للإسْقَاط ( 5 )

للإسْقَاط ( 5 )

************

فَاجْأتْني ياصاحِْبي كْتابْتك

وَرْماتْني فْ بْحَر مَعْزُولْ

كُنْتيِ لِي قُدوة بَ سْلامْتكْ

طيْحكْ منْ عِينِي لْمرْسُولْ

لاَ تْمَارَسْ عْليَّا وْصَايْتَك

وْلاَ تفْتيلي وآشْ نْقُول

راني حُر قْبل سِيَّادْتك

مُخِّي سْليم ماهُو معْلُول

بْلَغْت الرُّشْد قْبل وْلادْتكْ

وْرآنِي خََابرْ كِيفْ نْصُول

شْهامْْتي ماناقْصة لَ شْهامْتك

يْلا تْقاضِينَا عنْد لَفْحُُولْ

مَا محْتاج آنَا لََ شْهادْتََك

أوْ منَّك دَرْسْ فَ لْ أُصُولْ

يَاحَسْرة ضِيَّعْتي مْكانْتَكْ

وْكِيفْ كُنْتي قْبَلْها مقْبُول

سامَحْني يلاَ لْيُوم صَارحْتَك

نْقُولْ : بْنيتَك لَ لْمجْهُول

************

المريني ادريس

القصر الكبير بتاريخ : 12 / 03 / 2014

هْدِيرْ لْخَلْوة

هْدِيرْ لْخَلْوة

**********

قْبل ماتَطْلع شَمْسَك يْغَرَّبها

ذَاكْ الظَّالم نْكاية فِِيكْ

مْوَقَّفْ رَاسُو يَحْجبْها

هُوَّ لْحَاكم بْ أَمْرُو عْلِيِكْ

انْت لَّ مْصَالَح

لَ نْعام والطّاعَة

وْهُوَّ الصَّالَح

رَاعِي لمَنْفعَة

لْ راسُو مَاشِي لِيكْ

يَحْيا سِيدْنا لْفَاهَم

عَاشْ لْفسَاد

يَسْقُوطْ الصّْفَا

غِي شْمَعْتك ماتَطْفا

فْتِيلتْها بْهَا وَوْفَا

ولِّ دارْ عْليه اللهْ عْفَا

سَطَّرها لْفاهَم ، وظَّبْهَا

**********

المريني ادريس

القصر الكبير بتاريخ : 02 / 03 / 2014

الجَنَّة تَحْتْ قْدامَك

الجَنَّة تَحْتْ قْدامَك

**************

حَگْرتيها وْماعْطيتْها قِيمَة

وْلَولاَهَا مَاتْناسْلت أَجْيال

بْلاها لَحْياة عْديمَة

يالسَّايب يَاقاَطع لَوْصَالْ

الرَّبْ خْلقْها حْكِيمة

وجْعلْها شْقيقة لَ رْجَال

حمْلاتك فْ ظَلمة بْهيمَة

فَ بْطنْها وْغذَّاتَك شْحَال

وضْعاتَك ونْتَ لْقِيمَة

وْطعْماتَك حْليبْها حْلاَل

تْحُضْنك دِيمَا بْ تَبْسِيمَة

وتْهَزّْ كْفُوفْها لَ لْعَالْ

تََطْلبْ لَكْ حْيَاة سْلِيمَة

تْكرَّر وتْعيد السُّؤالْ

تَرْجَالك عِيشَة كْريِمَة

مصْحُوبة بْ راحَة لْبَال

سُبْحان منْ خْلقْها رْحِيمَة

رَحْمتْها تْذُوّب لَجْبَالْ

نفْتاخَر بِيكْ يا امِّيمة

وفْ عِيدكْ نْردَّدْ مَوَّالْ

لُولاًكي يَا لَعْظِيمَة

الدَّنْيا ماتَسْوا مَثْقَال

الجَنَّة تَحْتْ قْدامَك

عارْفِينْها حتَّى لْجُهَّالْ

*****************

المريني ادريس

القصر الكبير بتاريخ : 03 / 3 / 2014