قلبي وقلبك

قلبي وقلبك 

 
انت قلبك جاح وجياح ، رجع يقلب فلقراح

انا قلبي مرتاح ، يهوى لهوى ، يهوى لفراح

انت قلبك كحل ، قلبك قطران ، مثخون بلجراح

انا قلبي ابيض حليب ، قلبي راويه نسيم الصباح

كيف يتلاقا الحبيب ، والطليب ليه ذباح

كيف يسكت الكلب عال السارق من النباح

كيف يبرا من سهام كلامك اللي صابتو بعد لجراح

كيف وكيف وكيف ، كيف يعمل اللي ماقراش سوارو فللواح.

المريني ادريس

 

مشكل احتلال الملك العام

السلام عليكم ورحمة الله

من ابرز القضايا التي تؤرق المواطن القصري والمواطن المغربي بصف عامة

قضية احتلال الملك العام والباعة المتجولون ومشكل السير والجولان داخل المداران

الحضرية .
إن مشكل احتلال الملك العام هو على الصعيد الوطني تلقى المسؤولية الاولى فيه
على عاتق السلطات التنفيذية منذ أوائل الستينات بالدرجة الأولى يتبعها المواطن .
السلطات التنفيذية بتسامحها مع الظاهرة من طور النشأة
أي منذ بداية الترامي على الشوارع والأزقة في ستينيات القرن الماضي.
ولنتكلم عن حالة مدينتنا لأننا عايشنا الظاهرة منذ الصغر.
ان اي مولود يولد له مراحل يمر بها ومنها كي يترعرع
إلى ان يشتد عوده ويشيخ .
الفرَّاشة 1
البداية انطلقت من قبل أفراد عددهم برؤوس الاصابع
إن أحصيناهم ، شباب ابتدؤوا ببيع اللوازم المدرسية
كاقلام الحبر واقلام التلوين ومستلزمات اخرى تابعة
وكان ينادى عليها ب " الريكلام.. الريكلام "؛
الكراريس 2
انطلقت البداية بثلاثة 2 بياعي الخضر والثالت بياع الفواكه.
عند هذه النقطة كان من الواجب أن تتفطن السلة التنفيذية
لها وتحاربها من الأساس. " كان مازال الشغول حدو قدو وخفيف ".
المسألة اليوم تختلف وهي واقعيا اصبحت جزءًا منه وتحولت المسؤولية
من على عاتق السلطة لتتمركز على عاتق المواطن الذي أصبح هو بمثابة
صاحب الحطب وبكلتا يديه يدلي به وسط " الكانون " حتى ولو بدون شعور
او بصفة عفوية بل منهم من إضطر لذلك. بصفة او باخرى
الصفة الاولى " التقشف ( التكعليلة ) " الصفة الثانية محدودية الدخل ( الله غالب آالطالب ).
إذن ماهو الحل الذي قد يؤتي أكله ؟؟
الحل هو الإمتناع عن التسوق من الباعة المتجولين .
لماذا (علاش زعما )؟؟.
هنا اسمحوا لي أن أستبدل الفصحى بالدارجة المغربية ديالنا.

هذوك الباعة المتجولون بشْحالْ ماباعليك راه رابح فوق خنونتو حيت

ماكيخلص لافرنك ولاموزونة لدار الضريبة

وماكاري لاحانوت ولا هْري وحتى الصَّنْكْ يمكن يتجنبو

وربما السلعة اللي عند مول الحانوت اجود من مول الكروسة أو هي نفسها

الفارق في الثمن هو أن مول الحانوت مسكين كيخلص الضرائب والضو ويمكن

حتى الما وعاد الطريفة مفروضة عليه وواجب عليه يعلقها بحيث أذا امتنع على الما

والضو غادية الوكالة تخليه في الظلمة وبالعطش ، والضريبة إذا ماخلصهاشي

غادية تجمع عليه تكثر وتكبر وترجع القتة كبيرة اما يبيع حوايجو " شي ملك مثلا "

او أثات أولا يديواه ْ ( للسجن ) "لمدرسة المشاغبين

" وبعدها السيزي " قولوا الله يستر .


فوائد الامتناع من التسوق من عند الباعة المتجولين اولها >

كنساهم في تقلص عدد الباعة ونقصانهم حيت غاديين يضطروا ينسحبوا

بلهلا يجزيه لهوم .

ثانيها هو انني اذا تسوقت من عند مول الحانوت غادي نكون ساهمت

بشكل كبير في مساعدته على تحسين المدخول ديالو باش تاهو يلقى باش يأدي

مستحقات الضريبة وتسديد الفواتير الاخرى.

ثالثا ذاك الشي اللي تسوقتو من عند مول الحانوت مضمون ويمكن اذا لقيت

السلعة خاسرة نرجعها ليه أو نواجهو بيها عند المسؤولين في القسم الاقتصادي والصحي

((ماشي فحال المتجول يبات مايصبح )).

ندوزوا دابا لاصحاب احتلال الملك العام الثابت موالين الحوانت والمقاهي ووو.

هذاك مول الحانوت تاهو اللي محتل نصف الرصيف نوكل امره للسلطة الزجرية

هي تتولى امرو واذا ما اتردعشي تاهو نقاطعوه .

المقاهي > اغلب رواد المقاهي خصوصا ذوك اللي كيجلسو بارزين (( في الصدر ))

وكيختاروا الرصيف باش يتقهوى وعينو مركزة على الطالع والهواد وكل همه هو

يجبد ملف كل واحد داز من قدام المقهى وكيعقد جلسة لمحاكمتو غيابيا لدرجة ان اطلق

اسم السكانير على ذاك الصماط ديال القهاوي ابتداءا من مقه اجيال الى مقهى بشرى.

لدرجة ان اللي بغا يعرف ويتأكد من راسو بأنه ماكايتعينشي (( مهند )) معصوم من العين

يجرب يدوز من قدام هاذ الصماط ديال القهاوي ....اذا وصل لشارع محمد الخامس سالم

غادي يكون معصوم من العين .

وماشي رواد المقاهي كلهوم من هاذ النوع ...لا لا كاين اللي عندو مواعيد وكاين اللي

كيفضلها لتناول وجبة الفطور .......... وهذوا هوما اللي كنوجهلهوم نداء باش يقاطعو

ذوك المقاهي .


يتبع.............

عند الفورة يبان الحساب

السلام عليكم ورحمة الله


غادي نبدا على بركة الله بشي كلام يمكن يكون صواب
يمكن غي هترفت فيه ومع ذالك كنقول انا ماشي كذاب
كلام خرجتو بالحرقة وطرقتو بالمطرقة
كلام عفوي ماشي شاحت وميدوم بلا مرقة
كلام موزون ومن لساني خرج ماشي ديال الزنقة
كلام بغيتك تقراه وتوعاه راك ماتلقاه لافي كتاب ولاورقة
ايوا سمع مني وتيق أولا كَاع لاتيق انا بعدا فيا ماتبقا

روي عن شيخ مدينة مسخت في عهد الخلافة المحلية
قال حدثني ابو أخي الذي افتقدته حين ضاع في الجوطية
قال حدثني حارس من علماء الاحزاب المتشذقة بالمرجعية
عن سارق المسروق
أنه بينما ذات يوم في السوق
إذابه يسمع نافخا في البوق
يصيح باعلى صوتو ويعوق
وآاعباد الله فاينكوم وآسمعوا راه ماباقينش تسمعو كلام الخير
ولا حتى بعويناتكوم تشوفوه في مدينة القصر الكبير
قال ليكوم سيد الحاكم ديالنا ذاك المشلم
راه لابد كل واحد منكوم يعلم
باللي غي شبعتكوم كذوب وتفليت عليكوم
وخدمت عليكوم فقيه صالح وضحكت ليكوم
وأنه كما ورد في الأثر أن ولاد عبد الواحد كَاع واحد
مافيهوم ماتختار أسي المختار ولا من يراعي همومك أو يكابد
هزكوم الما الوقت تبدلات وتساوى الفقيه مع السفيه
لاتغرك نطعة على الجبين ولاسبحة في اليدين 
ولا بلغة صفراأو بيضا قالوها الناس اللولين
ولا حتى جلابة من حرير او من السوسدي الرفيع و الثمين
واش مافراسكومشي باللي يبليس لاح سوارتو
وباللي عداد من الفقيا مشاو فحقو يتوارثو

بغينا نعرفوا واش حنا فمدينة القصر الكبير عايشين
ولا فقطاع غزة نابتين
نهارتخليونا بلاضو غير مبحصين
ونهار تخليونا بلا ما حلوقنا ناشفين
بغينا نعرفو واش انتوما خوتنا او بيناتنا مدسوسين
واش مسلمين بالصح آنيت او غي مزورين
علاش انتم فينا تعدبووضحكانين
وحنا تتنتقطعوا ولا فيكم قلب حنين
ياقلوب الكاياص والحجر المتين
فعايلكوم ولافيها ريحة المسلمين
فعايل وعمايل ولاد تسعة رهطين
فعايل وخصايل شالوم عليها انتوما متفقين
لاخير فخياركوم كلكوم متساويين
شوفتونا النجوم فعز النهار وشوفتوه حتى للعاميين
نعاجكوم غلبو ذيابنا وعتارسكوم بالحيلة والمكر قويين
لكن قالو ناس زمان عند الفورة يبان الحساب وينفضحوا الخداعين
ياك المكسي بمتاع الناس عريان والكاري خاوي ولو لسنين



يتبع.....