سُوقِي

سُوقِي

*******

نتْسوَّق حرفي منِّي
وْمَ الجَّنْ لِّ ساكنِّي
حرف يطيعني
وحرف يْهينِّي
حرف يطْلقني
وْحرف يعصَّرني
سوق راسي هذا عاجبني
ونت مالك تابعني
يالساني ومزاحمني
على قلة لحروف
ف هاذ الجوف
ولاَّ غي راكبك لخوف
سْرح فيا وْشوف
ياك لِّ ماشْرا يتنزه
وعلى د لْغيريسْمُويتنزَّه
ها لحرف الصافي
ها الدافي
ها اللي يزند لعوافي
ها الرطب يشافي
ها لقوافي
ها لْحرف لموضَّر
ها اللِّي ماعندو جْدر
حلّْ عينيكْ يا لْساني
فْ سُوقْ راسي وْساومْني
اخْتار مايوالمك
يناسبك
ويطيَّب خاطرك
يالساني أوْ اعْذرني

***********
المريني ادريس
القصر الكبير بتاريخ : 12 / 10 / 2013

مُولاةْ لْخَال

مُولاةْ لْخَال

*********

ماشَافتْ عيني غَزال
كيف هاذيك مُولاةْ لْخَال
مشْيتها رنَّة خُلخَال
دلْفتْها تفيَّق لهْبال
وتْحيَّر عقْل لْعُقَّال
لوْ ريتْها ماشْية تَخْتال
متْبُوعة بْ آلَفْ زلاَّلْ
يخْطرْ فِي بَالَكْ سُؤالْ
عْلاَشْ مانبْعَثْلاَ مرْسَالْ
يْلا جَانيِ جْوابْها فََ لْحَال
نَهْدِي لْها آلَفْ مَثْقَال
وْحتَّى لِّ ماخْطَرْ فَ لْبَالْ
ياكْ النَّظْرة فَ الزِّينْ حْلاَل
وعْليهْ كَا تْحْماقْ رْجَال
كِيفْ لْعزْري كِيفْ لْهجَّالْ
لاَ اطَّلْبُو منِّي مُوحَالْ
وتْقُولُو نْسَاهَا وارْحَلْ
جدِّي ماراهُوشْ هْزَلْ
كيفْ يمْكن عْليهَا نغْفَلْ
وْطيفْها مْعشَّشْلي فْ لَخْيَالْ

**************
المريني ادريس
القصر الكبير بتاريخ : 09 / 10 / 2013

وْكِيلْ لْويلْ

وْكِيلْ لْويلْ

***********

طلَّلْت عْليك لْقيتَك غَافلْ
عَ لِّ داروك عْليهُوم وْكيل
لهْمُومْ النَّاسْ راكْ تتْجَاهَلْ
كْلامْهُوم لْيُوم عَادْليكْ ثْقِيلْ
كنْتي مَحْسُوب قْبلهَا عَاقَلْ
تارْني لعْقل عْليك دْخِيل
لْميزَان عنْدَك طَالَعْ نَازَل
مايتْسَاواشْ عَنْدك لْكِيل
ماسُمْتي لْنَا غِي لمْهَازَلْ
وَلْبهْرجَة مْصاحْبَة تَمْثِيل
السِّيَّاسَة وَدّْها صَايَلْ
قَارِي لمْتُون بْكلّْ التََّاوِيلْ
وْمَا الرِّيَّاسة  ، تبْغِي وَاصَلْ
لَْ همْ الشَّعْب يعْطَف يْمِيلْ
مَاشِي نُقْمَان كْلامُو بَاسَلْ
غِيرْ التَّهْريج وَلْ أَقَاوِيل
وَكْلاَمْ اللِّيلْ  قَالُو بَاطَلْ
عًندُومْ عْليه حُجَّة وْدَلِيلَ
مَالَسْعارْ م لْفُوقْ هَاطَلْ
الجِّيبْ بْكَا مَانفْعُوعْوِيلْ
لَحْملْ ثْقاَلْ
يَاوْكِيلْ لْويلْ

*************
المريني ادريس
القصر الكبير بتاريخ : 08 / 10 / 2013

سَرْحَة فْ لجْنَابْ

سَرْحَة فْ لجْنَابْ

*********

گلَّسْتيني فيَّا وْقلْتِي لي اسْتنَّا
ومْشيتِي تْفرّْقِي لْغَاك عْلى غِيرِي
آنا لِّ تْقاسَمْت مْعاكْ شْحالْ منْ مَحْنة
لْ حين ربِّيتي لجْناح عوَّالة اطِّيرِي
نَسْتاهَل كِيَّة تْوضَّحْلِي لْمَعْنَا
تْغَرْبَل حْلاَمْتِي تْصَحِّي ضْمِيرِي

******************
المريني ادريس
القصر الكبير بتاريخ : 06 / 10 / 2013

تَگْرِيعَة

تَگْرِيعَة

**********

لْحكُومة صارت مهزلة
فيها شِي رْباعة جُوهالا
اصْواتهوم ديما تتْعالا
بْ قَوْلة نعم ماشي لا لا
خايفين الزعيم بوحْمالة
اللي حايزهوم ب لكفالة
يسوسهوم وسط لمرحلة
الزعيم عندوم راجل معصوم
نبي مرسول ل شلا قوم
هو الناهي كلامو مفهوم
هو لباهي سرو مكثوم
غيرو ظالم هو مظلوم
هو لقدر قضاه محثوم
هو وحدو يوجه اللوم
اللي عارضو
أولا ناقضو
يكون مصيرو لمزبلة
لحكومة ياناس مهزلة
لا صوت فوق صوتها يتعالا
هي الرايدة
هي لْقايدة
هي الجَّايْبة لينا لْفايدة
الشَّعْب كْلَمتُو غي زايْدة
مْخاخُو شبْعاتْ عَطَالة
تْوشَّحت وْشاحْ لْبطَالَة
الشَّعْب آخُوتي راهْ تْوضَّر
ماقادْ يْلاجَجْ أَوْ يَهْضَر
خَايفْ يْصيغُو ليهْ محْضَرْ
مسْكين مرْهُون دِيمَا مْعَصَّر
عْلَى وَضْعُو راهْ يتحسَّر
مْحايْنو ماتْغسْلُوم غَسَّالَة
كيفْ رْيافَة كِيفْ جْبالَة
طيفْ عْليهُوم تَا دُكَّالَة
همْنا واحَدْ حَالْتُو حَالة

*****************
المريني ادريس
القصر الكبير بتاريخ : 07 / 10 / 2013

خِيرَة

خِيرَة

***********

عْيُونَك تْهبَّل
ياكَحْلة السَّالفْ والظَّفيرة
رْموشْها تْخبَّل
لعْقل ولْقلب مْعاك فْ حِيرة
خلاَّوني ننْزلْ
نْطُوف بْ قَدَّك نْودِّي الشْعيرة
فيكْ نتْغزَّل
يآلسَّمْرة لالَّة مُولاَتي يَا خِيرَة
نَاوي نرْحَلْ
نْدير جُولَة وَسْط ذََاتَكْ لَوْثِيرَة
رَانِي مْعجَّلْ
لِيعْتِي بيكْ ليكْ مطْرُوحَة فْطِيرَة
بْغيتَكْ للهْ تَطْفِي نَارِي
جْمار حُبَّك طامْسَالي لَبْصِيرَة
ايْلا شَفْعاتْ ليَّا شْعَارِي
مْعَ قْوَالِي آتيني بْ تُرْيَاقْ جْبِيرَة
أوْسْمعْتي عَزْف وْتَارِي
بَعْثِيلِي منَّكْ يْشَارة وَمْعَاهَا تبْشِِيرَة
رَاني لايَحْ عْليكْ عَارِي
علاَّ وْعَسَا يْحرَّكْ فِيكْ نَار لْغِيرَة
ونْقُولِّيكْ ماقَالِّي جَارِي
عشْق الزِّينْ حْرِيرْتُو حْرِيرَة

****************
المريني ادريس
القصر الكبير بتاريخ : 03 / 10 / 2013

هْديَّة لْذَاك لْمَزْرُوبْ لِّ فمُّو مثْقُوبْ

هْديَّة لْذَاك لْمَزْرُوبْ لِّ فمُّو مثْقُوبْ

***************
بشْحَال كْراوَكْ يا بَحْلاسْ
عْطَاوَاكْ طَاوَة وْگلاَّسْ
وَنْتا يََا مضْرُوبْ للرَّاسْ
شْكُون قُولِّي داَركْ عسّاسْ
تبْلَزْ بلْزاتْ بْلا قْياسْ
نْگسْتي گاعْ طْريقْ النَّاسْ
ياحْلاَسَة فِيكْ لْوسْواسْ
مانْتَ غِي عْريفَة وْلابَاسْ

*************
المريني ادريس
القصر الكبير بتاريخ : 02 / 10 / 2013

عامْ عْلَى عَام

عامْ عْلَى عَام

*************

عامْ عْلَى عَام
نفْس لحْكَاية
نفسْ لكْلام
لْهضْرة ب لْعُرَّام
ولْمعْقُول اللهْ يْجيِب
فينْ غادْييِن بِينَا
خْوا الجِّيب
نْشفْ الضّْراعْ
وْمازَال لْمصَّان هوَّ لْمصَّانْ
بَانْ لْقَاعْ
مابْقا غِي التَّخْتْ ولْغِيسْ حَاتَل
وَكْحَل الرَّاسْ فيهْ وَاحَلْ
حتَّى اللِّي كَانْ عاقَلْ
جْهَل
تْكلَّخ
وْطَارْ لِيهْ لْفَرْخْ
بَ لْهمّْ والتَّخْمَامْ
عامْ عْلَى عَامْ
وحْنا مْخاصْمِين مْع لْقُدَّامْ
عَازْفِين غَارْقِين فَ الصّْيَامْ
طالْقِين الصَّريمَة وُ اللّْجَام
داَرُو مَابْغَاوْ
بْنَاو وْعَلاَّو
رْشَاو وَاتَّرشَاوْ
ولْفَاهَمْ حِيثْ فْهَم
جْمَع لفْهايْمِيَّة وَفْتَاوْ
بْ عَفَا اللهُ عمَّا سَلَفْ
سُبْحَان اللهْ وذاك الشِّي اللِّي تَلَفْ
واللِّي عْليهْ تَّهَرَفْ
عْلَى منْ نْحسْبُوه
وْمنِّينْ نْجبْدُوهْ
عامْ عْلَى عَامْ
وْمازَالْ تْعَرِّيكْ ليَّامْ
يَاقنْدِيلْ الظْلاَمْ

************
المريني ادريس
القصر الكبير بتاريخ : 02 / 10 / 2013

عِلمُها عندَ ربِّي

عِلمُها عندَ ربِّي

******

منْ ذاكْ لْكُدية طاحَتْ لَمْنامة
تْهرّْست وطارو شْقُوف لحْلامة
وبنْ سيرينْ ماجْبر مايقفَّل
لاحْ التَّفسِير وتْعاطا لَّ حْجامة

*********
المريني ادريس
القصر الكبير بتاريخ : 28 / 09 / 2013

سُبْحَان منْ لايسْهَا

سُبْحَان منْ لايسْهَا

*********
دَازْعَ لَّقْصيدة
حْسبْها صَابَة فَ حْصيدة
وْصار يْذرِّي فْ لحْرُوف
تْشعْتر لكْلامْ
ومْشاتْ لمْعَاني بْعِيدَة

**************
المريني ادريس
القصر الكبير بتاريخ : 28 / 09 / 2013

ربِّي يَخْلَفْ

ربِّي يَخْلَفْ

********

طَاحَتْ لَحْرُوف
فْ ضايَة لَقْصِيدَة
وْماهي عوَّامَة
اتَّحْرگْ السّْطَرْ
مَ لّْخوفْ
عْليهَا وْهيَّ وْليدَة
عينْ لَمْدَادْ تْشُوفْ
وْماگَادَّ لَقْلَمْ يَدْمَعْ
أَوْ يْطلَّعْ تنْهِيدَة

***********
المريني ادريس
القصر الكبير بتاريخ : 28 / 09 / 2013

بِينِي وْبينَكْ

بِينِي وْبينَكْ

********

گول عليا نگول عليك
قطَّع فيا نشرَّگ فيك
ياك حنا غِ عرب
تجمعنا زريبة
فيها حْبيبة
وْعصير عْنبْ
ياك حنا غِ عرب
كلامنا كذوب
فعالنا نا تْلاَوي
ينفخنا لخاوي
ويْفشّْنا السَّماوي
ريقنا كيماوي
وصرفنا جمرة خبيثة
تزندنا تزغريتة
تطفينا بخَّة من گْليتة
يخذَّرنا دولار
يستغبينا شفَّار
ف كل موسم يبْني عقَّار
وْشُوف فيَّا نْشُوف فِّيك

***********
المريني ادريس
القصر الكبير بتاريخ : 29 / 09 / 2013

يَالايَمْنِي

يَالايَمْنِي

********

يَالايَمنِي عَ لَّغْرام
ومانْت ذاري لِيه
لحُبّْ ماهُوشْ حرام
ايْلا نْتايَا جرَّبتيه
تشْرق شمْسُو ف ظْلام
لْقلب ينوَّر بيه
يصيْرو كِ عش حْمام
لْحَنانْ وَالدْفا مَالِيه
ايْلا نْتَ قلْبك مضْيام
بَعَّدْ خُويا لْذَاك الجِّيهْ
وْسمَّعْني صَْلاَ وسْلاَمْ
وَجْهك عنِّي ذَارِيهْ
كنْتْ نْحسْبك مَقْدَامْ
وحْصنْ لهْوا غَازِيهْ
خابْ ظنِّي فيكْ ياهُمَامْ
طْلعْتيلِي جاهَل فِيهْ
وَسْمعْ منِّي ذَا لْكْلاَم
ايْلا نْت فْهمْتي مْعانِيه
مادُمتِي قاصَر ياغْلام
طْريقِي بعَّدْ عْليهْ
خلِّيني فَ هْوا لَرْيَامْ
يَجْلينِي ولاَّ نَجْلِيه

*************
المريني ادريس
القصر الكبير بتاريخ : 30 / 09 / 2013

مَاشِي بْعِيدْ

مَاشِي بْعِيدْ

*******

شلاَّ ماتذْري يامُوسى
لْعين تبْكي دْموعها دمّْ
ولْقلْب خَارْطاهْ السُّوسَة
لاما يْوخَّر لاما يْقدَّم
النَّخْوة ف ذاتْها محْبُوسة
مَغْلُولة تْكابد لْهمّْ
ولْحقّْ سْرايْرو مَطْمُوسَة
شْكُون يدْوي أوْ يَتمْتَم
وَلوْ بْ حجَّة ملْمُوسَة
زْمان الشِّيخ وْلَمْقدَّم
والتُّهمَة واجْدة مدْرُوسَة
تَا لْقَاضي ماكانْ يحْشَم
لحْكَامْ جَايُّو بَ لْكمُّوسَة
طايَعْ لسْيادُو وَ يْعظَّمْ

************
المريني ادريس
القصر الكبير بتاريخ : 30 / 09 / 2013

آشْ وجَّدْتِيلُو ؟

آشْ وجَّدْتِيلُو ؟

*******

ياللِّي بحُبّْ الدُّنيا تْعادا
وآش جْنيتي شي يْفادة
شْحال جمْعتي ولمِّيتي
لحْتيه وْراكْ ومْشِيتِي
صرْطك لقْبر يَاهَاذا
مامنْعاتو غْلاضَة
وْماهمَّاتُو قرْفَادة
وحْدكْ غْريبْ
لاوْنيسْ لاحْبيبْ
حتَّى وَلاَ وْسَادَة
كنْتي فْ همَّة وْشَان
نَاشِي زَاهِي سَكْرَانْ
تَاوي بينْ لْخِلاَّنْ
جْواري وعْبِيد
وَرْكاوِي نْبِيذْ
ورْيام راقْصة تتْهَادَا
ماوَعْظكْ شِيبْ
وَلاَ اللِّي صارْ غِيبْ
ف لقْبَر ماتْفيِد مْناصَب
وحْدك لْيُومْ تتْحَاسََب
وَعْلى زلاَّتَك تتْعَاقْب
مَاليكْ عْليه سُلْطَان وَلاسْيادَة

**************
المريني ادريس
القصر الكبير بتاريخ : 30 / 09 / 2013