گرَّانْ = إعْتِراف

گرَّانْ = إعْتِراف

**********

يا لِّ حَاجْبك مسْلُوت
وْعيْنيك ياقُوت
كَ نْحبَّك بلا بْهُوت
ولِّ بْغا يْمُوت يْموتْ
**********
المريني ادريس
القصر الكبير بتاريخ : 25 / 06 / 2013

همْسَة

همْسَة

********

خُرْجِي ياحْرُوف
اَتْسَرْسْبِي يْلا بْغِيتِي
بْخاطْرك مَاشِي مجْبُورَة
ولاَّ نْخرّْجك بَ لْفُونْتِي
حتَّى لَو كَنْتي فْ مَطْمُورَة
لُوحِي لْخُوفْ لاتْسُكْتِي
لْيُوم رَاهْ ضَارَتْ الدُّورَة

***********
المريني ادريس
القصر الكبير بتاريخ : 23 / 06 / 2013

نَجْوَى ( مَاشي فؤادْ )

نَجْوَى ( مَاشي فؤادْ )

*********
سَاوينِي رَانِي وَتْرة
وعْزف عليَّا نغْمَاتَك
غِ لاَتَرْمِينِيشْ بْ نظْرَة
كأنِّي دْخِيلَة عْلَى حْيَاتك.

********
المريني ادريس
القصر الكبير بتاريخ : 23 / 6 / 2013

عَاهْدِينِي

عَاهْدِينِي

*********

نْخافَك تْكُونِي طُوفَان
تْجَرْفِينِي
أَوْيتْسيَّفْ خْشَاشَك نِِيرَانْ
وتْحَرْگِينِي
خَلِّينِي لْ قامْتَكْ عُنْوَانْ
لاَ تْمَسْحِينِي اعْطِينِي عَهْد وْأَمَان
يْلا اسْتَجَرْتَك لاَ تْخُذْلِيني

**************
المريني ادريس
القصر الكبير بتاريخ : 23 / 06 / 2013

كاين وكاين

كاين وكاين

********

كاين شي كْلايميَّة
كسبو لعقول ولقلوب
وكاين شي فهايمية
تجبلو على النفاق ولكذوب
يحسبو ارواحهوم فوق الناس
لْ حرفهوم قيمة وقياس زنافرهوم طالعة خلاص
الصد والضد ولحسد ، ولوسواس
لعناد وقصوحة الراس
لكبير كبير بلا طر بلا بندير
وكحل لگلب واحد م لحمير
يتكبر ب لعمية
حروفو جوطية
السلعة جديدة
وبلا فايدة
تقول غ تايوانية

***********
المريني ادريس
القصر الكبير بتاريخ : 24 / 06 / 2013

لاتْلُومني

لاتْلُومني

**********

لاتْلُومني يْلا جْفيت عْلِيك
وبدَّلتك بْ وَاحدْ ثاني
انتَ لِّ درْتيها بْ يدِّيك
وفضَّلْتي عليَّا عدْيَاني
خْلاص أنا ماتْلِيت نَبْغِيك
غِير فُوتْني حَاولْ تَنْساني
كنْت نعْطَف بزَّاف عْليك
وخَّا انْت حُبَّك نَصْرانِي
وْكُنت نَرْجا ربِّي يهْدِيكْ
خَابْ ظَنِّي هَاجَت حْزَانِي
وَلْيُوم قرَّرْت نتْخلَّى عْلِيك
مَجْبُورَة مَاشِي بَ لْعَاني
كُولْشي بان ليَّا فْ عََيْنِيك
مَاقَالْها لِي حدّْ برَّانِي
ب السّْلامة بْلا مانْوصِّيك
حيثْ غَادية نْبدَّل عُنْوانِي
لاتْلُومني يْلا جْفيت عْلِيك
وبدَّلتك بْ وَاحدْ ثاني

********
المريني ادريس
القصر الكبير بتاريخ : 10 / 06 / 2013

أنا مْزاوَگْ

أنا مْزاوَگْ

***********

حَسَّينِِي بَ دْفَاك
وْحطِّيني فْ شُونَك
ماعنْدي فْراق مْعَاك
وخَّا يمْرارْ شْرابَكْ
وخَّا يتْبدَّل لُونَك
سدِّي ذُوكْ لشْفَار
ونْسايْني وسْط عْيُونَك

**********
المريني ادريس
القصر الكبير بتاريخ : 21 / 06 / 2013

حالة شروذ ( 32 )

حالة شروذ ( 32 )

**********
لمغرب النافع
ومغرب لمدافع
مغرب لواضح
ومغرب لمرموز
شي ساطع
شي تْواضع
شي يْناطح
وشي شبعان هْمُوز
شي لْفُوق
وْشي مشْنُوق
 بْلادنا قبَّةَّ
تحْتها سُوق
فيه نْعاج وْنُوق
فيه دلاَّل ب لْبُوق
يْبيع لْمسْروق
فيه حلْقة وحمَّام
كلام زنْقة
وْسايس ب لْجام
شادّْ الصّْرِيمَة
حاكم لَبْهِيمة
حابسْها عْلى طكُّوكْ
ويْلا جفْلَتْ يهشّْ
عْليها بْ شُوكْ

**************
المريني ادريس
القصر الكبير بتاريخ : 21 / 06 / 2013

حالة شروذ ( 31 )

حالة شروذ ( 31 )

***************

وقْتاش تْحَسْبُو النَّاس ناسْ
ويْحسّْ الشَّعب بَ كْرَامْتُو
وقْتَاش يْصحّْلْكُوم السَّاس
وْتعْتَاذْرو ليهْ بَ سْلامْتُو
الظُّلْم ولْحَگْرة بْلا قْيَاسْ
والسَّايسْ فَشْلاتْ ليهْ سِيَّاسْتُو
عْوامْنا زِِينَة وْديمَا لابَاسْ
يْردَّدهَا لْفَاسد كِيفْ عَادْتُو
***********
المريني ادريس
القصر الكبير بتاريخ : 19 / 06 / 2013

جِيلْ : الجِّيل Gel

جِيلْ : الجِّيل Gel

**********

وَاعرْ وْضَاسَر
كْلامُو كولُّو خَاسر
يالَطيف آش هاذْ لْولْدة
بَرجُو بُرجْ لْقردَة
لا قلْب حْنين
لاعطْفة بْ كبْدة
غَارقْ فْ هَمَُّو
مايْوقَّر بَّاهْ وَلاَ امُّو
يْبِيعْ خْتُويْسبّْ عمُّو
دِيما مَزْرُوبْ
ملّْتُو كْذُوبْ
صْلاَتُو حْبُوبْ
وْشمَّانْ
يْعجْبو يْبَان
ليسْتقامَة عَنْدُو عُقْدَة
حالْتُو ديمَا مْجبّْدَة
الله يْدِير شِي تَاوِيلْ
يْلا ضَرْبتْ الرَّعْدة
**********
المريني ادريس
القصر الكبير بتاريخ : 18 / 06 / 2013

بْغِيتْ راحْتِي

بْغِيتْ راحْتِي

************

شْحالْ قدَّك تتْألَّم وتْنِين
صابر ل ْجُرحكْ لْغايَر
حَابَسْ دَمْعك يامَسْكِين
تَايهْ فَ دْوَاخْلَك حَاير
نْصحْتك شْهُور وَسْنِين
شِي نَاسْ طْبعْها غَادَر
تْعجَّبت لْ قَلْبك لَحْنين
هَازّْ الضَّربَة وَيْكَابَر
إِيمْتَا تَصْحَا ياضَمِير
تْنُوض اطَّالبْ بالتَّغْيِير
لْوقْت تْبدَّل يَا أَمِير
حَلّْ اللُّغْز
فُكّْ التَّشْفِير
ارْفَضْ الظُّلْم والتَّحْقِير
انْفَضْ لَغْبَار وَمْعَاه الجِّيرْ
وْفرْفرْ بجْناحَك كْيفْ الطِّير
وصْرخْ بْ صُوتَكْ عَالِي
يَاذَاكْ الرَّاعِي يَاذَاكْ لْوَالِي
مانا مْخبَّلْ مانَا مْسَالِي
مَانا هْبيل أوْ بُوهَالِي
بْغِيتْ راحْتِي يا ؟؟ ذَاكْ الزِّينْ

***************
المريني ادريس
القصر الكبير بتاريخ :16 / 06 / 2013

حالة شروذ ( 30 )

حالة شروذ ( 30 )

**********

هُرّْنِي نَضْحَكْ
رَانِي هْجَرتُو
وعْطِيني منْ وقْتَك
رَاني احْتَاجْتُو
لْهمّْ كْثير
يالَعْشِير
نْت قَلْبَك مْسَافَر
وَآنَا فْ جَنْبك
شَارذْ فِيكْ
حَايَر
وآشْ نْسَايْرك
ولاَّ نْهجْرَك نَسْمَح فِيكْ

*******
المريني ادريس
القصر الكبير بتاريخ : 15 / 06 / 2013

ردّْ بالكْ

ردّْ بالكْ

*********

ولْد لفْقِيه
خْرج سْفيه
حْلم حْلامَة
كْلا جُوج وْضامة
بْ يدِّيه ورجليه
مايگدّْ حدْ ينْهيه
راسُو قاصَح
كيفرَّق الصّْناطَح
كَ ينْها وَ يْآمَر
كَ يْبرْغَز وْيتْآمَر
جَاهَل
وْمنْ جَهْلُو
ديمَا شَاعَل
فْ عِيُون مْثَايْلُو
دَاعيَة
فْ عِيُونْ زْمَايْلُو
دَاهيَة
فْ عيُونْ عْدايْلُو
طَاغِيَة
عنْدو فَرْصَادَة تعْجَب
مْقزْدرَة مَاهِي خْشَب
فْ صرْفو كَ ينْهَب
كَ يقْمع وْكَ يْكْذَب
وْغ عْطِيه بْلا مَايَطْلب
كَ يْحَشّْ كِ الزَّرَّاب
اللِّي فَ طْريقُو يدِّيه
ردْ بالك لاَ تغْلَط فِيهْ
انَا نْصَحْتكْ بَ لِّ فِيه
ويْلا زرّْفَك منَّكْ لِيهْ
**********
المريني ادريس
القصر الكبير بتاريخ : 15 / 06 / 2013

تعْويذَة

تعْويذَة

********
حُطّْني فيَّا
وخلِّيني نَرْتََاح
وغْبر عليَّا
لَ الصّْباح
وْشوفْني فَ مَرايْتي
وآشْ أنا هيَّ
اللَّي ساكْنَاني
وُلاَّ اللِّي فيَّا
ماهَنَّاني ؟
آهْ يا أنَا
نْقُجَّك فيَّا
يْلا قْدرْت عْليَّا
وْفيَّا نَتْلاحْ
******
المريني ادريس
القصر الكبير بتاريخ : 14 / 06 / 2013

أنَا بَعْدا فْهمْتك

أنَا بَعْدا فْهمْتك

************

درْتينِي سلُّوم
طْلعْتي عليَّا
لْ بيت لْحَكمَة
وف عزّْ النُّوم
بنْتي ليَّا فْ حلْمة
لما ضَربتْي لْفيقَة
مَ لَّمْنام
لْگيتك انت وبُوغطَّاط
تْوامْ
هو كيقجّْ ويطْلق
ونْت قجّْتك ماتعْتَق
وبْلا ماتْسوَّل ثَانِي
أنَا بَعْدا
رانِي فْهَمْتك
وْفهْمك نصْرانِي
غِي ارْخَف وَطلقْ

********

المريني ادريس
القصر الكبير بتاريخ : 14 / 06 / 2013

جَرَّبْ

جَرَّبْ
******
غِي هْضَر
وُگُولْها
وخَّا گدّْ رَاسَك.
ماعْلِيك حْكَام
عارْفِين قْيَاسَكْ
وْحِين تتْبصَّر
بَ هْوَالْهَا
كْثم نْفَاسَكْ
بَْلا صْيَامْ
وَحْفَرْ سَاسَك
فِين تَغْبَر
رَاكْ فَ بْلاَد
شْهُودْ وْمَحْضَر

 
*********
المريني ادريس
القصر الكبير بتاريخ : 13 / 06 / 2013

حالة شروذ ( 29 )

حالة شروذ ( 29 )

*************

مانَاش فْ يدَّك رُونْدة
باشْ منِّي تخْرُج
أنَا زهْرَة بنْت وَرْدة
أنَا حْمَامة والْعَة تَدرُجْ
بْنِيلي عشَّة فُوگْ لْكَبْدَة
خلِّي قَلْبَك فيَّا يْفَوَّج
أنَا حُرَّة مَاشِي عَبْدَة
جِِيِنِي نِيشَانْ لاَشْ تتْعَوَّج
*******
المريني ادريس
القصر الكبير بتاريخ : 12 / 06 / 2013

ماشِي بَ لْعاني

ماشِي بَ لْعاني

*********
عْلاش اللِّيفْ ماينْقُط
وعْلاش لْبا وحْدة من تَحْت
عْلاش لبْلا غِ علينا اتْحَطّْ
ومْعيشَتْنا كَحْلة كِ الزََّفْت
عْلاشْ بْلادي فِيها لْقنْط
وكُولْشي فِيهَا قايْسُو الشَّحْت
شِي مْضعْضَع وَاكََل الشَّحْط
وْشي غَرسُو بْلا سْقا ينْبَتْ
شِي عَريَان مَكْشُوف ازْبَط
وشي بْ لَحْريرْ طَرْزُو مْسلَّت

*********
المريني ادريس
القصر الكبير بتاريخ : 12 / 06 / 2013
 

حالة شروذ ( 28 )

حالة شروذ ( 28 )

************

سولني عليك قلبي
علاش نت غضبان
قالي وآشنو ذنبي
ايلا كان حبو زربان
عمرو ماسكن جنبي
ولاعرفلي عنوان
ماعندي مانخبي
وعمري ماكنت غلطان
تزاد من جيهتو وصبي
وعرفتو ماشي إنسان

************
المريني ادريس
القصر الكبير بتاريخ : 12 / 06 / 2013

حالة شروذ ( 26 )

حالة شروذ ( 26 )

************

يارَاسي همَّكْ كْثَر

دْخَل لْذاتَك وتَّنْشر

ياذَاتي بَاشْ تْفسَّر

لمَّا مْزاجَك يتْعكَّر

كِيفْ تشْعُر لمَّا تَشعَر

لمَّا لْسَانك حَرفُو يقْطَر

لمَّا عْلى حَالك يْعبَّر

لمَّا يْشهَّر بَ لِّ يَغْدَر

لمَّا يفْضَح أوْ يسْتنْكَر

الرَّاسْ ياذَاتي عْيا يَصْبَر

خَايف عْليه لَوْ ينْفَجَر

***********

المريني ادريس

القصر الكبير بتاريخ : 10 / 06 / 2013

حالة شروذ ( 27 )

حالة شروذ ( 27 )

************

ماشِي غرْضي نَهْتك عَرْضَك
وَلاَّ نْشوَّه ليكْ الصُّورَة
وآنَا مازَالْ نَعْرضْ عَرْضَك
إنّمَا بْ صُورة مَبْتُورَة
مَامتْنكَّر أنَا لْ فَضْلَكْ
حتَّى لُو ضَارتْ الضُّورَة
كانْ مُرَادِي نْكُون مْرَايْتَك
ونْودِّي لَِيك لَمْشُورَة
لْقِيت راسَك وُلاَّ عَاجْبَكْ
نْسِيتي لْعشْرة والجُّورَة
مانْويت لمْناصَب تْبدّْلَك
تْرجَّعْلَك نفْسك مغْرُورَة
خَايَف نْهار يْعُود وَعْيَك
تْكُون تْعرَّات لِيك لْعُورَة
حَتَّى شي رُقْعة ماتْستْرَك
سْمَعْتك شَاهَت منْشُورَة
وآشْمَن بُقْعة غَادَة تْهُزّكْ
غِير شُوفْلِيك شِي مَطْمُورَة
***********

المريني ادريس
القصر الكبير بتاريخ : 11 / 06 / 2013

وحام لْمَرْيُوحَة

وحام لْمَرْيُوحَة

***********
حكمت عليا الظروف
نشريلها كيلو خروف
هي ادلي ف كرشها
وآنا نحنزز ونشوف
هي جاها لوحم
وآنا راني ف لهم
تشوي وتزيد ف اللحم
تصْرطْها كِ لْحلُّوف
ياختي سيري لداركوم
آنا مابقيت جاركوم
كرهتيني ف الصوم
وعنواني ليوم متلوف
نْعل بُوها قَاعِيدة
تَوگفْ كيفْ لَحْديدة
كُلّْ يوم طلْبة جْديدة
كتمَدّْ ليَّا لْميدة
هاك وصَّلْها لَ حْمِيدَة
ويْلآنا گلْت لاَّ
تنْصَبْ ليَّا مْصِيدَة
وْتخلِّيني بْلا مَصْرُوف
اللهْ ياربِّي اللهْ
هاذ لَبْلا آشْ وْرَاه
جِيبي رَاهْ اتَّتْقَب
كُ نّْهار فيَّا تنْهب
عْييتْ أنَا نتْعَب
هي ادَّلِّي فْ كَرشْها
وآنا نْحنْزز ونْشُوف
ولِّيت كِيفْ لْمشْقُوف

**********
المريني ادريس
القصر الكبير بتاريخ : 09 / 06 / 2013

حالة شروذ ( 25 )

حالة شروذ ( 25 )

************

هْواك كبَّل گلْبي
يامُولشْفار الذَّبَّاحَة
وآشْنُو ذَنْبي
جاوْبينِي وَبْكلّْ صَراحَة
عْييِتْ نْخَبِّي
وسْرارِي طَلْعَت طَفَّاحَة
شْربْت نَخْبي
ونْتِيَّا قْبالْتِي تُفَّاحَة
لْقِيتْ حُبِّي
عْليكْ راكَب وُنْت مرْجَاحَة
لاتْعِيبِي
عْليَّا نْقولْ لِّيك كَلْمة مُبَاحَة
وْلاَ تْوثْبِي
عْلَى نْغَمْتي لِيكْ رَاهَا صَدَّاحَة

المريني ادريس
القصر الكبير بتاريخ : 08 / 06 / 2013

مَلِّينَا

مَلِّينَا

********

زهْري وْزهْرك خذاوه لعْدا
وْخلاولي منُّو رشَّة لَّ َقْبرْ
عْلاشْ خلِّيتني وْحيدْ يادَادَا
نْقارع وحْدي قْلوبْ لحْجر
لمْكر فيهوم سُنَّة وْعادة
فْطامْهُوم كان حليب لغْدر
بلاد الرّْعيَّة بْلاد السَّادة
ملْيانة فْساد عامْرة منْكر
خَوْفي فيهَا يْلا نتْعادا
نتْبكَّم مانْعُود نهْضر
الذِّيب فيها غاوي الصيادة
وفْقيهْنا غاضَضْ لَبْصَر
شحال گدِّي نْحاول نتْفَادا
شْباكْهُوم منْصوبة بْ لَمْكر
الشِّيح والرِّيح ولْفُوحان زْيادة
والدّْماغ گرْعَة خَاوْية تْصفَّر
كُلّْ صَابة  عْليهَا حصَّادَة
يمَلْصُو لْغلَّة يْوزّْعُو لفْقَر
من تمْلاصْهوم دارُو قَرْفَادة
وكْرُوش خَارْجة قْريبَة تتْجَرّْ
وحْنا بحْصاصَة كِِيفْ لْعَادَة
وَشْكُون فينَا يضْرب الطَّرّْ
لابُدّْ شِي نْهَار نَرْميوْلَوْسَادَة
نْقُومُو قوْمَة نَجْلِيوْ الشَّرّْ
مَلِّينَا منْ عِيشَةْ لَقْهَر

المريني ادريس
القصر الكبير بتاريخ : 08 / 06 / 2013

وسَّع خَاطْرك

وسَّع خَاطْرك

***********

وسَّع خَاطْرك يا لْمجْلي بين النَّاس
وْديرْ ب حْساب الرّْيُوس فِيها وْفيها
وْخُطّْ لَ لْسانَك حْدادَة عْبار وقْيَاسْ
وْلُوم نفْسك ايْلاَ انْت اللِّي تْعدِّيتِيهَا
وَحْذَر لاَ تْعُودْ سُوسَة تنْخُر السَّاس
لعْقُوبة صْعيبَة وحْدك مَاتْگَد عليها
نْخافك تسْكر يَاخُويا وتْكسَّر لْكَاسْ
والصَّحْوة تنْفر لَوْ غبْتي عْلِيها
**********
المريني ادريس
القصر الكبير بتاريخ : 07 / 06 / 2013

حالة شروذ ( 24 )

حالة شروذ ( 24 )

**********

كيف مُول لْكار
كيف مول لْ فَاس
اللُّولْ هضَّار
والثَّاني فسَّاس
السَّبْحة جْهَار
والسَّمّْ ينْداس
اللَّحية والنَّطعة
الرَّكعة ولْخلعة
والسَّجدة ب الدَّمعة
لْجو مبَخَّر
مْعطَّر
والضُّو شمْعة
والله يبارك فْ
سيدي بُوراسْ
طاح السَّرّْ ف گلْتة
وْمغْرقْش
حيتْ عوَّام
ودْيال لَعْوام
مايْمُوتشْ
جيفة أوْحْرامْ
فْزگْ ، تْحلّْ وتَّنْشَر
بين لَقْوامْ
وسْرا لَخْبار
مابِين الجِّيلالي
وْبُوسْلام
وحينْ يَقْوا لَكْلام
ليَّام الجَّاية يخْرج طَارْزَان
وحيتْ احنا كْشفْنا وفْهَمنا
غادي يگول : تانا فْهمْتُكوم
احنا شعب صبَّار
ناقصنا النَّجاحْ
ماخصّْنا بنانْ
ماخصنا تُفَّاح
غِ عْطينا التِّيقَار
وبايْباي يامُولْ لْكارْ

المريني ادريس
القصر الكبير بتاريخ : 07 / 06 / 2013

حالة شروذ ( 23 )

حالة شروذ ( 23 )

**************

درْدَب كْلامك لْمصقُول
وخلِّيه لَ اللِّي يفُكّْ لْغازُو
كْلامك ليه دْلالة ومفْعُول
قْلال فْحَالك رْجال دَازُو
آش يفهم اللِّي بيه مفعول
ضارب الطم  رْشا عُكَّازو
متْبكَّم فمُّو محْلول
مايعَجْبك فِيه غِ تنْقازو
بعد حْراكُو يْصير مَبطُول
مايْگدّْ يْطوّل تَركَازُو
يْتمتَم مايفرَّز لْقُول
ماداري شْعنْدو فْ مهْرازو
فْحال هاذا بْنِيه لَ لْمَجْهُول
وْخلِّيه فمُّو يْخرَّجْ بْرَازُو
المريني ادريس
القصر الكبير بتاريخ : 07 / 06 / 2013

شروذ بحذر

شروذ بحذر

*******
لومني نخرجك مني
مانلومك ولا تلومني
لومنك لو تملكني ؟؟
هههههههههه
تخرج عليا وتهلكني

المريني ادريس
القصر الكبير بتاريخ : 05 / 06 / 2013

حالة شروذ ( 22 )

حالة شروذ ( 22 )

**************

قْريتَك قْراية مبْهومة
وعصات عليا شفْراتك
كانت ناقصاني معلومة
صادفْتا فْ سيرة حْياتك
لقيتْها ظالْمة مشؤومة
مطبوعة هيَّ ف جْبهْتك

*********
المريني ادريس
القصر الكبير بتاريخ : 05 / 06 / 2013

حالة شروذ ( 21 )

حالة شروذ ( 21 )

*************

يوم كانت الرجال صامدة
كانو قرانك ف التكوين
ويوم صارت لشياخ قايدة
ولعوالم يفتيو ف الدين
كلامك ما عادت منوفايدة
ارحل ارحل يامسكين
المريني ادريس
القصر الكبير بتاريخ : 05 / 06 / 2013

حالة شروذ ( 20 )

حالة شروذ ( 20 )

*********
نبش فيَّا راني تاريخ
وعقلني فْ داخل دماغك
وحذرلا نهوى ونسيخ
كيف سايخة منَّك طْباعك
لو رايد بيا تلطيخ
أو رايد نركع لجنابك
جيبلي نجمة م لّْمرِّيخ
بلاها مانضْرب حْسابك

المريني ادريس
القصر الكبير بتاريخ : 04 / 06 / 2013

حالة شروذ ( 19 )

حالة شروذ ( 19 )

**********

هم الدنيا كثير
يا لمغروم ف بهاها
تضحك ليك ولغير
لاياخذك هواها
ركز ف التفكير
بين لْ أرض وسماها
لبارح ونت صغير
مالي كل رجاها
وليوم صرت كبير
آش فادك جناها
ايلا جنيت لخير
راك فزتي ب حلاها
ويلا جنيت الشر
لوم نفسك ف سعاها
*******
المريني ادريس
القصر الكبير بتاريخ : 04 / 06 / 2013

راسك سخون

راسك سخون

**********
شرَّقني ولاَّ غرَّبْني
أوحتى صنَّفني بدون
شطحاتك مابقات تجذبني
حتى وجودك مابقالو لون
ماعرفتيش كيفاش تكسبني
وماكرهتيش لوكنت ما نكون
انت عيبك رايد تكشفني
وآنا نحب نعيش مكنون
شحال حذرتك لا تخسرني
أو اتِّيه بيك الظُّنُون
خسارة مارمتي تسمعني
ظاهر لي راسك سخون
***********
المريني ادريس
القصر الكبير بتاريخ : 01 / 06 / 2013

حالة شروذ ( 18 )

حالة شروذ ( 18 )
************

كيف صبحتي يا هجالة لبلدان
كيف حال الراعي فيك والرعيان
كيف حال الساسة ومول لملاسة
وكيف حال جبالة عرب وسواسة
وكيف حال ريافة وشلوح ولماسة
وآش صبحو خوت ولا عديان ؟
كيف حال لكاوي ولمكوي
كيف حال اللي ماگاد يدوي
وكيف حال اللي ناوي يخوي
واللي حلم ف زمانو وباغي يبان
كيف حال لْمَلَكْ فيك والشِّيطان
أوَّاش دارو لغصَّاب الصبيان ؟
كيف حالك ياهجالة
كيف حالك مع التوالا
وآش صانوك
أو خانوك
ولاخذلوك وباعوك للعديان
كيف حالك مع ميزان الشطيح
واش زرع فيك ورد ولا شيح
راسك تفرشخ
تاريخك توسخ
شرفك تلطخ
لفساد فيك فرخ
عاد فيك الناصح مزيزن
ولمنصوح طرشان
وآش نكفكف دموعي
ولا نزيد ف بكايا
ونتيه ف الطرقان

المريني ادريس
القصر الكبير بتاريخ :01 / 06 / 2013