الزعيم

الزعيم

**********

يالْمغْروم بالزّْعامة

وْب لْكُرسي مفْتون

قالُو ناس لحْكامة

لعْداوة تابْثة دَوَّامة

والصّْواب لابدَّ يْكون

ويْلا فيك جْنُون لْعَظَمة

وْطامع تحْكم لْكُونْ

راجع سْيار لْقُدامَا

تكْشف السَّر لْمكْنُون

منْ كانُو فَ لْعدَّ عُولاَمَا

عاقَلْهوم راحْ مَغْبُون

ماودَّع حدّْ بالسّْلامَة

ولا ذَرفَتْ عْليه لَعْيُون

لَوْعنْدكْ أنََفة  وْكَرامَة

وْرايِد لْشرفَكْ تْصُون

ودَّعْ قبل النّْدَامَة

وْقُول ياريتْ مايْكونْ

المريني ادريس

القصر الكبير بتاريخ : 31 / 03 / 2013

يا أُمَّةً ضحِكت من غباءها : بْريجيتْ وشْلُومُو

يا أُمَّةً ضحِكت من غباءها : بْريجيتْ وشْلُومُو

***********************

سُوَّلت عْليك لْغادْية والرَّايْحة

وسُوّلْت عْليك الشَّابعة والجَّايْحة

وعْطاني خْبارك ذَاك لَهْبيل

عرفْت ب اللِّي اظَّلِّي سايْحة

وْذاك لْواد اللِّي فاشْ طايْحة

مَظْلام حالكْ اسْودْ مَ اللِّيلْ

كلّْ النَّاس تعْرف وينْ رايْحة

الاَّ انْتِ بْلا حتَّى دَليلْ

م لَّبْحر لَّبحر ريحْتك فايْحة

وايَّامك كلّْها رْقاد وْلِيل

إِمْتى تْفيقي يا هاذْ السابحة

لْغارقة فْ بْحر لفْسَاد وُلْويلْ

وتْعُودي لْ صهْيُون ناطْحة

تتْخلّْصي من الذُّلّْ وُالتّْبهْديل

وتسْتَبْدّْلي لْعقليَّات لَمْسطّْحة

تْفُوتي لمُخْتار وْمول لْ إِنْجِيل 

المريني ادريس

القصر الكبير بتاريخ :30 / 03 / 2013

فطُّومة

فطُّومة

**********

عليك نفرَّغ الجُّوف

ونسطَّرحْروف منْظومة

من غيرك مانْشُوف

وكْبدْتي عْليك مَكْلومة

خْيالك مازال يْطوف

قدَّام دارْنا وْف لْحومة

ذبحُوني كيف لخْروف

وْحرْمُوني منّك هُوما

ماگرّْ فيهُوم معْروف

ولا الصَّفْقة لْمعلُومة

ركّْبو فيَّا لْخُوف

بكلْمَة وحْدة ملغُومة

بيها لاَباقيشْ اطُّوف

ولا تلصق فيكْ تهمة

وليُوم سمحَت الظُّروف

شوَّفتكْ حالْتي لْمهْمُومة

ياترى تبردلي نار الجُّوف

ولاَّ تْسايريهم يا فطُّومة ؟

المريني ادريس

القصر الكبير بتاريخ : 29 / 03 / 2013

حرقتي لوراق

حرقتي لوراق

************
حرقتي وراقك على بكري
ومازال زايد ف لمهزلة
لخردين ترابع فيه وتجري
حالتُورجعت حالة
من راد يبيع ويشري
خْلقتُولو سوق دلالة
ولمرس لامن يدري
بْماضيه غير اللّْوالا
نافورتو رخامة تبري
ولْحوت فْ رقصة ميَّالة
بعد كانت هادية تغْري
عادت لامَّة لْكل جقْلالة
للسّْويقة نَهدي صَبري
ونْزيدها صْبر الرَّجَّالة
هولاكُو قْصدها يعرِّي
حْجَابْها بْ جُرْأة ونْذالة
مْع سُخْط الشَّارع لقصري
قالُّوم ضخَّمتو لْ مسْألة
كان قصدي نشذب ونبري
ظنِّيتْها شارفة وْهجَّالة
نْمكْيجها بمَاكْياج عصْري
وتْعودْ منظورة وغْزالة
ماحسبتها غلطات عمري
ولانويت صْراخْكوم يتْعالا

المريني ادريس
القصر الكبير بتاريخ : 25 / 03 / 2013

شروذٌ قبلَ الرَّقاد

شروذٌ قبلَ الرَّقاد

*****************
ماتَقْدرْش تْصَوَّمْني عَ لَّكْلامْ
ولا تمْنعْني مَنْ كْتابْتْو
لْساني ما يقْبل لْجام
أُووَّجْهك آنا مْرايْتُو
ماني بْهيمة كيفْ لنْعام
وْحرْفك سْبقْتَك لقْرايْتو
لو يتْمطَّطْ ليكْ لعْمر
وتبْلغْ منُّو آلفْ عَامْ
أو تتْعلاَّ لْفوقْ وكْثَر
لُغْزكْ آنا نْفُكّْ حجَّايْتُو

*****
المريني ادريس
القصر الكبير بتاريخ : 24 / 03 / 2013