هَذَيَانٌ عَلَى مَشَارِفِ الخَرِيفْ

هَذَيَانٌ عَلَى مَشَارِفِ الخَرِيفْ

*******************
دَازَتْ لِيَّامْ وْمَادَازْ مَنْهَا قْلِيلْ
وُضْْحَا جََسْْدِي مََسْقَامْ عْلِيلْ
وَارْفَةْ الشْجََرْصََارْظَلّْهَا قْْلِيلْ
وُنْوَاعْ لْغَمّْ هَاطْلَة عْلِيَّّا هْطِِيلْ
تْوَحَّشْتْ النُّومْ وُُرْگَادِي الثَّقِِيلْ
تْفَكَّرْتْ خْبِيطْ الشّْتَا عَالْ الزَّنْگْ
لْحَالْ گاسِي وُاللِّيلْ طْوِيلْ
حَيَّرْنِي السّْبَابْ مَا لْقِيتْلُو دْلِيلْ
وَآشْ أَنا وحْدِِي وُلاَّ لِيَّا مْثِيِلْ ؟؟؟

المريني ادريس

القصر الكبير بتاريخ : 30 / 10 / 2012

لاَ حِيلَة مْعَ اللهْ

لاَ حِيلَة مْعَ اللهْ

****************

بْكِيتْْ حْتَى وَكْحَتْ عِينِي مَنْ الدْمُوعْ

بْكِيتْ عَالْمَعْشُوقَة مْشَاتْ بْلاَ رْجُوعْ

اللَّوْلَة بَشْهِِيقْ وْصُوتْ عَالِي مَسْمُُوعْ

وُالثَّانْيَة بْدَمْعْ لُونُو حْمَرْ فَ الدَّمْ مََنْقُوعْ

تَّكْوِيتْ جُوجْ كِيَّاتْْ وُلْيُُومْ رَاسِي مَقْطُوعْ

اللِّي حَمْلَتْنِي فْ حْشَاهَا وْجََابََتْنِي لِلرّْبُوعْ

وُُاللِّي حَضْنَِّي صْْدَرهَا وْقَانِي عْطَشْ وْجُوعْ

رَحْمَةْ الله تَرْعَآكُمْ دْعََايَا لِيكُمْ سْجُودْ وَرْكُوعْ

لْقَلْبْ مَصْدُومْ رَاگدْ مْصَهَّطْ بِينْ الضّْلُوعْ

لََعْقَلْْ طَايِِشْ شَارَدْ مَنْ التَّرْكِِيزْ مََمْنُوعْ

وُالرَّاسْ حَالَةْ عُودْ مَنْ شَجْرَة مَقْطُوعْ 

لَفْرَاقْ صْعِيبْ ُُُوْكُُلْ وَاحَدْ بِِيهْ مَتْبُوعْ

قْضَا وُقْدَرْ وُحْكَامْ اللهْ لِيهْ آمَرْْبِالطُّوعْ

لْ أَجَلْ مْسَمِّي السّْفَرْ مْحَتَّمْ لََعْمَرْ

مَحْدُودْ وُلْمَكْتُوبْ مَطْبُوعْ

لاََ حِيلَة مْعَ اللهْ مَايْفِِيدْ فْ لَعْمَالْ

غِي خِيرْهَا لْمَرْفُوعْ

يُومْ لخلق مْْزَاحْمَة شِي دَافَعْ شِي مَدْفُوعْ

وُبْرَارْ لْخَلْق مَابِينْ شَافَعْ وْمَشْفُوعْْْ

شَرْخَلْقْْْ اللهْْ مَنْ هَوْْلْ مَاشَافْ مَخْلُُوعْ

رََحْْمََةْْ اللهْ وَاسْعَََة يَامَنْ بْلْعْقُوقْ مُولُوعْ

تََايْبِينْ لَ الرَّحْمَانْ آََيْبِينْ وْ لِيهْ الرّْجُوعْ

لاَ حِيلَة مْعَ اللهْ هُوَّلْحَقّْ هُوَّ الدَّايِمْ

لِيهْ السَّمْعْ لِيهْ الطُّوعْ

لِيهْ السّْجُودْ وْلِيهْ الرّْْكُوعْْ

المريني ادريس

القصر الكبير بتاريخ : 29 / 10 / 2012

وْصِِيَّّّةْ لْمَجْذُوبْ

وْصِِيَّّّةْ لْمَجْذُوبْ

**********************

مَنْ لْمَجْذُوبْ خْذِيتْ لِيشََارًة
لْمََرْبُوعْ فَكْلاَمُو أَنَا نَرْوِيهْ
لْحَرْفْ نْصَِيغُو حَكْمَة وُعْبَارَة
وُُُنْْْغََرْسُو فَمْزَاهََرُو حَتََّى نََجْنِيهْ
إِِيْلاَ حَانْ جْْْنََاهْ نْلَمٌّو فْ شْكَارَة
وُنْمِيرُو لَ للِّّي يْحَبّْ يَصَّنَّّتْ لِيهْ
أَوْنْطلْقُو رْصَاصْ فََوْجَهْ الشَّفَّارَة
وُاللِّي دَارْ قْنَاعْ غَادِي نْكَشْفُولِيهْ
شْحَالْ فْهَاذْ لوْطَنْ مَنْ قْوَامْ حَگَّارَة
وُكْذَا مَنْ گَنْطِيحْ رَايَدْ نَرَكَعْ لِيهْ
لْمَجْذُُوبْ وُصَّانِي وُعْطَانِي لِيمَارَة
طَانِي وَصْفْ الصَّادَقْ وَنْعُوثْ السَّفِيهْ
وُالزََّاهَدْ لْعَابَدْ وُسْرَايْرُو لْمَََسْْرََارَة
وُُلْفَاسَدْ لْغَاشِي سْبَايِلْ التِّيهْ
عَلَّمْنِي لْمَجْذُوبْ مَانَرْكَنْ لْْظَالِمْ
مَانْصْحَبْ وْزِيرْ مَانْجَاوُرْ يْمَارةْ
وْجُورْ السَّلْطَانْ مَانَسْكُتْ عْليِهْ
وَحْدِي نَتْصَدَّالُو بْ حْرُوفْ شْرَارَة
وُيْلاَ النَّاسْ هْوَاتُو وْمََالَتْ لِيهْ
نْخَاطَبْهُومْ بَ لْغَايَا وَخَّا فِِيهْ مْْْرَارَة
وُيْْلاَ صَمََّاتْ لُُوْذَانْ نْبَعَّدْ لْهِيهْ
نَخْدَمْ بَرَّاحْ صْحِيحْ لاََََ صُولْْدِي لاََ يْجَارَة
شِي مْخَبَّعْ فْ الدِّينْ منصَّبْ رَاسُو فْقِيهْ
وْشِي دَايِرْ زْعِيمْ عْلاَ رَاسْ لْ إِدارَة
شِي مْحَصَّنْ مْنِيعْ وُلْعَسَّة ضَايْرَة بِيهْ
وْشِي مَضْْرُوبَة فِيهْ تْخَرْمَتْ لِيهْْ الشّْكَارَة 
قَالْْْ لْمَجْذُوبْ وْرِيهْ وْرِيهْْ
وُيْلاَََ عْمَا سِِيرْ وْخَلِّيهْ
تْرَبِّيهْ لِيَّامْ تْعَلّْْمُو الشّْطَارََة
ادََّخَْلُو فْ جْوَاهْ بْ لَهْلاَ يَگْزِيهْ
وُتْعَرِّيهْ مِنْ ثُوبْ الدَّصَارَة
اللِّي لَمّْ فْ حْيَاتُولْغِيرُُو يْخَليِّهْ
بَعْدْ لْيَاحُُوفْ لْمَقْبَرَة
آشْ خَاذْ قَارُونْ مَنْ كْنُوزُو
وََلاَّ لْفَرْعُونْ مَنْ حْوَاشِيه
قَبْلُو النَّمْْرُودْ دََارْ طِيَّارَة
وْْلاَََحْْْْ لْخَلِيلْ لِِلنَّارْتَگْدِيهْ
لُُولاََ لْْْ أَمِِينْ جََاهْ بْ زْيَارَة
آمْرُو رَبِّي بَاشْ يْنَجِّيهْ
كَانْْ رْمَادُُو صَارْ يَتْذَرَّا
وُُضْعَافْ لَرْياحْ بْهَبَّة تَجْلِيهْ
كْْْذَاكْ لْحَاكَمْ يْْْلآ بْلاَ تْمََارَة
النَّاسْ تْهِيجْ وَاثُّورْ عْلِيهْ
يَاغْلِيظْ الرَّاسْ فْْهَمْ لَعْبَارَة
ضْعِيفْ لْقُومْ لاَ تَحْگَرْ فِيهْ
نْهَََارْ تَجْرِي عْلِيكْ لْمَسْطَرَة
يُُومْ خْلُوقَكْ تََنْدَمْ عْلِيهْْ
تَتْمَنَّى فِيهْ لَوْ تَتْوَارَا
عْْلََى نْظََارْ لْخَلْقْ وُُُتْغِيبْ عْلِيهْ
مَنْ لْمَجْذُوبْ خْذِيتْ لِيشََارًة
لْمََرْبُوعْ فَكْلاَمُو أَنَا نَرْوِيهْ
قَالْْْ لْمَجْذُوبْ وْرِيهْ وْرِيهْْ
وُيْلاَََ عْمَا سِِيرْ وْخَلِّيهْ
تْرَبِّيهْ لِيَّامْ تْعَلّْْمُو الشّْطَارََة 

المريني ادريس
القصر الكبير بتاريخ : 22 / 10 / 2012

 

حْكَايَةْ بَّا عَلاَّلْ

حْكَايَةْ بَّا عَلاَّلْ

****************

بَّا عََلاَّّلْ بُولَمْحَايِنْ

دِيمَا غََاضَبْ

دِيمَا زَعَْفَانْ

يْلاََ مَادُوَّرْ فْ لِيدَارَة

كَ يْخَلِِّيوَاهْ دِيمَا يْسَايِنْ

سِِيرْ لْ إِلىََ وْسِيرْ لْ حَتَّى

لْ إِدَارَة جَاهَا بَ اللِّيلْ

بَاتْ بَْلاَنْعَاسْ جَاهَاتَالَفْ

سَََمّرلْحِيطْ يْشَدَّ الصَّفّْ

تْلَحََّّفْ تَلْحِيفْتْْ لْعَرْيَانْ

بََزْْغََاتْ الشََّّمْسْ فِاقْ بْ الذَّبََّانْ

دْْخََلْ لَ لْ بِيرُو نََاسِي فْْطُُُورُو

بْلاَ مَا يْخَمَّمْ شْعََلْ گَارُّو

سَوْلُو لْمَسْؤُولْ بِمَا يَلِي

آشْ بْغِِيتِي يَآ لْبُوهَالِي

لُوحْ دُخَّانََكْ وُتْْعَالاََ لِي

وْْگُُُولِّّي شْ بْغِييتِي يَاهَذَا

جَاوْبُو عَلاَّلْ كِيفْ لْعَادََة

آسِيدِي مَرْتِي وُلاَّدَة

بَاغِِي ازْْدِيَّادْ وْإِفَادَة

گَالُّو لْمَسْؤُولْ خَصّْنِي حُولِي

بَاغِيكْ حِينًا تْجِِيبُولِي

وَتُّوتْ سْوِيتْْ تْحَضََّرُولِي

يْْلاَ عْْصِيتِي غَرْضَكْ مَرْفُوضْ

جْْمَعْ وْقَفْتََكْ بَ لْخََفّْ وُنُوضْ

بََّا عََلاَّلْ طْلَعْ لِِيهْْ الدَّمّْ

رْفَدْْ صَبَّاطُو وُخْرَجْ مَنْ تَمّْ

وُُبَّا عََلاَّّلْ بُولَمْحَايِنْ

حَالُو تْقَلَّقْ وُصْدَرّ بَيَانْ

ذَْكَرْ فِيهْ  گاعْ التَّفَاصِيلْ

رْفَعْ دَعْْوَى بِِيهْ لَ لْوَكِيلْ

بَََاغِي لََفْكَاكْْ مََنْ هََاذْْ لْوِيلْ

سِِيدْ لْْْوََكِيلْ مَنُّو مَاكَانْ

وَآمَرْعََلاَّلْ يَسْمَعْ مَزْيََانْ

لاَلَّة مََرْتِي فِِيهَا لُُوْحَامْ

طََالْبَََة مَنِّي زُوجِينْ حْْمَامْ

وُجْمَلْ صْغِيرْ مَافِيهْ يْدَامْ

وُلْدِي سَفِينْ مَاعْلِيهْ كْلاَمْ

طَالَبْ غِ سْرِيرْعْْلِيهْ يْنَامْ

بََنْتِِي نَجْوَى فِيهَا بَلْوَى

تَطْلَبْ حَقْهَا مَنْ كُلْ قَهْوَة

فْهَمْ رَاسَكْ حُكَّ جْنَابَكْ

يْلاَ رَايِدْ تَقْضِي مْصَالْحَكْ

وُيْلاَ رْفَضْتِي تَمَّا بْقِيتِي

عَنْدِي لاَ تْلِِيتِي وُلِّيتِي

 وُبَّا عََلاَّّلْ بُولَمْحَايِنْ

رْفَعْ كْفُوفُو بْلاَ مَايْسَايَنْْ

سَالْ دََمْعُو وُبْدَا يَشْهَقْ

حَلْ فَمُّولَ دًّعَا وُنْطَقْ

الله يََّاخُذْ فِيكُومْ لْحَقْ

كِيفْ لْْوَكِيلْ كِيفْ لْمَسْؤُولْ

مَايَوْصَلْهُومْ غِيرْ لْمَخْبُولْ

وُاللِّي مْسَالِي مَاعَنْدُو شْغُولْ

إِدَارْتْنَا سْكَنْهَا لَفْسَادْ

فْحالْ الطَّالَعْ كِيفْ لْهَوَّادْ

إِلاََّ لْقَلِيلْ مَنْ لْعِبادْ

هَاذِي حْكَايَةْ بَّا عَلاَّلْ

مَنْ يُومْ شَدِّينََا لِسْتِقْلاَلْ

وْسِيرْتُوضَايْرَة عْلَى كُلَّ لْسَانْ

المريني ادريس 

القصر الكبير بتاريخ : 17 / 10 / 2012