ لْحُكُومَة طَلْعَتْ لْحُكُومَة تْغَيَّرْ الدٌّسْتوُرْ

دَارُو شِيفُورْ صَفَّقْ لْجَمْهُورْ

گَلْنَا مَزْيَانْ لْحَقْ يْبَانْ نْزِيدُو لقدام مَا نْبْقَاوْشْ اللٌّورْ

خْطَبْ الشِّيفُورْ  وُصَّلْ كْلاَمُو  لْمَيْمُونْ وْقَدُّورْ  لَ دَّا حْمَادْ وْعَمٌّورْ

سَمْعُو الصَّحْرَاوِي لْوُجْدِي وُالسْلاَوِي سَمْعُوهْ لَمْوَاتْ فْلَقْبُورْ

گَالْ الشِّيفُورْ فَكْلاًمُو  بَعْدْ تَعْمَامُو آَنَا جِيتْ نَخْدَم ْ وُاللِّي مَاعْجْبُو حَالْ يًنْدَمْ

غَا نْفْضَحُو لْمَقَالِعْ وْلكرايم وْمُولْ الرِّيعْ نْطَلَّعْ لِيهْ الدَّمْ

غَانْصَلْحُو  التّْبْرَاحْ وُالإِعْلاَمْ ، التَّكْنََاشْ وُالتَّزْمَامْ وُنْطَلْقُو لْخِيطْ لِلْقْلاَمْ

لَكِن بْشَرْطْ مْخَيَّطْ بْ يَبْرَا وْخَيْطْ التَّوْظِيفْ بِالدْعَا وُالتَّعْييِنْ حَسَبْ لْقُرْعَة

التَّطْبِيبْ بِالرٌّقْيَا  أِوْ الْكَيْ بِلْعَافْيَا وُبْلاَ شْوَارْ غَادِي نَبْصَم ْ

صَنْدُوقْ لْمَقَّاصَة نْمَقْصُوه ْوُاللِّي طْوِينَاهْ نْجَمْعُوهْ وُاللِّي جْمَعْنَاهْ نْخَبْعُوهْ

حَتَّا يَتَّقْسَمْ

وُالزّْيَادَة غِي جُوجْ دْرِيهْمَاتْ مَا دَّاتْ مَاجَابَتْ نْبَرَّعْكُومْ ف َلْبَنَانْ وُالتٌّفَّاحْ

كُولُو وُتْفَطّْحُو  عُودُو  بِيهْ لَمْرِيضْ  يَتْبَسَّمْ

غَادِي نْتْهَلاَّ فْ لْهَجَّالَة وُلْخَادَمْ الشَّغَّالَة 

وَاشْ فْهَمْتُونِي وُلاَّ لاَ ؟؟ !!!!!.

المريني ادريس

القصر الكبير بتاريخ : 20 / 06 / 2012

المعطل والحكومة.

المعطل والحكومة.

بْلاَديِ يَازِينْتْ لْبُلْدَانْ ، يَانُوَّارَة ، يَا يَاقُوتَة لَمَّاعَة

فَرْسُوكْ لَعْدَا ، هَرْشُوكْ قَوْمْ لْحُگْرَة ، وُالصّْيَاعَة

قْرِيَنا وْشْقِينَا ، حَتَّا ضَرْبَتْنَا لَقْرِينَة ، بِشْوَاهَدْنَا فْيَدِّينَا ،

وَلاَ حَدْ شَافَّينَا ،لاَ إِدَارَة ، لاَ جَمَاعَة

مَلْفُوقْ لْفُوقْ نَصْحُونَا بِالصْبَرْ وُلْقْنَاعَة

وْهُومَا انْفَرْدُو بِالرَّضَّاعَة

اضَّرِّينَا ، قَاسْتْنَا لْمَجَاعَة

بْغَاوْ يْسُوسُونََا ، وْقَفْنَا بِالرْباعَة

مَنْ تَحْتْ لْتَحْت قَالُو عْلِيكُومْ بِالسَّمْعْ وُالطَّاعَة

وَللِّي قْصَاحْلُو الرَّاسْ ، هَا لْگَاعَة

يَاكُلْ جَغْدِيدْ بْلَعْصَا مْخَضَّرْ

يَاكُلْ الزّْمَهْرِيرْ مْبَخَّرْ ، تَايْفْقَدْ لَمْنَاعَة

قََالُو التَّوْظِيفْ بِالدْعَا ، وُالرَّزْقْ بِاللَّطِيفْ

عْلِيكُومْ بِصْبَرْ أَيٌّوبْ ، لاَتْكُونُوشْ طَمَّاعَة

مُوسَمْ بَرْ لَمَانْ فَزْنَا بِيهْ ، الرْيَاسَة خْذِينَاهَا ، لْمُوسَمْ الجَّايْ ،

نََلْقَاوْ لِيكُومْ شَمَّاعَة ، رَاهْ مَازَالْ فَقْرَابْنَا، لْبِضَاعَة


المريني ادريس 

القصر الكبير بتاريخ : 18 / 06 / 2012

يَازِينَةْ لَرْيَامْ

يَازِينَةْ لَرْيَامْ
زِينَكْ حْلُو فَعْلَكْ مَايْتْلاَمْ
تْغَزْلُو فِيكْ الذٌّوَّاقَة
وْگالُو عْلِيكْ الْعَشَّاقَة شَلاَّ كْلاَمْ
وَآنَا وَاحِدْ مَنْهُومْ وَخَّا كْلاَمِي
مَرْمُوزْ مَا يَنْفْهَمْ
كْلاَمْ مْشَفَّرْ أَوْ گُولِي طْلاَسَمْ
مِفْتَاحُو انْتِ وَنْتِ وَحْدَكْ تَقْرَايْهْ ايْلاَ تَعْزَمْ
مُشْتَاقْ آنَايَا نْشُوفَكْ ، نْضَمَّكْ لِيَّا وَنْحُوشَكْ ، نَتْبَادْلُوصْرُوفْ لَغْرَامْ
نَحْكِي لِيكْ حْكَايَة ، وُنْت گْبَالْتي مْرَايَة ، دٌّرْجِي دْرِيجْ لَحْمَامْ
نَهْدَلْ آنَا وِيَّاكْ ، مَشْتَاقْ نَسْمَعْ لْغَاكْ ، نَسْكَرْ بِيهْ بْلاَ مْدَامْ
المريني ادريس

القصر الكبير بتاريخ :15 / 06 / 2012

ربيع القلب

ربيع القلب

يَارْبِيعْ قَلْبِي عْلاَشْ بْهَجْرَكْ تَجْفَايْنَي
مِنْ حَرّْ فْرَاقَكْ ، جَسْمِي صَارْ فَانِي
كِيفْ تْصُدْ عْلِيَّا ، وُتْخَلِّي قَََلْبِي فَشْطَانِي
يَارْبِيعْ الْقَلْبْ بِهْواكْ أَنَا نَّادِي
فْرَاقَكْ زْبَرْ فَّادِي ، مَزَّقْ حْشَايَا وُكْبَادِي
يَارْبِيعْ الْقَلْبْ نَتْرَجَّاكْ تَرْجَعْ لِيَّا
فَضّْلَكْ خَالَقْ لَعْبادْ ، مَنْ الطِّينْ نْشَاكْ وُنْشَانيِ
جَعْلَكْ  گمْرَة ضَوَّايَة ، تْضًوِّي أَرْضِيِ وُسْمَايَا ، تْنَوْرِيهِم وُتْنَوْرِينِي
حَرّْ لَفْرَاقْ سْطَا عْلِيَّا ، لَمْنامْ وَدَّعْ جْفَانِي
حَرٌّو مَاطَاقْتُو نَفْسِي، فْ الْحياة وَحْدِي كَنْقََاسِيِ
قَلْبِي حِيطُو تْصَدَّعْ ، لِلْقْضَا مَا قَدّْ يَدْفَعْ
نْرَاعِيكْ وُقْتَاشْ تَرْجَعْ ، وَيْعُودْ خَاطْرِي هَانِي
جفيتني والحب  شايق ، نبات طول الليل فايق
حَايِرْ بِينْ لَخْلاَيَقْ ، وُالدَّمْعْ عْلاَ الْخَدّْ ، لُونُو حْمَرْ قَانِي
حُبَّكْ زَادْنِي لَكْرُوبْ ، لَسَرُّو مَا عْرَفْتْ نْخََبِّي
انْبُوحْ بِاللِّي فْقَلْبِي ، زِينَكْ رَاهْ سْبَانيِ
مَازَالْ فُوْصَالَكْ طَامَعْ ، نَتّْرَجَّاكْ وُلْقَلْبْ فْدَمٌّوخَاشَعْ
كِيفْ تَمْشِي مَا تْوَادَعْ ، فْنَارْ الْحِيرَة تْخَلِّينِي
وْصَالَكْ فِيهْ دْوَايَا ، وْقُرْبَكْ هُوَّ شْفَايَا للَِّهْ لاَ تْعَذْبِينِي
نَفْسيِ لِيكْ مْشُوْقَة ، نَسْتَنَّا فِي يُومْ اللْقَا، رُوحِي بِيكْ مْعَلْقَة ،
خَايِفْ لاَ تَنْسَايْنِي
لاَ لقِيتْ حَدّْ يْوَاسِينِي ، وَلاَ حْكِيمْ يْدَاوِينِي ، رَجْعِي لِيَّا وْسَامْحِينِي

المريني ادريس
القصر الكبير يتاريخ : 15 / 06 / 2012

غْزيلْ الْحَرْفْ 1

غْزيلْ الْحَرْفْ

 
بْلادي بْْلادْ التابَعْْ والمتْبُوعْْ

المفْعولْ بيهْ عَالْ الدْوامْ مجْرورْ

والفاعلْ مَعْزوز ْ وْمَََرْفًوعْ

بْلادي بْلادْ لِنْكِسَََارْ، بْْلادْ الحُكْرَة والْخُضُوعْ

بْلادْ ادْهنْْ السيرْ يْسيرْ وْجُولْ فْ الرُّبُوعْ

هْتْكْ ماتْريدْ فْ المًحْظُورْ وُلْمََمْْنُوعْ

بْلادي وَرْدَة ذَبْلانََة ، سَاعَة عَطْلانَة، بْطُونْ جَيْعانَة، وُبْنادََمْ مَفجُوعْ

بْلادي بْلادْ آسِّي وْسِّي ، كُلْهَا يْعَيَّطْ رَاسِيَ ، شِي دَافَعْ ، شِي مَدْفُوعْ

بْلادْ النَّافَعْ ، بْلادْ لَْمَعدُومْ وَلْمَقْطُوعْ

شيِ مْشَمْكَرْ ، شي فْلَكْلامْ يْخَسَّرْ ، حَرْفُو فَ السَّمْ مَنْقُوعْ

وَقْتَاشْ يْزُولْ الضِّيمْ ، وْتَنْقْشَعْ لَغيُومْ وْيَرْتاحْ الْقَلْبْ بينْ الضّْلُوعْ

وًقْتَاشْ تزْهَرْ بْلادَي ، وَيْصِيحْ المُُنادِي ، يَاقَصْرَاوي يَامَغْرِبيَ رَاسَكْ

الْيُومْ رَاهْ بالعَزّْ مَرْفُوعْ.

المريني ادريس

القصر الكبير بتاريخ : 04 / 05 /

2012

لِيكْ نْوَصِّي

لِيكْ نْوَصِّي

بَعْدْ شَابْ الرَّاسْ وَانْحْدَبْ الظْهَرْ، عَاوَدْتْ قْرَايْتيِ لَجْمِيعْ لَسْوَارْ
لْقِيتْ رَاحْتَي فْ التَّسْطَارْ وُالْقْرَايَة
وُبْدِيتْ نْرَاجَعْ لَحْسَابْ لِيلْ وُنْهَارْ
نْفَذْ صَبْرِي عْلَى كْلاَمْ النَّاسْ فِ قْفَايَا
وُضْحَاتْ جْفَانِي تْغُضْ عَنْهُومْ لَبْصَارْ
ضَاقْ صَدْرِي مِنْ حَرْ الْغْدَرْ وْلْوْشَايَة
وَانَا اللِّي طْوِيتْ عْمَرِْ لِيهُومْ شَكَّارْ
مَا كُنْتْ نْشَكْ فَصْدَقْهُومْ اَوْ نَتْحَرَّزْ ِلنْوَايَا
بَانْ الْمَكْنُونْ وُعْلَى رْسَامُو تْفَضْحَتْ لَسْرَارْ
هْجَرْتْ لَفْقِيهْ وُالسٌّلْطَانْ ، وْطَلَّقْتْ قَوْمْ الدْهَايَا
خْذِيتْ خْلِيلِي كْتَابْ يْبَدَّدْ ظْلاًمِي َيشْعَلْ لَنْوَارْ
يَصْقلْ عَقْلِي، يَجْليِ لَهْمُومْ ، يْنَقيِّ جْوَارْحِي وُ حْشَايَا
دَرْكُو لْعُزَّالْ شْنُو دَارُو ، أُوَّاشْ اللِّي صَارْ
رَسْلُو الرَّقٌَاصْ يَلْغِي جْفَايَا
جُرْحْ السِّيفْ يَنْذْمَلْ ، وُيْزُولْ لاَثَارْ
وْجُرْحْ اللّْسًان ْ ، يَبْقَى آيََة
نْوًصِّيكْ لاً ثِّيِقْ بْشَي بَشَرْ
لْسًانْهُومْ حْلُو، مْذَاقُو غًايَة
قَلْبُومْ كْحَلْ ، يَسْقِي لَمْرَارْ
سْمَعْ كْلاَمِي ، وْخُذْ لِيفَادَة ، هُوَّ مَنِّي لِيكْ وْصَايَا
كْلاَمْ لَمْجّْربْ ، كُلٌّو تَحْقِيقْ ، إِيْلاَ انْتَ نَاوِي بيهْ تَعْتْبَرْ
يْلاَ غَابْ عَقْلكْ ، شُوفْ سْوَايَا
يْكُونْ لِيكْ نْصِيحْ ، بْلاَ مَاتْفَكَّرْ
آخَرْ قَوْلِي لِيكْ دْعَايَا
نَطْلَب رَبِّي ، لَزْلاَيْلَكْ يَغْفَرْ
وْمُولْ لَكْلاَمْ اللِّي آنََيَا
يْنَجِّينِي مَنْ عْذَابْ لَقْبَرْ
وُيْسَامْحُونِي وَاِلِيدِيَّا
هَذَا مْنَايَا مَابْغِيتْ كْثَرْ
غَِي يْحْشَرْنِي مْعَ لآنْبِيًّا

المريني ادريس

القصر الكبير يتاريخ :27 / 05 / 2012

شْكُونْ اغْتَصَبْكْ ؟؟؟ !!!

شْكُونْ اغْتَصَبْكْ ؟؟؟ !!! 

 هذا مجرد رثاء لما آلت إليه مدينتي الحبيبة


شْكُونْ اغْتَصَبْكْ وْخَلاَّ فِِيكْ لِيمَارِة

كُنْتِي غْزَالَة فَعْيُونِي كُنْتِي جُوهَارَة

كُنْتْ نَقْرَا فِيِكْ كْتَابْ عُمْرِي يَالْمَسْرَارَة

هَجْلُوكْ يَتّْمُوكْ دَمّْرُوكْ رَجْعُوكْ الْعُديَانْ مَطْيَارَة

مَارَاعَاوْ ليكْ تَارِيخْ وَلاَ رَدْعَتْهُومْ حْزَارَة

هُولاَكُو فِيكْ تْفَنّْنْ بِجْيُوشُو الْجَرَّارَة

جِنْكِيزْ خَانْ ، قُدَّامُو، خَانْتُو الْعِبَارَة

الأُوبِّيدُومْ يَازِينَتْ الْعُمْرَانْ وْلَعْمَارَة

نَبْكِي بَالدَّمْ عْلاَ مَادَارُو فِيكْ الشَّفَّارَة

حْسَبْنَاهُومْ مْسَلْمِين لْقِينَا فْعَايَلْهُومْ فْعَالْ النْصَارَى

آلاَطِيفْ عْلاَ جَنْسْ يَبْلِيسْ مَنْهُومْ هْرَبْ وُتْوَارَا

وُكّْلْنَا عْلِيكُومْ اللهْ عْطِيوْنَا التِّيسَاعْ خْلاَصْ مَنْ الدْصَارَة

تَّغْنِيتُو حَتَّى تْقَوْرَنْتُو ، بَارََاكََا بِيْنُو شْوِيَّا دَ التْمَارََة

اللِّي سَبْقُوكُومْ آشْ قْضَاوْ ْ، يَاكْ جَلْهُومْ فِ الْمَقْبَرَة

خُوذُوا العِبْرَة مِنْ السَّابْقِينْ لاَ تْكُونُوشْ هَوَّارَة

لِيَّامْ لِيكْ وُعْلِيكْ، السْوايَعْ بَدَّالَة، وُالدُّنْيا غَرَّارَة

تَبْنِي وُتْعَلِّي تًمْشِي وُتْخَلِّي وَالْمُوتْ غَدَّارَة

آهْ لوُكَانْ تسْمَعْ ، قَلْبَكْ يَخْشَعْ ،وْعِينَكْ تَجْري بِدْمُوعْ لَمْرَارَة

تُوبْ لْمُولاَكْ يَاهُولاَكُو، طْحَنْتي لَعْبادْ ،خَلِّيتِي لَبْلاَدْ عِبَارَة

كَانَتْ لمْدِينة غْزَالًة وْفِعْيُونْ الْكُلْ جُوهَارَة

هَجْلُوهَا يَتْمُوهَا طَلْقُوعْلِيِهَا لَحْمارْ وُلْحْمَارَة






المريني ادريس

القصر الكبير بتاريخ : 29 / 05 / 2012

الجافي

الجافي

 
دُوَّرْ طَالْعَكْ لْجِيهْتيِ يالْعَاطِينِي بَلْقْفَا
لاَتْخمْمْ يَاعْشِيرْ ، يَمْكَنْ تَشْفَقْ لْحَاليِ
شوف فِيَّا بْعينْ الرْضَا، يازِينْ اللَّمْحَة وُالشُّوفَة
دَابَا لِيَّامْ تْصُدْنِي عْلِيكْ ، وْنَرْحَلْ فْحَاليِ
بَعْدْ وْلاَعْتيِ بِيك ْ، وُلْمْوَالْفَة
وَسْهِيري مْعاكْ إِيَّامْ وُلْيَاليِ
الْوَلْفْ صْعِيبْ ، وْلَفْرَاقْ سْمَاهْ غْيُومْ مَاتَصْفَا
وُالزْمَان ْ، يَفْرََزْ الرْخِيصْ مِنْ الْغَاليِ
الطِّيرْ الْحُرْ مَا يَنْسْجْنْ ، وْمِنْ طَبْعُو الصِّدْقْ وْلُُوْفَا
وُلْبٌومَة غَدَّارَة ، مَا تَنْشافْ غِي فْحَُلْكْ اللّْيَاليِ
شُوفْ فِيَّا وْخَبَّرْنِي عْلاشْ الْجْفَا
وُعْلاشْ تْحَرْك ْ لَجْمَارْ فْدْخَاليِ
شْعَلْتيِ نِيرَانْ حَلْفَت لاَ تَنْطْفا َ
وَآنَا الليِّ مْتِيَّمْ بَهْوَاكْ يًاغْزَاليِ
سْقِيمْ بِغْرَامَكْ نَرْقَبْ الشّْفاَ
وجْمِيعْ الْعُوَّادْ ترْثِيِ لْحَالِي
وُقْتَاشْ لَغْيُومْ تَنْقْشَعْ وَيْعُمْ الصْفَا
تْسَامْحِينيِ مَنْ قَلْبَكْ وْب اللِّي فَاتْ مَا تْبَالِي
نََتْرَجَّا قَوْلَكْ، قَلْبِي عْلِيكْ صْفَحْ ،وُعْفَا
وُاللِّي فََاتْ مَاتْ ، رْجَعْ ثُراتْ ، قْدِيمْ ،وْبَالِي
لاَ تْخَلِّيشْ لْعْدَا فِينَا تَتْشَفَّا
تَتْغَزَّا فِيَّ وْفِيكْ مَنْ لَعْلاَليِ
غِي دُورْ بْطَالْعََكْ لْجِيهْتي ، سَاعْتَي بْلاَ بِيكْ ، ضَْحاتْ وَاقْفَة
وُالسَّاعِة يْلاَ وُقْفَاتْ ، رَايْتِي تَنْتْكَسْ ، وُعْلاَمِي مَايْشَاليِ
غِي دُوَّرْ طَالْعَكْ لْجِيهْتيِ يالْعَاطِينِي بَلْقْفَا
لاَتْخمْمْ يَاعْشِيرْ ، يَمْكَنْ تْحَنْ وْتَشْفَقْ لْحَاليِ.

المريني ادريس


القصر الكبير بتاريخ : 25/ 05 / 2012