مساجلات على الفايسبوك

زينب اوليدي

طليت من عين لميم
سكاتي سكين
فتوح ........في رحبة لهدرة
موسدة لعتبة
نتسنى الرجا
وميمي حلوة
بلية
جدبة
هبال
سميوها كيف بغيتو
وانا نسميها .........
حكررررررررررررررة

 ادريس المريني

 سميها على هواك

 وحنا معاك

 يالالة زينب غي لفتوح راه عندو شراك

 على گد الرحبة نرجاوها كيف رجاك

زينب اوليدي

  لفتوح سبع لوان 

حمر دم الجوف

 لي بيه نزمم لحرف وخضر بيه نحني كفوف اللواح

... لفتوح ابيض ملك سيدي عبد القادر الجيلالي

 يداوي حالي

 من هم الجدبة

 لفتوح صفر

 لالة ميرا لمخاوية رسامي

 لفتوح زرق سيدي موسى فاك لوحايل

 لفتوح كحل لالة ميمونة تلطف بي

 لعفو يا مولانا من حال الجدبة

 لعفو من ناس هزو لحرف من ودنيه

 لعفو يا مولانا 

راه لفتوح باسم الله نبدا

 وبيه نختم لواح لميم

 ادريس المريني

ياك لفتوح من باب الله 

كولشي يستناه

 ويلا غاب لفتوح

 تبرد الجذبة 

ولحرف يبكي يدير منذبة

 يعود يتيم يسرح 

ما يفرح ما يمرح 

لفتوح يرد الروح 

بيه القلب يبوح 

يهبط الحرف من اللوح

 يلوحو عال الجرح يبرا

 يجذب الحرف من جديد

 تهياج الحضرة 

وميرة تخرج من مرجتها 

تشفى من حالتها 

يزول ضرها تسكر بلاخمرة

يالله شكون گال يزيد قبل يوم العيد

المريني ادريس

يالله شكون گال يزيد قبل يوم العيد

عبد السلام البعليوي

يالله شكون گال يزيد قبل يوم العيد .........
 واشْ انْقَطْعو الحرفْ قَتْبانْ ولا كَُديد
 ولاامْحَنْشة واعْسَلْ واتْريدْ
 ولاَجيبْ يافَمْ وازيدْ

 المريني ادريس

 حَرْفَََكْ سْمَنْ وُعْسَلْ سَيدِِي عَبْد السّْلاَمْ
حَرْفَكْ مََيْدُُومْ ، نَاكُلْ فِيهْ وُنْزِيدْ
الْحَرْفْ إِيْلاَ تْقَطَّعْ مَعْنَاهْ مَايْفِيدْ
وُاللِّي بْغَا يْحَرْگُو ، يْسَخْنُو ، يْدِيِرُو گَدِّيدْ
لْحَرفْ لَمْطَرّقْ ، حْلاَوتُو، فْطْرَاوْتُو
وْمَا يَنْدَگّْ سْخُونْ غِي لَحْدِيدْ
لْحَرْفْ السَّاوِي يَصْقَلْ الصّْدِيدْ
يَجْلَخْ لْفَضَّة لْحَايْلَة ، وُالنْحَاسْ ، يَزْرَعْ فِيهْ الرٌّوحْ مَنْ جْدِيدْ
لْحَرْفْ دْوَا ، لْحَرفْ تُرْيَاقْ ، تْهَجِّينَاهْ فْلَمْسِيدْ
لْحَرْْفْ يْطُوَّعْ غْلِيظْ الرَّّاسْ ، وْلَعْنِيدْ
شْكُونْ يَعْطِينِي خُو كْلاَمِي يَكْرَمْنِي ، لَجْوَادْ گَالُولاَ كْرَامَة يُومْ لْعِيدْ

  عبد السلام البعليوي

كلامك أسيدي وخ كان شديد
غادي نجارِوَه وانشدو لَمْغَرْفة من اللِّيدْ
وانْحَرْكو الحَرْف منْ ابدا وجديد
خُو كْلاَمَكْ عندي ف الكََُُانَّة
مَرة إجيني مَرة انْتَبعوا أنا
ولا مَا جَبْنا الحرفْ امْوالمْ ما وتَنا
هاني راجع انقلب عل اصروف

المريني ادريس

وآلآوَآهْ ، بِينْ كْلاَمِي وُالشَّدَّة ، طْرِيقْ مْحََفَّرْ ، مَنْسُوفْ
كْْلاَمِي رْطَبْْ لايَنْ ، وَاضَحْ بايَنْ ، صْوابِي وُمْتَحَّفْ
عْلَى وَدٌّو، دَرْتْ التَّاوِيلْ ، شَدِّيتْ الصَّفْ
وْمَنْ سُوقْ رَاسِي ، تْسُُوَّقْْْتْ لَحْرُوفْ
فْلِِيتْهُومْْ حَرْفْ ب ْحَرفْ
عْبََََرْْتْهُومْْ فْمِيزَانْْْ بْلاَ صْرُوفْ
لْقِيتْ حَرْفََ ، مَنْ جْْنَابُو نَََاقََصْْ ،مََنْتُوفْ
عَاوَدْت لْفَلْيَانْ بَلْخَفّْ
كِِيفْْْ قْْرِيتُو بالتَّلْفَة ، شَدَّاتْنِي الرَََّجْفَةْ وُلْخُوفْ
تْْلاَََحَتْ يَدِّي لْشَعْرِي ، اللِّي فْقَدْتُو مَنْ صُغْرِي ،
 وُبْدِيتْ حُكّْ ، انّْْتَفْ ، بَينْ لْحَكَّة وُالنَّتْفَة
ضَاعْْلِِِِي لْحَرْْفْْ !!!!!؟
 وُعْلََى مََاتَرْجَعْ ، يَاسِيدَي عَبْد السْلاَمْ ،
 بَلاَّتِي نْقَلَّبْ عْلِِيهْ نْشُوفْ

عبد السلام البعليوي

ونَا مللي قَلَّبتْ عل الصَرفْ مع الحرْف
 . قَلتْ اش إوَالَمْ الحَطة 
دَخَلتْ لْحَنْطة .
 واطْلَبتْ الحرف ف البَطة 
لا يَبْطة .
 إجيني طَايعْ امْبَايعْ.
 انْحَطو عَنْوانْ لمَوْضوعْ.
 نَجْبَدْ لْجامْ وانْزَيَّرْ اسْروعْ .
 إما تخْتارو أنت ولا نَخْتارو أنا.
 وانْضَرْبوا بهْ المثل لَصْحابْ لْحالْ
 وللي فيهْ الحالْ إعطينا مَوالْ .
 هَاني فَالرَحْبة على باْب الله

 المريني ادريس

مَا گَلْتِي غِي اللِّي يْسُرْ وْيْبْشََرْ ،
 كُلْنَا عْْلَى بَابْ اللهْ ،
 وُاللَّي گََالْ غِيرْهَا
 يْشُوفْ آشْ خَلاََّو اللْوَالاَ للِِتْوَالاَ ،
 مَنْ غِيرْْ لْحََرْْفْ لَمْسَطََّر،
 شََلاَّّ مْثَالْ وُعْبَرْ،
 وُرْسََامْ ضْحَاتْ طْلاَلْْ وُخْرَََايِبْ ،
 مَاعَادَتْ تَنْعْمَرْ، 
 وْمَادَامْ غِي لْحَرْفْ ،
 وُحْْكَايَمْ بَتْواتَرْ تَنْذْكََرْ ،
 اللهْ اللهْ كُلْنَا عْلَى ذَاكْ لْبَابْ ،
 يَفْنَاوْ لَحْبَابْ وْلَصْحَابْ ،
 تَبْقَى الصْحَايْفْ شَاهْدَة ،
 لَحْرُوف مَنْهَا مَاتَنْمْحَا ، 
عْلَى طُولْ الدْهَرْ، يََفْنَا لَعْمَرْ،
 وْيَبْقَا لْحَرْفْ رَاسَخْ ،
 شَامَخ ْ، لْيُومْ النْشَرْ ،
 اللهْ يْطِيَّحْ قْضَانَا عْلَى حَرْفْ الرْبَحْ ،
 اللَّي مَايْبْْلاَ ، مَا يْخْسَرْ 
آَشْ گَََالْ سِيدِي عَبْدْ السْلاَََمْْ أُوََّ آاَشْ نْظَرْ ؟؟

البعليوي عبد السلام

للي زَمَمْتي مَا نْفيناهْ
ولاصَبْنا ليهْ عْدرْ
شَفْنا حَرْفكْ وقْريناهْ
وتبَّعناهْ سْطَرْ سْطرْ
مَا تَرْكوا اسيادْنا ما رْميناه
لكِنْ زْمانا فاقْ فيهْ الضَّرْ
أشْ نَسْواوْ الا ما عَلَجْناهْ
وقَلْمنا هَمُّو إحْضرْ
يَاكْ طْبَعْنا اليومْ نْسيناه
وتَحْرَقْ اليابَسْ مع لَخَضَرْ
عل بابْ 

سْقينا وفيدْنا ومْطرْ

المريني ادريس

 ضُرْْْْ زْمَانَّا حْنَا سْبَابُُو
حْنَا خْلَقْْنَاهْ وُرْْعِينَاهْ
هُوََ نَقَّا اهْلُو وُصْحَابُو
بَعْدْ كْبْرْفِينَا وْرَبِّينَاهْ
نَاسْ زْمَانْ مَايْتْعَابُو
وْكُلْهَا لْفَعْلُوغَادِي يَلْقَاهْ
اللِِّي كَانْ عْلِيهُومْ دَارُو بَسْبَابُو
وُلْبَاقِي حْسَابْنَا حْنَا مْعَاهْ
مُولْ الطَّبْعْ مَايْرَهْنُو مَايْبِيعُو
وَلََوْ انْعْدَمْ وْْفََرْْغَاتْ جْيََابُو
حْلِيبُو مََايْنَفْطَمْ عْلِيهْ وْلاَيَنْسََاهْ
اللهْ اللهْ ، لَخْْضَرْ لْيُومْ ، َيحْرَقْ لْْيَابَسْ
يْخَلِّي يْمََارْتُو فِيهْ عْلَى جْنَابُو
عْلَى بََابْْ اللهْ الْكُُُلْْ يَسْْْتََمْطَرْ ، يَطْلَبْ لْحَرْف وْيَرْجََاهْ
وْمُُُولْ لْقُُُدْرَة مَايْبْخََلْ بَجْْوَابُو
يْنَزَّلْ مَا يْشَا عْلىَ مَنْ يْشَا بْلاَجْدَاهْ
يْعَلَّمْ مَنْ جْهَلْ لْحَرْفْْ بَصْوَابًو
يْنََطَّقْْْ لَبْكَمْ يْْعُودْ يَتْْهَجَّاهْ
يْسَطَّّرْ لَكْلاَمْْ عْلَى تَرْْْتَابُو
يْْْشَكْلُو صْوَََارَمْْ أَوْرْمََََاحْ
يَصْْرََعْْْ الضَّرْ وْمَنَ جَا مْعَاهْ
وُمَّالِينْ لَكْلاََمْْ فْصَفٌّو يْْحَارْْبُو
يْقَضٌّوُ مْضَاجْعُو وْمَنْ وَالاَهْ
وَآنَا وِيَّاكْ مَانْتْعَاتْبُو
وُخْتَامْْ قَوْلِي لَمَّنْْ رْضَاهْ
عْلَى نَاسْ لْحَرْفْ گَاعْ يَتْحَابٌّو
بِصّْْْلاَ وُسْلاَمْ عْلَى رْسُولْ اللهْ
حَتَّى نرْمَسْ تَحْتْ تْرَابُو
وُسِّي عَْبْسْلاَمْ سْجَالُو مَحْلاَهْ
شْهَرْْ لْخِيرْ ، مْْْعَاهْ نَسْطَابُو
كُلٌ مَََنَََّا يََلْْغَا بَلْغَاهْ
ولْذا لَحْبَابْ كَيْنْصَابُواللهْ كلاَمَكْ نَتْرَجاهْ

عبد السلام البعليوي

سي ادريس لازم نرسليه جوابو
والله ارْحَمْ مَنْ خلاهْ
فَيَّقْ لْحَرفْ مَن ثرابو
وب المَعْنى سَواهْ
حَرَّكْ لَمْزيوْدة واقْرابو
واعْطانا مَن فن اللغَاهْ
واحنا جَادْ الله بلَكلامْ وحْرابو
كيفْ مَانْدَوَّقْ خويا مَحْلاهْ
ناسْ لَفْضل سارواو غَابو
وطْمَعْنا ف الخَيرْ مَازَلْنا نَرْجاهْ
هذا حَالْ دَنْيا وكَلْها ومَكْتابو
وللي غَرسْ شي يَلْقاهْ
ب الحَرفْ ريوسْنا شابو
وسيفْنا حَرَّمْ جْواهْ
شَفْنا والشوفْ ضاعْ احْسابو
والقلبْ ما صابْ دْواهْ

المريني ادريس

لْقَلْبْ مَنْ حَرّْ الضٌّرْ صَارْْ مَعْلاََلْ
دْوَاه ْمَاهُو غِي فْيَدْ خَالْقُو
الضُّرْ يْلاَ مَا تْحَارَبْ يَكْثَارْ مَا يْقْْلاَلْ
وُمَّالِِينْ لْحََرْفْ عْلَى قْْتَالُو يَتْسَابْْقُو
فْ السَّاحَة يْحَارْْْبُُوهْ يْمِينْ وُشْمَالْ
يْجَاهْْرُو بَكْلاَمْْ لْحَقْ مَايْنََافْقُُُُُو
بْعََوْنْ اللهْ يْدَحْْرُوهْ الرْْجَالْ
يَََصْلِيوَهْ نَارْ وْشْجَارُو يْتْحَارْقُو
رْمَادُُو يْتْنَاثَرْ فَقْرُونْ لَجْبَالْ
وُالشَّايِطْ مَنٌّو بَحْرْ النْظَامْ يْغَرْْقُو
شُوَّافْ لْحَرْفْ مَاخْفَاهْ حََالْ
كْلاَمْ لْمَلْحُونْ مَايْْفَارْقُُو
يْصُُوغُُو شْْعََارْ يْصُُوغُو زْجَالْ
وْهَاذُو تْْوَامْ كَيْتْلاَصْقُو
تَقْفَازْ لْقَافْيَة وْلَمْْرَمَّاتْ شْكَالْ
مَكْسُورْ لَجْْنَاحْ وُالسٌٌّوسَنْ يَتْعَانْقُو
لْحَََرْْف ايْلاَ انْسَنْ يْْدِيرْْ لْمُُوحَالْ
يْصِيََّّرْ لَبْحَرْْ وُالنَّارْ يَتْعََاشْقُو.

عبد السلام البعليوي

مَنْ همُو بَعْنا الجلابة وزَدْنا لْغَرْبالْ
والبَسْنا اقراقْبو
حَرُّو ادْخَلْنا هاِدي اشْحالْ
وحَارَبْنا مْحارْبو
لااتْسَوَلْ ياخَايْ اديسْ لاتْسالْ
طَلَعْنا فوْطاهْ ودْرادبو
مْساخْ الحرفْ حالو مَدْبالْ
ف الشَّعْبة غَرْقوا قوالْبو
مَنْ جا اليوم إقول زجال
وكيفْ ف الساحة اثْعاتْبو
ها للي عاصرْلَخْبالْ
وفَ زَحْمة إوَريناَ مْراكْبو
ها للي يَنَتَفْ لَكْبالْ
ما فْهَمْنا نْشاشْبُو
غيرْ سيرْ أوكانْ تْشوف ومزالْ
كلْ حنْطة هْلها تْناتْفو

المريني ادريس

مُولْ لْحَرْْف يْدَقََّّقْ ،
 يْفْرَقْ وُيْفََرَّقْْ ،
 بِِينْ لْحَنْطَة وُُلْحَنْطَة
حَنْطَةْ الصَّانَعْ التَّاقَنْ شْغَالُو مَاتَخْفا
مْْتَحْفَة مْْلَحْفَة ،
 لْعِينْ عْلِيهَامَاتْزِيغْ ،
 وَالرْجَلْ عْليِهَا مَاتُُوْطَا
حََنْطَةْ النْْواعْري زْكَايْرْ
 تَحْرَامْ فِِِِيهَا الشٌّوفَة
حَنْطَةْ لْكَُفَّارْ،
 زْرَعْ بْدِيعْ ،
 وُشْعِيرْ رْفِِيعْ ،
 وُُمْحَاصَلْ مَخْتَالْطَة
وْحَنْطَةْ مُولْ لْحَرْفْ ،
 كْْلاَم ْحْكَايَمْ ، وُُمْوَاعَظْ مْرَدْفَة
بِيهَا يَزْجََرْ ، وْيََنْهَرْ، 
يْغَيَّرْْ لْمُنْكَرْ ، يُومْ لْقُومْ خَايْْفَة
سِيدِي عَبْسْلاَمْ حََرْفِي وْحَرْفَكْ 
، يْفِيَّقْ الرَّاگدْ ،
 يْْحَيَّحْ ،
 يْنُوَّضْ الهَيْطَة
نَتَّافْ لََكْبالْ مَا خْفََا حَالُو،
 اِيْلاَ غَابُو الرْجَالْ ،
 زَادْ هْْبَالُو ، بَلْمْْوَاصْفَة
دِيرْْْ جَلاَّبْتَكْ فْحَالِِي ،
 هَزْ لْقُوسْ وُالنْبَالِي ،
 نْهََبٌّو للْْجّّْهَاد وْلَمْنَاتْفَة
زْمَانْ اللّّْجَامْ عَدَّا وْفَاتْ ،
 مَابْقَا يْفِيدْ سْكَاتْ ،
 ايْلاَ نْزْوَا الطْبَلْ ،
 مَازَالَة لالة لْْغَيْطَة.

عبد السلام البعليوي

عَرفْناْ لَكلامْ لْخاوي رَغْوا ماعْطا

بين شْعابو خَزْ .ماهْ ما شْفا

ولْحَرفْ الخَاتَرْ مْسِيوْطة

ما يْهجرْ مولاهْ عل عاهْدو أوْفا

مْعاك سَيْفي حَرْفي لَقْوامْ لَمْسَلْطا

نَزْبَرْو لَعْروقْ لَمْخَرْفا

مَاتََدْخَلْ لَجْنانْ نَبْتة مْخَلْطة

ولا تَزْهَرْ ف حوضو مْصَوْفة

مَنْ قرا كَلامْنا إقولْ هذي مْكَبْطة

يَنْقَشْ خْيالواب وْزانْ مْلَحْفة

مَاهي مْحنْطة ولامْشَوْطة

هاكْ ميزَانْ اعْباروبَ لُوفا

المريني ادريس

مَايْتْلاَمْشْ مُولْ لْمِيزَانْ بْلَعْبَارْ لْوَافِي

لْمِيزََانْ عْدُولْ ، جوْْقَلْبْ مُولاَهْ صَافِي

لَمْلاََمََة عْلََى مُُولْ لْحَرفْ ايْلاَ رْضَا بِالضَّرْ

بََاعْْ حَرْفُو، وْعََادْ لِلْحَقْ مْجَافِي

ضَرّْْ لْكَلْْْمَة لْمَخْيُونَة ، ضَرْ النْفُوسْ لْمَعْفُونَة

ضُرْ قَنَّاصْ لَنْصُوصْ ، ضَرْلْمَدْسُوسْ ، شَاعَلْ لْعْوَافِي

ضُرْ لْْكَتْبَة ، ضََرّْْ الجََّذْبَة بْلاَقْوَاعْْدْ ، ضَرْ النْظَامْْ بْلاَقْوَافيِ

ضُرْْ الدََََّاخِلْ سُوقْ لْغِيرْ ، بْلاَ دَابَّة بْلاَبْعِيرْ ، عُوّالْ عَََلَى سْلُوعْ لْغِيرْ ،

يْشَلْْهََبْ مََايْحَافِي

ضَرْ السَّبْحَة مْعَاشْرَة لْبَنْدِِيرْ ، نََاشْْْدََة التَّغْيِِيرْ ، ضَرْ لَسْعَارْ ، ضَرْ لَمْرِيضْ

فْ صْبِيطَارْ ، ضُرْ الجِِّيعََانْْ لْحَافِي

فِينْ مُولْ لْحَرْفْ مَالُو سَاكَتْ ، مَالْ صُوتُو خَافَتْ ، عْلاَش ضَوٌّو طَافِي ؟

عْلاَشْ ، عْلاَشْ ، وُعْلاَشْ ، مَانْحَارْبُو لَضْرَارْبْسِيفْ لَكْلاَمْ ، يَاكْ جُرْحْ

لَكْلاَمْ مَالِيهْ شَافِي ؟

نْحَارْبُو الظٌّلاَّّمْ ، نْْحَارْبُو بَايَعْ لُوْهَامْ ، وْسَارََََقْ لَكْْلاَمْ ، نْحَارْبُو لَفْسَادْ وُلْفَسَادْ ،

الظَّاهَرْ وُلْخَافِي 

سَوْطْ لْحَرْفْ الصَّادَقْ يْخَلِِّي لِيمَارَة ، يَرْهَبْ الشَّفَّّارَة ، يْشَلْ زْكَايَر لَحْلاَفِي

شْكُُونْ مَنْ غِيرْ مْجْذُِوبْ لْحَرفْ ،  بْوَعْدُو يْوَافِي ؟.

اللهْ اللهْ لْحَرْفْ ايْلاَ خْثَرْ ، سِّي عَبْسْلاَمْ يَرْوِيهْ ، وْغِيرُو يْسْقِيهْ ، وُيْلاَ ثْمَرْْ ،

يَنْجْنَا بْ لَقْطَافيِ

يَاقَارِي هَاذْ لَحْرُوفْ ، مَايْكْفِيكْ الشٌّوفْ ، نُوََّضْْ حَرْفَكْ ، عَرِّيهْْ مَنْ دْثَارُو الدَّافِي

جَا زْمَانَكْ ، خَالَطْ قْرََانَكْ ، مَلِّي دْوَايْتَكْ بَالسّْمَاقْ ، سَْطَّرْ حَرْفْ لَمْحَارْبَة ،

بدَا حْضَرتْكْ وُجْذَبْ ، اللهْ  يَعْْفُووُُيْعََافِي.

 

عبد السلام البعليوي


المريني ادريس

كْلامَكْ مَتْمُورْ

وَاضَحْ لَرْسَامْ مَاهُو مَطْمُورْ

كْلاَمْ مَاعْلِيهْ جْلاَلَة ، بْلاَزْوَاقْ ، مَنْظُورْ

فِيهْ لْحرْفْ مْسَنَّنْ ، فْرَاسُو مَنْغَازْ

فِيهْ لَمْعَانيِ لاَيْحَة بْلاَ تََقْلاَزْ

يْشُوفُو لَعْمََى ، يَسْمَعُو لْمْدَرَّگْ ، وْرَا السٌّورْ

يْزَنْزَنْ فْ وْذَنْ لْحَاكَمْ ، يْنَبَّهْ الظَّالَمْ ، وْشَاهِدْ الزُّورْ

يََفْضَحْ لْخَايِنْ ، يَكْشَفْ لْمَسْتُورْ

يْعَََلَّمْ الجَّاهِلْ ، بْوَاطِنْ لُومُورْ

يََخْزِي لْْفَاهََمْ ، بَايعْ الطَّرْحْ 

يْْحُُطْ التٌّرْيَاقْ عَالْ الجَّرحْ ، يْبطََلْ السّْْحُورْ

حَرْفَكْْْْ لْْْْيُومْ يَا صَاحْبِي رَايَقْ ، بَنْوَاعَرْ لْقُومْ فَايَقْ ، حَرفَكْ لْيُومْ مْتَبَّلْ بَعْطُورْ

حََرْفَكْ لْيُومْ ، فْ وْجََهْ الضٌّرْ ، يَصْرَخْ وَيْثُورْ

حَرْفَكْْ لْيُُومْْ عْلاََمْ يْشَالِي ، فُوقْْ الرّْوَابِي وْلََعْلاَلِي ، يَتْزَارْ وُيْزُورْْ

هَذَا عَهْدِي بِالصَّادْْقِيِِن ، فْ وْجَهْ الضَّرْ وَاقْفِينْ ، بْحَرْفْ مْسَاوِي ،

مْْنَزّلْ سْْْْمَاوِي ، يَمْحَقْْ لَشْرُورْ

يْضَوِّي لَمْكَانْْ يَشْعلْ النُّورْ

تََحْلاَ لْحَضْرَة ، يْهِِيجْْ لْْْمَجْْذُوبْ ،