الله يْسهَّل

 الله يْسهَّل

*******

كلامك زبدة وعسل
وعلى مقاسي مْفصَّل
وآش منك ولا مْسَوّْقاه
غزْلك راهو يهْطل
عليا حين نطل
عليك ونت قايلاه
لله يابنت لخالة
مولات لوشام ولخالة
ولفم ديما مسوّْكاه
ياك ما طامعة نحصل
راني فايت مطلوب
لجارتنا ومخطوب
غير سدي ذاك لقفل
حاسبة راسك عذرا
ونت كيف لبگرة
مالايقة غي لشي عجل
انا بالله والشرع
راسي معاك اتَّفْرع
لاتخلِّيني نجْهل
شفْتك بيَّا كَ ضُّوري
وآنا ماعَنْدي كُوري
ولا مْربِّي شِي فْحَلْ
كلامك زبدة وعسل
وعلى مقاسي مْفصَّل
روحي الله يْسهَّل

**********
المريني ادريس
القصر الكبير بتاريخ : 17 / 09 / 2013