قَرَارْ

قَرَارْ

*********
تسيَّف كيفْ تبْغي وتْشكَّل
قلْبي ليكْ ماتْلا يبْغِي
تْهلّل تَاتعْيا وتْحَوْقلْ
وْذَاني صامَّة ماتَصْغِي
سْوا تَتْبَاطا أوْ تسْتعْجَل
قرَّرْتْ لْ حبَّكْ نَلْغِي
**********
المريني ادريس
القصر الكبير بتاريخ : 31 / 07 / 2013

قراءة زجلية في ليلة زمان الحكايا

الحكومة

الحكومة

**********

لْميزان صدَّا  يرْتاح

عادت السُّوق خاوية

بين لحْمامَة ولمصباح

شعْلات شَلاّ مْتاوْية

شْكُون يْكون مطْراح

خْديم لْ ذاك الزَّاوية

وشْكون يْكُون برَّاح

كلمْتُو رْزينة راوية

أو مْقدَّم صحْصَاحْ

تَحْتْ لْقُبَّة السَّاوْية

مايْگول لاَّ وَلاَ آحْ

تْكُون دْماغُو خَاوْية

يسْهَر تَا لَ الصّْبَاحْ

وْلعْباد امَّحْطَة لاَوْية

لوْجه مبْشُور وضَّاح

ولْوترة بْ نغْمة مْسَاوْيَة

**********

المريني ادريس

القصر الكبير بتاريخ : 25 / 7 / 2013

حْكايَة

حْكايَة

**********

حْكايَة حْكاهَا ليا ابَّا

فْ باب الدَّار فوگْ لْعتْبة

عْلى ناس جمْعاتْهُوم لمْحبَّة

بْلانْفَاق

بْلاَ زْواقْ

متْلاحْمين بْلا صْداق

يْدرّْجُو لكْلاَم

يرْويوَاهْ حكايات

يعزْفُوه نْغام

أو مسْرحيَّات

واللِّي بْغا يَعْرف شْكُون

يتْملاَّ داخلْ هاذْ لْكُون

يَلْقا شبابْ مُبدِعْ مْواظَِبْ

منْ جمعيَّة فضاء الطَّالب

شِعارْهُوم عَطاءْ وْسَخَاءْ

رغْم الإِكْراهْ وَالتَّضْيِيق

مْواصْلين شاقِّين الطّْريقْ

مْحفّْزَاهُوم تشْجيعَاتْكُوم

هَمّْهُومْ لْوَحِيدْ إِمَتَاعْكُوم

رافْعينْ عْلام قَصْراوَة

زَارْعِين بِينَاتْنا لْخَاوَة

عَاشْ فَضَاءْ الطَّالبْ

بْلاَتَهْريج بْلا جَلْبَة

بْلا خْذَاعْ بْلاكَذْبة

واللِّي فِيه الدّْغُلْ

يتْوَارا وْيتْخَبَّا

**********

المريني ادريس

القصر الكبير بتاريخ : 28 / 07 / 2013

الأستاذة :أمينة بنونة

الأستاذة :أمينة بنونة

*********************

وصْلتني دعْوة منْ جمْعيَّات مدنيَّة

تْصفَّحْتَا وبْتسمْت ، هيَّ لْ حفْلة تكْريميَّة

مانَا كاتبْ مانا شَاعِرْ ، إنَّمَا متْشبَّعْ وطنيَّة

تعْليم صْوابِي ، خْلُوق وتْرَابِي ، قصْراويَّة

كْبرت وتْرعْرعْت حامَل آلة فُوتُوغْرافيَّة

جايلْ بينْ زْنَاقي عْتيقَة ،  وَدْرُوب مْضِيّْقة

وْعُبْق التَّاريخْ منّْها فايَحْ ، بْسَاتنْ وخْضُوريَّة

وْآلْتِي عسَّاسَة ، تلْقَطْ وتْنقَّطْ ، صُوَّر تَاريخيَّة

هَاذي لَقْطَة شاعريَّة ، وْهَاذي عْمَارة أنْدلسيَّة

تبْقَا للذِّكْرى شَاهْدَة ، عَ لْحضَارة لْحقِيقيَّة

الشّْريعَة وْبابْ لْوادْ ، وَلْقطَّانِين حتَّى هيَّ

مابِينْ سُوقْ لَغْزَلْ والشّطَاوْطِيَّة

وْفنْدَق السُّلْطان وَلْقِيسَاريَّة

وَدْرُوب الدِّيوَانْ ، وَفْنادْقُو الأَثريَّة

نْرابَعْ ونْجُولْ ، صْبَاحْ وَعْشيَّة

قَنْطْرةْ لْكَرْمة وْتُحْفَتْها لْهنْدسيِّة

فيَضَانْ اللُّوكُوسْ وْبُرجْ السَّاعة 

حَديقَة السَّلاَم ، والسِّينِما الطَّبِيعيَّة

مَسْرح بِّيرِيسْ گالْدُوسْ ، وسْطُورِيَّا

شْجَرْ التُّوتْ ، وَرْوايَحْ مسْك اللِّيلْ

منْ مُولايْ عْلي بُوغَالبْ لْسَكْرِينْيَا

سُوقْ سِيدي مَرْزُوقْ ، ولْعطَّارِين

دَار الدّْبَغْ والنِّيَّارِينْ ، فَنْدَقْ لَحْبُوسْ

فَ لْقشَّاشِينْ ، والصِّنَاعَة التَّقْلِيدِيَّة 

سَاحَة لَمْرِينَة ، وْفنّْ لْحَلْقة ، عْيُوطْ

وْفُرجَة ، أزَليَّات وَحْكَايَاتْ مرْويَّة

لْ أَمْن سَايِدْ ، وَلْ أَمَانْ ، والنَّاسْ

متْعَايْشَة ، إسْلاَمْ ، يْهُودْ ، وْنصْرانِيَّة

تَحْت سْما وَحْدَة ، فَ مْدِينَة عاشَتْ مْجَاهْدَة

مْهمْشَة وْصَامْدة ، مْكَابْرة مْعَانْدة ، صُوَّرْهَا

تَارِيخْ شاهَدْ خْسَارة لْيُوم ضْحاتْ منْسيَّة

مْدينَة الصَّالْحِين وُلْ أَوْليَّا

مْدينَة عَايْشَة عُرْيانَة الرَّاسْ

وْلالَّة بنْت احْمد الجّْباريَّة

مْدينَة بُو لمْحاسَن وَلْمَجْذُوبْ

وْسِيدي قَاسَم بُوعَسْريَّة

مْدينَة الشُّرْفا وْلمْعَرْفَة

مْدينَةْ لْعلْم ولْعَبْقَريَّة

مْدينَة فَاطْمة لْ أَنْدلُسيِّة

آشْ تْقُولُولَ لْخمَّار وْعَامِرْ ؟

اللِّي خَلْصُو بْ كُلّْ جِدِّية ؟

فرَّطْنا فْ تُحَفْكُومْ لْفنِّية ؟

خَذْلُوهَا لْمسْؤُولِين خَذْلتْها لْبَلدِيَّة

حَدِيقَةْ السَّلاَمْ ، رَجْعُوهَا أسْمَنْتيَّة

بابْ لْعارْ ، وْنَافُورة لْمَرْس لْبهِيَّة

وْصُومْعَة سيدي لعربي السُّداسِيَّة

آشْ وْآشْ تْقُولُو لَ لْ أجْيَال الجَّايَّة ؟

مانَا كاتبْ مانا شَاعِرْ

لَكِنْ أرَّخْتْ بْ آلَة كْلاَسِيكِيَّة

تَارِيخْ تْلَمْسُو لَعْيُونْ ، يشْهَد ربّْ لْكُونْ

أنِّي مَارَايدْ شُهْرة وْلاَجَاهْ يَكْفِينِي رْضَاهْ

وَيْلاَ غبْتْ عليكوم ، رْجَايَا تَتْرحّْمُو عْليَّا  .

**********

القصر الكبير بتاريخ : 24 / 07 / 2013