الجَنَّة تَحْتْ قْدامَك

الجَنَّة تَحْتْ قْدامَك

**************

حَگْرتيها وْماعْطيتْها قِيمَة

وْلَولاَهَا مَاتْناسْلت أَجْيال

بْلاها لَحْياة عْديمَة

يالسَّايب يَاقاَطع لَوْصَالْ

الرَّبْ خْلقْها حْكِيمة

وجْعلْها شْقيقة لَ رْجَال

حمْلاتك فْ ظَلمة بْهيمَة

فَ بْطنْها وْغذَّاتَك شْحَال

وضْعاتَك ونْتَ لْقِيمَة

وْطعْماتَك حْليبْها حْلاَل

تْحُضْنك دِيمَا بْ تَبْسِيمَة

وتْهَزّْ كْفُوفْها لَ لْعَالْ

تََطْلبْ لَكْ حْيَاة سْلِيمَة

تْكرَّر وتْعيد السُّؤالْ

تَرْجَالك عِيشَة كْريِمَة

مصْحُوبة بْ راحَة لْبَال

سُبْحان منْ خْلقْها رْحِيمَة

رَحْمتْها تْذُوّب لَجْبَالْ

نفْتاخَر بِيكْ يا امِّيمة

وفْ عِيدكْ نْردَّدْ مَوَّالْ

لُولاًكي يَا لَعْظِيمَة

الدَّنْيا ماتَسْوا مَثْقَال

الجَنَّة تَحْتْ قْدامَك

عارْفِينْها حتَّى لْجُهَّالْ

*****************

المريني ادريس

القصر الكبير بتاريخ : 03 / 3 / 2014