لَجْوَادْ

لَجْوَادْ 

*********

قالوا لجواد
هوما مَّالين لبلاد
وعلاش لاَّ يا لولاد
الله يقوي حُرم لفساد
شايلاَّه آبلاد لعبيد ولسْياد
التَّسْليم التَّسْليم لْبُوزرواطة ولعگَّاد
دْوا ليحتجاج ولْعناد
واللَّي قلَّش
يتْكمَّش
لا يْرجّْعُوه طُعْم التَّصْياد
ويبْقا ف لْواد طالع هوَّاد
شْحال منْ داوي رجّْعُوه زِيزُون
غي بْجُوجْ كلْمَات ف التِّيليفُون
هزُّوه ورَّاوَه فينْ يْكُون
وَاكَل شَاربْ تمَّا معْفُونْ
حتَّى سلَّمْ ليهُوم وانْقَادْ
التَّسْليم التَّسْليم يا بَنْ عيَّادْ
راكْ غِي مُعتمِد بنْ عبّادْ
وْهومَا طارقْ بنْ زِيَّادْ

***************
المريني ادريس
القصر الكبير بتاريخ : 27 / 09 / 2013

تْسَرْسِيطَة

تْسَرْسِيطَة

********
لا تعوج عليا قمُّونتك
مانا راجل امُّك ولا خْتك
انا وريتك عيبك ونبَّهتك
ياك الصاحب للصاحب مْراية
يلانت موسوس لآشْ گاعد حدايا ؟
روح بين لْمدَّاحات دير بْلاصتك

********
المريني ادريس
القصر الكبير بتاريخ : 22 / 09 / 2013

أُحِبُّكَ

أُحِبُّكَ

*********

تْحَطّْ لكْلامَ فُوق الرَّف
وْطاح منُّو حرف
تاه وتْخلَّف
وبقات لقصيدة تولول
وتهبط حناكها
كان فيها سطر متحف
يطرب لحبيب ويشنف
مْسامْعو ويْخفَّف
عليه لوكان كْتاب قْراها
ضاع منها لْ أَلِِِفْ
مرْفُوع الرَّاسْ أُوَاقَفْ
سابَق لْحَا ف التَّصْنْيفْ
لْبَا ولْكَاف مْعاهَا

***********
المريني ادريس
القصر الكبير بتاريخ : 23 / 09 / 2013

رِثَاءُ قَصِيدَة

رِثَاءُ قَصِيدَة

*********

مَ گواهَا لْحَرُوف مآطَّلَّعْ تنْهِيدَة
باكْية تْوَرْوَر شَاهْقَة عَ لَّفْراقْ
ماظَّنت بعْد شْهاقْها تتْيتَّم لَقْصِيدَة
وتْهِيم شَارْذة بينْ سْطُورْها لْعُشَّاقْ
صْهِيل لَحْرُوفْ سَرْبة للتّْبَوْريدَة
وْلقْلاَم مْكَاحَلْ بَارُودْهَا حَرّْالسْماقْ
ولْحَرْكة مْعَاني مْزرّْدة فَ جْرَيدَة
شْجآرْها مَحْلاَه ْ مَغْرُوسَة فَ طْبَاقْ

***********
المريني ادريس
القصر الكبير بتاريخ : 24 / 09 / 2013

وقْتَاش تْعفُّو

وقْتَاش تْعَفُّو

*******

وَقْتاش تْعَفُّو
ضْبرتُونا
وْمازَال فِينًا تْنتْفُو
شْنقْتُونا
وْما بْغيتُو تْرخْفُو
قْهَرتُونَا
وْما نْويتُو تْعَطْفُو
ازّمَتُّونَا
اللِّي جْهَرْ بْ همُّو
رَعْرعْ بْ فمُّو
واللِّي قلْمُو سَطَّرْ حَرفُو
زْطَمْتُو ليهْ عْلى جَوْفُو
حَرْف بْ حرْف عْليه اطُّوفُو
نْسِينا لَبْنِي بَاقِي جْدِيد
مَازال فْ طُورْ التّشْيِيدْ
وْبَاشْ يَتْوطَّدْ وْيصْمَدْ
خَصُّو يْكُونْ زايَدْ حْدِيد
وَالرِّيح قْبل هْيَاجْها تَهْمَد
وَقْتاش تْعَفُّو
شْحَال وحْنَايا شادِّين الصَّفّْ
تْسًوَّقْنَا حُرِّيَّة بْ سْقَفْ
دِيرْمَابْغِيتِي وعْرَفْ تَهْضَر
فْتحْ عِينيكْ فَ الضُّو لَحْمَر
يمْكن تَجْذَب وْتتْحيّر
تْعرَّا يْلا بْغِيتِي وَاتَّسْتَر
وَفْ قَلْبَك غيَّرْ لْمُنْكَر
اصْبرْ لَزْيَادَة لْ أَسْعَارْ
لاتَنْعَتْشِي لْواحَد شَفَّارْ
كُنْ صبَّار فْحَالَّحْمَار
وَحْضي لْسَانَك لايََعْتَّر
ماكَايَنْ ماسْهَل منْ مَحْضَرْ
وْهانْت مهْزُوزْ فِينْ تَغْبَرْ
وَقْتاش تْعَفُّو
وَْعَ لََّكْراسَا مَا تتْنَاتْفُو
بْحُورنا نشْفُو
خْواوْ مَ لّْحُوتْ
والنَّاسْ مَازَالََة فِيهَا تْمُوتْ
فهّْمُونَا عْلاشْ آالْخُوتْ
وآشْ مَامنْ حقّْنَاش نْعَرْفُو ؟
لْقلبْ طابْ
 وْطابْ حتَّى لْقاعْ
بَ التَّخْمَام وْلگْعَادْ
لْبزْطَام جَاعْ
وْباضْ فِيهْ لگْرَادْ
لَگْدَمْ اتّْشَقّْ طَالَعْ هَوَّادْ
والشّْبابِْ ادَّاهْ لْوَادْ
بْلادْ وَآشْ منْ بْلاَد
فِيهَا حدَّادْ
وَبَّارْدِي
وشْحَال منْ بَانْضِي
رْجَانا فَ اللهْ آولْدِي
اتّْفُو
يْلاَ مَا بْغِيتُو تْعََفَّو
مَانعْطيوْكُومْ سْلاَمْ مَانْگَرْضْفُو

*************
المريني ادريس
القصر الكبير بتاريخ : 25 / 09 / 2013

تَغْرِيدَة

تَغْرِيدَة

********

كُلّْ علاَّل فْراسو هْبال
وكلّْ جلُّول يردَّد موَّال
فَ دْهالزْ مْنامُو يحْلمْ
يمنِّي راسُو ب آمال
ويْكرَّر السُّؤالْ
ايمْتا تْجي الصَّابة
نجْنيو لغْلال
ايمْتا يعفُّو النَّهَّابة
يْهلَّلْ لهْلال
وْيكْثر لَحْلاَل
ايمْتا نَرگُدْ ونْفِيقْ
وسْط الطّْريِق
بْلاَ حْريقْ
مايْشفَّرْني شفَّار
مايَغْدرني غدَّارْ
وَلاَ يَحْگرْني حَگَّار
هَا لْعَارْ
ايمْتا يلْبسْنا التِّيقَارْ
ايمْتا تْزول لغْمامة
وتتْحقَّق لَحْلامة
تْرفْرف جْنيحَات لَحْمَامَة
وَذْكرْها زَاهِي يهْذل بَالسَّلاَمة
عاضّْ بْ منْقَارُو زيُْتونََة
لُونْها اخْضر مَنْ غْصُونَا
ونْقية ماهي معفونة
يْشايرْ منْ فُوق لجْبَال
وْحينْ تْجَمْعُو الرّْجَال
جلُّولْ فَاقْ عْلى صُوتْ برَّاحْ
صَايَحْ يْنَادِي صدَّاحْ :
يَاجَلُّولْ لا تَحْلَمْ بَ لْمُوحَالْ
وْيَََا عََلاَّل زِيدْ فْ لهْبَالْ
دَبَا يْجِي دَابَا ؟؟؟؟؟ لِيسْتِقْلاَلْ

***************
المريني ادريس
القصر الكبير بتاريخ : 21 / 09 / 2013

هدية للزجال الكبير احمد المسيح

هدية للزجال الكبير احمد المسيح

*************

مولاي احمد لمسيَّح
مول لحرف لمْحيَّح
حرف منو مْنضَّدْ
يْوگَّضْ
وحرف منو يْطيَّح
ايْلا گلستي احْداه
وتْمعَّنتي لْغاه
راك ف جْنان مريَّح
حرْف ورْد
يَجْلَبْ السَّعد
وحَرفْ زْهر
يْفيحْ عْطر
ولْمعْنى شَلاَّل
هطَّالْ
هابطْ مْكفَّح
حتى وْهوَّ ماكَايَنْشْ
ديمَا حاضَر مْصَحْصَحْ
وَاگفْ عَلّْ الصَّحْ
بَلْسَانْ عْرُوبي فْصِيحْ
يْوضَّحْ
يْشرَّح وَيْملَّحْ
وْهاوَجْهي هَاوَجْهُو
ايْلا كَنْت كَ نَمْزَحْ

**********
المريني ادريس
القصر الكبير بتاريخ : 21 / 09 / 2013

الله يرحمك يالوالدة شحال وصاتني وقالت :

الله يرحمك يالوالدة شحال وصاتني وقالت :

اللِّي تْشهِّيتِيها كُولْها
واللِّي وافْقاتك ديرها
واللِّي ضرَّاتَك قِيلْها
اللي سْمعتيها كْثمها
تَا يْجي وقْتا وْخَرَّجْها
بَّاك هوَّ ظهرك
ايلا ملْتي يْسنْدك
وخوتك هوما ركابيك
ايلا فشلتي يهزُّوك
امّْك وْخالتك فْراشك وغْطاك
وتَّا مَابَاقِي انْت وْزهْرَكْ
يا يْلمُّوكْ يَا يْلاَوْحُوكْ

***********
المريني ادريس
القصر الكبير بتاريخ : 19 / 09 / 2013

اللهْ غَالبْ

اللهْ غَالبْ

*********

سرحت عيني ف شي ناس
هم الدنيا عليهوم طاغي
حر الزمان كواهوم بلاقياس
وعلى ريوسهوم حاكم باغي
ماكاين غي لقصارة ولكاس
مع لعگالات والشماغي

***********
المريني ادريس
القصر الكبير بتاريخ : 20 / 09 / 2013

تَرْجيعَة

تَرْجيعَة

******

تفكَّرت ايَّامي مْعاك يا بنت النَّاس
وحطِّيت لكْ سْلامي قُبْلة فْ كاس
شْكُون قَصَّح گلْبك منْ جيهْتي
وْعمَّرْلك لفَّادْ ب لْوسْواس
ايْلا انْت شْربْتي سْلامي
راني لاباسْ

**********
المريني ادريس
القصر الكبير بتاريخ : 21 / 09 / 2013

الفَابُورْ

الفَابُورْ

*******

حاجة وحدة بْلاشي للشَّعْب
لْمهْراجاناتْ وْسُوق اللَّعب
اللِّي بْغا يشْطح ولاَّ يجْذب
وعْلى لْخدمة گاعْ ما يْقلَّب
يْكُون صُوتُو للنَّاس يطْرب
الشُّهرة تْحوم عْليه مايتْعب
قالو لغْنا يْجيب لْفايْدة
والرَّكْزة مْعاه تْكون زايْدة
فُوقْ لْمَايدة لُوَّزْ هَايْدَا  =  ( هَكْذَا )"  كِيمَا هُكّْ "
عنْد لْفينَال تَغْرَفْ لْمَالْ
يَسْطع نَجْمَكْ يْفُوت لجْبَالْ
ترْجَع مَحْبُوب وْغِيرْ طْلَب
***********
المريني ادريس
القصر الكبير بتاريخ : 20 / 09 / 2013

من رباعيات قصراوية

من رباعيات قصراوية

**************

كاين اللي تْقرْقب عْليه سْوارت الرّْبح
وْكاين اللِّي تْقرْقبْ عْليه مْقافَل لَخْطيَّة
اللَّوَّل بَ فْعايلو يخلِّيك فَرحَان تشْطح
والثَّاني بََ زْبايْلو مايْورِّيك غيرْ لعْميَّة

**********
المريني ادريس
 
من رُباعيَّات قَصْراويَّة

*************

آحّْ عليك ياقلْبي وْماهازّْ
هْمُوم من حرّْها يحْشمْ الجّْمَر
مَ ثْقلْهَا الرَّاسْ فْقَدْ التَّرْكَازْ
قُرْصَانْ عوَّام وَدَّاهْ لَبْحَرْ

***********
المريني ادريس
القصر الكبير بتاريخ : 19 / 09 / 2013


من رُباعيَّات قْصْراوِِيَّّة

****************

لْحرْف ايْلا شَاخ يْعود حَكْمة
ايْلا لْقا منْ يْفهمُو
ولْعبد ايْلا شَاخ يْعُودْْ هَرْمَة
لامَنْ يْحَضْنُوأَويْضَمُّو

**********
المريني ادريس
القصر الكبير بتاريخ : 20 / 09 / 2013

دَنْدَنَة
**********
شفْت الشَّمس متْزوّْجة النهار
والليل من بين حريمو لْگمرة
سبحان من تسبحلو حجار وطيار
زارع الرُّوح ف جْذُور الشَّجرة

***********
المريني ادريس
القصر الكبير بتاريخ : 22 / 09 / 2013

حالة فايسبوكية

حالة فايسبوكية

*******

فرگع لحيا
وما استحيا
ف حضور لحاجب
واللحية
طامع ف لعفو بلاشقية
وآنا نحذفو دغيا دغيا

*********
المريني ادريس
القصر الكبير بتاريخ : 19 / 09 / 2013

زجل باللهجة الشمالية

زجل باللهجة الشمالية
*******
الدَّعْوى اللهْ

**********

أبْيَاطِي أبْيَاطِي   = ( سعدي وفرحي )
أنا نقيّْل نْطاطي
ف الزنقة نبيع لمناطي   = ( الكَاشَّاتْ )
وهي ف الدار تشاطي
أبْيَاطِي أبْيَاطِي
مْقَابْلاَلي غِي لمْشَاطي
وقْتمَا ندْخُل للدّار
تْلاَغِينِي : آالبُوحَاطِي
وآش جبْتي مْعاك غْداك
ولاَّ جيتي ملاَّطِي ؟
أبْيَاطِي أبْيَاطِي
خَاكُوم راهُو فْ حِيرَة
مْراتِي كِِي لَخْمِيرَة
ما اطَّيَّبْ ماتَعْجَن
ماتَكْنسْ ماتْصَبّن
مْعيّْشاني غِي فْ لَعْفَن
ايْلا قُمْت أنا نْزغْنَنْ
كَتْلَوَّحْلي بْ لَكْفَن
أبْيَاطِي أبْيَاطِي
يمَّاهَا مْتافْقَة مْعَاهَا
زايَدْها بَابَاهَا
خْتَاهَا وَحْبِيبَاهَا
يْوقْفُو جَنْبَ حْدَاهَا
أبْيَاطِي أبْيَاطِي
أنا نقيّْل نْطاطي
ف الزنقة نبيع لمناطي 
وهي ف الدار تشاطي
راني حرافتلي معاها
لله وصْفُولِي دْوَاها
وآش نْسَلَّم لْيهَا
أوْ نَخْلي دارْ بُوهَا
خَاكُوم اصْبحْ مْوَاطِي
فْ يدِّي غي زُلاَّطِي

*************
المريني ادريس
القصر الكبير بتاريخ : 19 / 09 / 2013

ايْلا بْخاطري

ايْلا بْخاطري

*********
ديرني وسطك تعميرة
وكي لبارود طرطقيني
ولا تشايري عليا بتشييرة
راني ماساهلش تورطيني

**************
المريني ادريس
القصر الكبير بتاريخ : 17 / 09 / 2013

طاحت الظلمة وسط لكاس

مهداة للاستاذ عبد القادر احمد بنقدور المعتقل السابق

خلال سنوات الجمر والرصاص والذي لحد الساعة لم ينصف

ولم يفتح تحقيق حول ملابسات اعتقاله في ظروف غامضة

****************************

طاحت الظلمة وسط لكاس
ولْعطشان كحَّل بْ لعْما
كان معروض بين الناس
يستنَّا الدُّور بْلا زحْمة
جاه لْمرسول من ذاك الرَّاس
من عند النَّاطق ب لْحكمة
عطاه قلم زادولقرطاس
وشْوشْ ف وْذانو بْشي كلْمة
لْگا ف جْنابُو جُوج حرَّاس
بْلا مايَقرا لْمزْغُوب فَرْما
جات صطافيط فيها عسَّاس
حين طلعها ركّْبوه اعْما
عرف راسُو مْشا في تَرَاسْ
من بعد لحكام قطع النَّعمة
مسْجون وْحيد وسْط آسَلاَّسْ = ( الظلام )
ذنبو لوحيد گايَلْ كلْمة
من هاذي سنين زمان لْقُرطاس
دارولو الضُّو قطْعولو لْما
وماهو شيطان ولا خنَّاس
احمد بنقدور كيف النجمة
كانت ساطعة منّْ لْ أَساس
طلْقُو سْراحو وسْط لْعتْمة
بعدْ مادْماغُو اتَّحْرگْ وتْسَاسْ
عيا مايحتج هنا وتما
كولشي نكْرو وعْليه تْسَاس
لله ذرَّك يا عبْقادَر
مازَال ف نْخوْتك تْكابَر
ماشفْت مثْلك واحد صَابرْ
وْللْمظلُوم ديمَا تْناصَرْ
فوَّض أمْرك لْ رافع السّْمَا
ينزل نْقمْتو عْلى كُلّْ دسَّاسْ

***********
المريني ادريس
القصر الكبير بتاريخ : 17 / 09 / 2013

مابْقَا مايَعْجَبْ

‏

مابْقَا مايَعْجَبْ

*********

ضَارتْ النَّقْشة

واتَّطرحْ سَُؤالْ

كانْ الجّْواب فَرْشَة

ل صْحَابْ لْحَالْ

ليَّامْ عَمْشَة

ولْوقْت هْبَالْ

اللِّي كَانْ خَنْشَة

رجّْعُوه سَرْوَال

السَّر اتَّفْشَا

فَ غْيابْ الرّْجَال

*********

المريني ادريس

القصر الكبير بتاريخ : 18 / 09 / 2013

تْهدْريزَة

تْهدْريزَة
********
داوي حالي يالذاوي
وگول عليا كلام سخون
جيبو أرضي ولا سماوي
ولا من خارج لكون
قولو انتايا أو الراوي
ماتلا يهمني وآش يكون

**********
المريني ادريس
القصر الكبير بتاريخ : 18 / 09 / 2013

بْلاَ جَذْبَة

بْلاَ جَذْبَة

********

لله يامول الزاوية
ولكلمة الساوية
وزن وسامي
الذيبة عاوية
ولحالة طاوية
لگلب دامي
مابقات محبة
مابقات مخاوية

**********
المريني ادريس
القصر الكبير بتاريخ : 18 / 09 / 2013

حالة شروذ ( 41 )

حالة شروذ ( 41 )

**********

وخَّا لْفتْوى قالَتْ حْرام
دَرْتي فْراسَك ماتذْري
حلِّيتي سَالْفَك ياليَّام
وسْدلْتي شْعُورك عْلى زهري
كبَّلْتيه درْتيلُو لْجام
عْلى اللِّي شَايطْ منْ عمْري
لْزَمْتِيني نَرْفَعْ عْلاَم
بْ لَبْيَضْ وَنْسلَّم أَمْرِي
حَتَّى يْلا جََانِي لْحْمَام
وآش يَمْكن ليَّا تْغفْرِي ؟
ايْلا كانْ جوابك نْعَامْ
نرْجَاكْ لاتْولْجي مْعايَا قَبْري
يكْفي ماذُوَّقْتِيني فْ صُغْري

***********
المريني ادريس
القصر الكبير بتاريخ : 18 / 9 / 2013

الله يْسهَّل

 الله يْسهَّل

*******

كلامك زبدة وعسل
وعلى مقاسي مْفصَّل
وآش منك ولا مْسَوّْقاه
غزْلك راهو يهْطل
عليا حين نطل
عليك ونت قايلاه
لله يابنت لخالة
مولات لوشام ولخالة
ولفم ديما مسوّْكاه
ياك ما طامعة نحصل
راني فايت مطلوب
لجارتنا ومخطوب
غير سدي ذاك لقفل
حاسبة راسك عذرا
ونت كيف لبگرة
مالايقة غي لشي عجل
انا بالله والشرع
راسي معاك اتَّفْرع
لاتخلِّيني نجْهل
شفْتك بيَّا كَ ضُّوري
وآنا ماعَنْدي كُوري
ولا مْربِّي شِي فْحَلْ
كلامك زبدة وعسل
وعلى مقاسي مْفصَّل
روحي الله يْسهَّل

**********
المريني ادريس
القصر الكبير بتاريخ : 17 / 09 / 2013

شْهمْتُونِي

شْهمْتُونِي

*******

طْرشْتيني يافطُّومة
بالزيادة لمعلومة
زدتي ف ليصانص
ولمازوط
باغياني نبيع لكبوط ؟
راني مزلوط
ويَّامي مكْلومة
يالْحُكُومة

*******
المريني ادريس
القصر الكبير بتاريخ : 17 / 09 / 2013

اعْتِرَافْ

اعْتِرَافْ

********

بْياضْ گلْبك خِيطْ م لَّفْجَر
ولْبسْمَة وْشَامْ عَْلَى ثغْركْ مَرسُومَة
كُلّْ يُومْ فْ عِينِي رَاكْ تَكْبَر
وتتْرسَّخ فَ دْمَاغِي عْليك مََعْلُومَة
كِي نْشُوفَك حْرُوفِي تتْوضَّرْ
گُدَّامْ قَامْتَكْ تنْسَاحَبْ بَحْشُومة
تتْوارَا عْلَى طْريقَك وْتسْتَوْخَر
ماتْواجْهَكْ بَ عْتَابْ وَلاَ حْتَا بْ لُومَة

***************
المريني ادريس
القصر الكبير بتاريخ : 16 / 09 / 2013

شكون لمسؤول

شكون لمسؤول

********

دخَّلتوالشعب ف غيبوبة
ودمجتوه ف قاموس كان
خلقتكوم ماعادت محبوبة
وسبابها واحد بن كيران
الشعب كلمتو محجوبة
ماتتعداش لبرلمان
ل أجوبة واجدة مكتوبة
شكون لمسؤول آسي فلان ؟

***********
المريني ادريس
القصر الكبير بتاريخ : 16 / 09 / 2013

بْغينا لْمُكايسَة مَاشِي لْمُقَايسَة

بْغينا لْمُكايسَة مَاشِي لْمُقَايسَة

*********

طلعناكوم تتكايسو
على الشعب وتنفسو
سديتو ليه تنافسو
وصرتو على تطْواعو تتنافسو
هالمقاصة
هالمُقايسة
وفيناهي لمُكايسة ؟
آش هاذ لخواض
هذا راه لمرض
ماشي السياسة
بزاف عليكوم
ماتستاحقوش الريَّاسة
جامع لفنا محتاجة نجوم
ومالاقياش فحالكوم
فيكوم لكوميدي
فيكوم الزرايدي
ولعنايدي
فيكوم لبكاي
ولوشاي
لحاصول منكوم ماكايناشاي
طلقونا بكلمة باي باي
آش تگولو للشعب ايلا ناض
دجاجتكوم قرّْقَت
وفرُّوجْكوم باض
هاعار الله ايْلاما تْساسو

**********
المريني ادريس
القصر الكبير بتاريخ : 16 / 09 / 2013

لَعْجَبْ

 لَعْجَبْ

*******
لا تبْكي لا تنْذب
وعليَّا انت تكذب
ف شْروقي قبل مانغرب
اكيدْ باغي تمثَّل
عْلى لْعزَّاية وْتسْتغْفل
وتْقُول فْقدتْ لْحُبْ
أنا ماشي ليك
وْمَا عمّْري كَنْت
شْحَال وضَّحْتَا ف حْضَرْتكْ
وطْلبْتك بَاشْ تَسْكُت
ونْت عاجْبك تتْبوْحَط
غَاوي تشْقا وْتتْمَرْمَط
هَذا هُوَّ لَعْجَبْ

************
المريني ادريس
القصر المبير بتاريخ : 15 / 09 / 2013

نصيحة لله

نصيحة لله

*******

قال واحد لمْجَرَّب
اللِّي بْغا يهْدم ويخرَّب
أويتْفرْكت ويتْخرَّب
ماعْليهْ غِيرْ يتْحزَّبْ
لْهمْزة عْليه تْقَلَّب
يْلاَ كْتَاب واتَّنْتَاخَبْ
نْعَمْ عْليه لْحِزْب
وسْخَط عْليه الشَّعبْ

**********
المريني ادريس
القصر الكبير بتاريخ : 15 / 09 / 2013

اللهْ يطْعمْنا حْلالْ

اللهْ يطْعمْنا حْلالْ

*********

ايْلا مقدَّر مكتاب
ف لْماضي ولْ آتي
نجعل منَّك محراب
نصلِّي فيك صْلاتي
ونديرك ليا كتاب
نقرا فيه حياتي
انت ياعز لحباب
ياللِّي سْكنتي ذاتي
لو كلامي غاب
ينطق بيك سكاتي
أو يصيبني عذاب
تْكوني انت جنَّاتي

**********
المريني ادريس
القصر الكبير بتاريخ : 15 / 09 / 2013

شُوفُو الظَّالَمْ

شُوفُو الظَّالَمْ

*********

طبَّگْني زْمانِي ورماني
لاحْني عْلى جنبو مْشنّْكة
كان يْگولِّي انتيَّا عْياني
حين كنت ف شْبابي مْشيّْكة
ليوم شفَّا فيَّا عدْياني
وْجابْ وحدة مْعاهَا اتَّكَّا

***********
المريني ادريس
القصر الكبير بتاريخ : 15 / 09 / 2013

كُلّْهَا وْسَعْدُو

كُلّْهَا وْسَعْدُو

***********

عْطَاتَك ليَّام يآالضَّاوْية
كنْتي تْباتي طاوْية
فُوگْ تَشْرِيبة الزَّاوية
ولْيُوم عدْتي بْ لمْتَاوية
تْفرْزي لْعامْرة ولْخَاوْية
والشَّايْطة مَ السَّاوْية
خبْرِيني بَاللهْ عْلاشْ نَاوْية ؟

***************
المريني ادريس
القصر الكبير بتاريخ : 15 / 09 / 2013

هوَّ قلَّبْ عليهْ

هوَّ قلَّبْ عليهْ

********

شْحَال اتَّنفَخ وتْفشّْ
شحال تْعلاَّ وْتشّْ
مَ نّْهار كْلا الطَّرشْ
ما طنَّشْ وَلاَنَشّْ

***********
المريني ادريس
القصر الكبير بتاريخ : 14 / 09 / 2013

سعْداتْ اللِّي ماقْراشْ

سعْداتْ اللِّي ماقْراشْ

**********

ما فْ تَمَارَة غِيرْ لْفاهم
أما لْقبَّان نْعَمْ اللهْ عليه
شْحالْ قْرا وْكان حَازَم
فَ لْ أَخِير جَمْعُوهَا ليه
طَاوَاهْ كاغِيطْ وْقَالُو لازَمْ
گُدَّام لْقبَّة تتْفرَّش بِيهْ
ويْلا دْويتي يمْكن تنْدَم
تَّاكُل لعْصَا وتْبَاتْ لْهِيهْ
*********
المريني ادريس
القصر الكبير بتاريخ : 14 / 09 / 2013

لالة فطومة

لالة فطومة

***********

فطومة لهجالة
بغات تعمر الدار
مابان ليها غا مزوار
ماتلاش فاسد
ماتلاش شفار
عاد ليها فارس مغوار
ياك هو سيد لحرار ؟
مفضل على الجرار
اللي حرث شحال من شعبة
ب حْتَى لعبة
تقدم وْسار
وغبرلو لاثار
فذاك الدار
فطومة لمكلومة
قصتها مع شباط معلومة
بعد زواجهوم اطَّلْقُو
وعلى المعيور تفارقو
فطومة غي ولية
ماتتصنت ليك ولا ليا
هي عند الشيفور
سيدي لوالي مول لقصور
طايعة مرضية
مفطومة على نعام
ماتگول لا لا
*************
المريني ادريس
القصر الكبير بتاريخ : 13 / 09 / 2013

خرْجتْ خَاوْية

خرْجتْ خَاوْية

*********

هاهْ هَاهْ
جا اللي كنت نرْجاه
وْشي مَاجابْ مْعَاه
لاَ يمَّاه لابَابَاهْ

********
المريني ادريس
القصر الكبير بتاريخ : 12 / 09 / 2013

فِيكُوم رِيحْت الثُّومَة

فِيكُوم رِيحْت الثُّومَة

***********

النَّاس عنْدها حُكُومة
وحْنا عنْدنَا فطُّومة
تا فْ تنْزيل الدَّسْتُور
غَالْباها لحْشُومَة
بْلادنا رَاجْعَة اللُّورْ
عْرفْناها مَحْكُومة
كَ تَسْتنَّا الشِّيفُورْ
يَعْطيهَا لْمعْلُومَة
خْلاَصْ ماتْلَفّْ وَضُّورْ
فِيكُوم رِيحْت الثُّومَة
وَرْيايْكُوم مقْصُومَة

**********
المريني ادريس
القصر الكبير بتاريخ : 12 / 09 / 2013

سَعْدَاتِي

سَعْدَاتِي

********

باستني بوسة
ماباستهانيش لعروسة
خليتها فيا مغموسة
درتلها عساس ف قلبي
وخليتها فيا محروسة

*********
المريني ادريس
القصر الكبير بتاريخ : 12 / 09 / 2013

لهْلا يْثقَّل عْلى قَلْب

لهْلا يْثقَّل عْلى قَلْب

*************

بينْ لْبارح ولْيوم
واللِّي مازال عادْ جاي
قلْبي مْكدَّر مهمُوم
من وشْية الوشَّاي
يفْشي سرِّي لْمكْثُوم
وْيطْعنِّي فَ قْفَاي
لمَّا نْوجَّهلُو اللُّوم
يْقُولِّي صُوري بَايْبَايْ
عْليَّا مْقدَّر مقْسُوم
نْعوَّقْلك مَا تَرْجَايْ
نْعرِّيك وَلوْ فَ النُّوم
وَنْكرْهك تتْغطَّاي

**********
المريني ادريس
القصر الكبير بتاريخ : 12 / 09 / 2013

وَآاحْلِيمَة

وَآاحْلِيمَة

********

گادِّي ليَّّا لْميل يلا عْواجيت
وناوليني عصا باش نْعكَّز
وْلاتسوّْليني علاش طجِّيت
يْلا نا عْليك ماتْليت نركَّز
حْلِيمَة سامحيني يْلا ولِّيتْ
عْلى درْبُوگْتك نْهزّْ وْنرْكَزْ

***********
المريني ادريس
القصر الكبير بتاريخ : 11 / 09 / 2013

غْشِيمْ

غْشِيمْ

*********

قلْتْها ليكْ آسَلاَّم
وماسْمعْتِيشْ كْلامِي
لاتْهبَّطْش لَعْلاَم
ونْتَ زْگطْ حْمَامِي
عَوْدكْ بْلا لْجَام
وْقلْبك دَامِي
عْلاشْ آسَلاَّم
تْزرَّفْتي
وْزرَّفْتِي لقْوامْ
ونْت بْصِير مَاعَامِي

*********
المريني ادريس
القصر الكبير بتاريخ : 11 / 09 / 2013

عاشْ لْبَاطَلْ

عاشْ لْبَاطَلْ

*********

داير فيها بطل
فين ناوي توصل
زعما زعما
راك تما
شماعك شاعلين
وهوما لهيه
مليوحين
تحت الظلمة
ونت مول النادر
ولكرمة
وهوما عندك خماسة
وعلى جنانك عساسة
واللي مابندق
ياكل الدق
وتحرموالشدق
ويلا نطق
يشوف لويل
وشلا تأويل
من إرهابي ل عميل
أو يطلع غلطان
ف حق السلطان
التهمة لابْطة
ولعُدَّة شابطة
وهاهو حْصل
مايگدّْ يتْنصَّلْ
عز الله غوانتانامو
تْنسِّيه فْ ربُّو
فْ حزْبو
وْحتَّى امُّو
عاشْ لْبَاطَلْ
باش تبقا بطل

********
المريني ادريس
القصر الكبير بتاريخ : 11 / 09 / 2013

لَمْفشَّشْ

لَمْفشَّشْ

*********

اجْذب عْلى رحْبة سدري واتحيَّر
واختر ليك هْوا جِيلالي
راك عنْدي منقِّي ومْصيَّر
منزّْلاك فْ لمقام لْعالي
********
المريني ادريس
القصر الكبير بتاريخ : 10 / 09 / 2013

فَاتْ لْفُوتْ

فَاتْ لْفُوتْ

**********

كنتي فيا مدفيني
ياقلبي وخذاك لهوا
بغمزتها بدلتيني
وليت عندك مانسوا
وليوم عاد وحشتيني
ياخسارة مابقيت نهوا

**********
المريني ادريس
القصر الكبير بتاريخ : 10 / 09 / 2013

حَلْمَة يْتِيمة

حَلْمَة يْتِيمة

*********
تْوحَّشت عبُّون امِّي
وْراسي بينْ يدِّيها تفْليه
وتْوحَّشت شُونْها
لِّ كانْ بزْطامي
نْلُوح فيه لْفلْس وْنرْمِيه
وْهيَّ فَرْحانة ب ضمِّي
لَ سْدرْهَا نتْمحَّط فِيهْ
معاهْدك يا مِّي
نسْيانَك مانْگدّْ عْلِيه
***********
المريني ادريس
القصر الكبير بتاريخ : 10 / 09 / 2013

يَا سَمْرة

يَا سَمْرة

********

يَا سَمْرة ياهدْبة لَشْفارْ
يالِّ عْيونك مْضَامَ سْيُوف
قرِّيني منَّك سْوار
وْعلّْميني نغْزل لَّحرُوف
دلِّيلي ف كانُوني جمار
نشوَّط بيها ما ف الجُّوف
راني في أمْرك محْتار
ماجاني منَّك معْروف
وآنا لِّ معروف صبَّار
من همَّك رْجعت مرْجُوف
لاترْجاي منِّي تيقار
لُيوم تْقلْبت الظُّروف
حتَّى الذِّيب لِّ كَانْ مكَّار
عادْ لْيوم يْطِيع لَخْرُوف
يَا سَمْرة ياهدْبة لَشْفارْ
يالِّ عْيونك مْضَامَ سْيُوف
عصْفُوركْ منْ قَفْصيِ طَارْ
بيَّا لْيومْ ماعَاد يْطُوفْ

***********
المريني ادريس
القصر الكبير بتاريخ : 10 / 09 / 2013

السَّلامة وَسْتَر مُولاَنَا

السَّلامة وَسْتَر مُولاَنَا

**********

كَايِن لَمْرا
وْكايَن لَمْرار
اللَّوْلَة يْشُوفْها لْجَرحْ يبْرا
والثَّانية بْلاوْگِيد تشْعل فِيكْ النَّار
انْت تْرشّْ تَطْفِي الجَّمْرة
وْهيَّ غِي ماتَسْعرْ وْتَجْعَارْ

***********
المريني ادريس
القصر الكبير بتاريخ : 10 / 09 / 2013

مخْطُوفْ

مخْطُوفْ

***********

وصلني هدير گلبك
وماصدقت وذاني
كنت قريبة جنبك
ناظرة فيك عياني
كان شارذ خيالك
حرام عليك تنساني
**********
المريني ادريس
القصر الكبير بتاريخ :08 / 09 / 2013

نصيحة إرهابي تايب

نصيحة إرهابي تايب

*************

صْوا ف لقهْوة ولا ف لبار
ف السوق أو ف لكار
ايلا شي نهار
دخل شي واحد وكبَّر
نقَّزْهْرب بْلا ماتفكَّر
راه يطَّرْدَگْ
ومايبقا ليك أثر.

**********
المريني ادريس
القصر الكبير بتاريخ : 07 / 09 / 2013

مَادُّوخْشْ عْليَّا

مَادُّوخْشْ عْليَّا

*********

علاش هاز اللبدة
ياميت لكبدة
لاليك ركوع
ولا ليك سجدة
جايل بين الربوع
تفتش ع لگعدة
تتفشكر بين
الصهبا والشهبة
بلا أذان بلاتكبير
الربطة زغبية
ونت أمير
موسد شهبة مجبدة
ولكاس رقاص
لون دخالو نحاس
شكون تسوقلك بعدا ؟

************
المريني ادريس
القصر الكبير بتاريخ : 07 / 09 / 2013

مافِيهَا بَاسْ

مافِيهَا بَاسْ

*********

گالس بلاشغل
قلت نتسارا فيا
بغيت نهبل
ودرت النية
بديت نطل

لگيت لكية
وسطي تشعل
طارت عليا
عنگتني مابغات تنزل

*********
المريني ادريس
القصر الكبير بتاريخ : 06 / 09 / 2013

الزّْهَر لَمْكُوَّزْ

الزّْهَر لَمْكُوَّزْ

*******
زرعت لورد
وماجْنيت غير شوكو
اتْزلَّع السَّعد
ومالْحقني غي شْنُوكو

*********
المريني ادريس
القصر الكبير بتاريخ : 06 / 09 / 2013

وخَّا مْعَطّْلة

وخَّا مْعَطّْلة

*********

بْغيتك يا لفْقي
تضرب ليا لْخط
تْحنَّش وتْنقَّط
وتعطيني حقي
أنا ماطالبة والو
صورتي مابقات تحلالو
وخا هديتو خلقي
كان ساكن لي ف دخالو
كا يْدير اللِّي جا لْ بالو
عوَّر ليا حلْقي
وكْلا ليَّا رزقي
وقالِّي : بلا ماتْنطْقي
غرّْبي ولاَّ شرّْقي
وْعنْدي لاباقَا تْلحْقي

***********
المريني ادريس
القصر الكبير بتاريخ : 06 / 09 / 2013

مْع منْ انْتَ فِيهْ

مْع منْ انْتَ فِيهْ

***********

وخَّا تْصبْغو صْفر
دواخلك تفضحك
الجَّلد يهْضر
ولْعادة تْحاصرك
ياكْحل الرَّاس
ولْگلب بْلاقياس

*************
المريني ادريس
القصر الكبير بتاريخ : 05 / 09 / 2013

وآكْ وآك آالْحقّْ

وآكْ وآك آالْحقّْ

*********

طاح لحجَّام
وماعلّْقوش الصَّمْعة
خافو لْ إمام
يبقا بلا جمعة
خلاو لحجام طايح
دمو سايح
ومشاو عند ل إمام
واسَاوَه
وهوغارق ف لفضايح
فسادو عاطي الروايح
وعطاوه لوكالة
عنهوم ينوب
كلمتو هجالة
وكلها كذوب
يعفو على من شا
ويتوب
كولُّو يْدام
وْبَطْعَة  = ( اللّْبَابَة )

***********
المريني ادريس
القصر الكبير بتاريخ : 05 / 09 / 2013

هَنْيَة منَّكْ

هَنْيَة منَّكْ

**********
عي بغيتي
يتشوش خاطرك ويركبك الشك
وما ذريتي
وشاية لحاقد حطاتك ع لمحك
تشوهتي
حمدت الله كانت سبة باش نتفك
***********
المريني ادريس
القصر الكبير بتاريخ : 05 / 09 / 2013

اسْمع يا بَنْ كِيرانْ

اسْمع يا بَنْ كِيرانْ

*********

ماخصني بنان
ماخصني تفاح
انا باغي حنان
وْباغي نرتاح
ساويلي لميزان
تمم لْ إصلاح
ايلا بغيتي تبان
وتنال النجاح
خفَّض لْ أسعار
وبْدا ب لْبنْزين
وْنقَّص الدُّولاَر
لَ صْحابْ لْبَرْلمَان
وْحتَّى لْوُزَارَا
نْقصْلُوم لِيجَارَة
الشعب ليوم صحا
رايد كرامة
حالم ب فرحة
ب أمن وسلامة
يطالب ب الصحة
تتعمم تتساما
ملِّينَا مَ لَّفْساد
وكثرة لفهامة
شْفارة لقيَّاد
وْحتَّى شي عُولاَمَا
الشَّعْب ماعادْ قُبَّانْ  =  ( أُمِّي )
راهْ وَاعي ومْصَحْصَحْ
مَايلْهيه بنًانْ
مايْدَوّْخُو تُفَّاح

*********
المريني ادريس
القصر الكبير بتاريخ : 04 / 09 / 2013

خِطابُ لْخَريفِ العَربِِي

خِطابُ لْخَريفِ العَربِِي

**************

قايَدْ لعْرب خْطَبْ واسْهَب
وْقال ليكوم فيما معناه
أنا لْحاكم أنَا الرَّب
من طاعني وسْجد ورْكع
ينال مني تقْريب وْجاه
وْمنْ يعصاني أو يطمَع
ف لْكرسي تحْتي يسْلب
عنْدي ليه سخْطة وغْضَب
مَنْها الرَّاگد يتَّخْلَع
أنَا راعِيكُوم لحْكِيم
ماعْليكُوم غيرْ التَّسْليم
انْتُو عنْدي قُطْعان بْهِيم
نْشبَّعكُوم عَلْف وْبرسِيمْ
مانْحبْ مْعاكُوم نتْعَب
لِّ مْدحْني نَهْديه قْلادَة
وْنعْطِيه گْريمَة زِيََّادة
قَوْلي جَدْ ماهُوشي لعْب
يْلا نْتو آمنْتُو بَ الرَّبّْ

*************
المريني ادريس
القصر الكبير بتاريخ : 04 / 09 / 2013

حالة شروذ ( 40 )

حالة شروذ ( 40 )

************

جاتُو سكْرانة بلاخْمر
وْباحًت ليهْ بَ لْمكنُونْ
قالَتْ لُو نْحبَّك يالعْمر
بْلابيك آشْ يسْوا لْكون
لوكان تْحسّْني وتشْعر
نْحضْنك بَ شْفارْ لعْيون
نهْديك ياقُوتْ وْجوْهَر
لْ قلبي لِّ بِيكْ مَجْنُونْ

*********
المريني ادريس
القصر الكبير بتاريخ : 03 / 09 / 2013

رُومَانْسيَّة : عيار ثقيل

رُومَانْسيَّة : عيار ثقيل

*********

خاطبتْه بعد عودته :
طالت غيبْتك يا لحْسن
حتَّى رْجَع راسك كِ لمْسن
فأجابها قائلا :
مَ گْوايَا يا بنْت لمْعفَّنْ
مانتْزلَّغ وَنَتْمحَّن
النَّاس مْعاشْرَة زِينْ مْفنَّن
وَآنا طَاليهْ حتَّى لَّوْذَنْ

***********
المريني ادريس
القصر الكبير بتاريخ : 03 / 09 / 2013

حنين

حنين

********
علاش سافرتي بلارجوع
شي بكيتيه دم
وشي ذرَّفتي ليه الدموع
رحتي صم بكم
ماودعتي كره ولا طوع
لحال ظلم
وحاشي ليك تسيف جوع
لوكنت نعلم
كنت نطمرك بين الضلوع

**********
المريني ادريس
القصر الكبير بتاريخ : 03 / 09 / 2013

عُبَّاد لْمَالْ

عُبَّاد لْمَالْ


********
كان محبوب
ريحو ب لخير تصوط
كولشي فيه مربوط
نهار خطاه لبلوط
جفاواه الرهوط
خرمو ساسو
وهدو ليه لحيوط


*************
المريني ادريس
القصر الكبير بتاريخ : 03 / 09 / 2013

سُبحَان اللهْ

سُبحَان اللهْ

*********
عاد بان ليك فيا الضُّو
وحْلات ليك فيا الشوفة
وخَّا صْلاتي بلا وضُو
فوگْ هيضورْة لحلُّوفة

**********
المريني ادريس
القصر الكبير بتاريخ : 03 / 09 / 2013

لقْضيَّة حامْضَة

لقْضيَّة حامْضَة

*********
حلامتي حلمت ف حلمها
حلامة حالمة
طفات عليها الضو
وْقطْعَاتْ عليها لما
تبرا منها لقمر
وْحجّْرات عليها الظلمة
خاواها بوغطاط
دارها ليه گواد وزطاط
ومشات بيه توا للرباط
قاصدين سلطان الرگاد
لگاوه قْبَالْةْ باليما
حاضي لعاصمة
ف يدُّو عتْلة وْبالة
وْمشْموم عگَّادْ
لَ الطَّالع ولْهَوَّاد
صدَقة لَّ جْوادْ
لِّ قارْييِن وْدارْيينْ
ذنْبْهوم لْوحيد حْلامَة
عَاگْرَة
على فْراشْ حُكُومَة ؟؟  " ف".....
م... تاجْرة.

***********
المريني ادريس
القصر الكبير بتاريخ : 02 / 09 / 2013

ماتَمَّاشْ

ماتَمَّاشْ

********

هرست عليك لقاعيدة
بلا نتيجة بلا فائدة
لوكان عرفتا تمرميدة
مانميل جيهتك يافنيدة

**********
المريني ادريس
القصر الكبير بتاريخ : 02 / 09 / 2013

أُسْطورة النِّضَال الثَّقَّابِي

أُسْطورة النِّضَال الثَّقَّابِي

*********
فين مازال زايد
تعاكس خوتك وتعاند
وخا خذيتي التقاعد
مازالة فيك لولة لكوي
قناعك جلدة م لقنافذ
كلامك ديما سهمو نافذ
انت وحدك من يستافد
ديما مبلبل ديما تدوي
اللي خالفك ليه ماتكابد
ورا لمدير ديما لابد
هو الشاوش ونت لقايد
بلا حشمة ف الناس تشوي
عرفناك وظفتي جوج ولاد
وحتى خوك دگيتيلو وتاد
مُورالك طالع ماهوهوَّاد
وجَّدْ راسك قْريب يَهْوِي
لمُحاسبة جَايَّة تعْوي
ماعاد لك جهد ليهوم تغوي

**********
المريني ادريس
القصر الكبير بتاريخ : 02 / 09 / 2013

تْمرْمِيدَة وخْلاصْ

تْمرْمِيدَة وخْلاصْ

*******

عْلاش يا لْهاشميَّة
مابْقيتِيشْ تدِّيها فيَّا
وْحرَّمْتي فيَّا الشُّوفة
تْحضَّرتي يا لْبلْدِيَة
بدَّلْتي حَتَّى السّْميَّة
وقْلبْتي عْليَّا لْقُفَّة

*********
المريني ادريس
القصر الكبير بتاريخ : 01 / 09 / 2013

مَاشِي لْخاطْري

مَاشِي لْخاطْري

*************
شافني الشاف
وشفت فيه
شدليا لكتاف
وضرت ليه
لقيتو لحاف
تْفرَّشْت
وغطِّيت بيه

********
المريني ادريس
القصر الكبير بتاريخ : 01 / 09 / 2013

صرْخة مْلَطّْخَة

صرْخة مْلَطّْخَة

*******

لقيتيني حيط قصير
نقزتي عليه ك بغيتي
لقيتي مرادك فيا
تسورحتي كيف حبيتي
شفيتي فيا لغير
وطلعتي لفوق عليتي
نكرتي فعلك لحقير
وبكارتي اللي فظيتي
آش تقول ل ذاك لكبير
الرب لعالي يلا ماحشمتي
يوم لحشر يوم النشير

جوارحك شاهدة على مافعلتي
ونت ذليل خانك التعبير

***********
المريني ادريس
القصر الكبير بتاريخ : 01 / 09 / 2013

عْلاشْ تتْكبَّرْ

عْلاشْ تتْكبَّرْ

***********

مانْت بْدر ف كْمالو
ولاَّ يوسف ف جْمالُو
تعيب لْخلق وتجْحد لحقّْ
بآش من صفة تميَّز وتفْرقْ
مانت خالق
ولا رازق
اصلي واصلك تراب وطين
وما خانز مْهين
مهبطنا واحد يا مسكين
من ذاك لغار خرجنا كاملين
لآش تتحگَّر وتسْخر
من خلق الله تتْمسْخر
الزين ف لقلب
ماشي ف الصورة
سبحان من وْهبْ
بْلامْشُورَة
حاذَرْ ادُّورْ عْليك الدُّورَة
وقْضا اللهْ عْليك يتْصرَّف
بعْد مَا صُورْتك منْظُورة
تْصيبْها عاهَة كَ تْقَرَّف
تْعود بْرَزْتك محْظُورَة
وْمانْت قادَر تتْصرَّف
الجّْميلْ جْميلْ بَ فْعَالَو
تْرافقُو لَّ قْبر عْمَالُو
وْلخْبيث تْسفّْهُو قْوَالُو
يُومْ يتْفگَّدْ حَالُو
وْيَقرابْ آجَالُو
يلْقا راسُو غْريبْ
عشْرانُو عنُّو مَالُو

**********
المريني ادريس
القصر الكبير بتاريخ : 01 / 09 / 2013