حالة شروذ ( 24 )

حالة شروذ ( 24 )

**********

كيف مُول لْكار
كيف مول لْ فَاس
اللُّولْ هضَّار
والثَّاني فسَّاس
السَّبْحة جْهَار
والسَّمّْ ينْداس
اللَّحية والنَّطعة
الرَّكعة ولْخلعة
والسَّجدة ب الدَّمعة
لْجو مبَخَّر
مْعطَّر
والضُّو شمْعة
والله يبارك فْ
سيدي بُوراسْ
طاح السَّرّْ ف گلْتة
وْمغْرقْش
حيتْ عوَّام
ودْيال لَعْوام
مايْمُوتشْ
جيفة أوْحْرامْ
فْزگْ ، تْحلّْ وتَّنْشَر
بين لَقْوامْ
وسْرا لَخْبار
مابِين الجِّيلالي
وْبُوسْلام
وحينْ يَقْوا لَكْلام
ليَّام الجَّاية يخْرج طَارْزَان
وحيتْ احنا كْشفْنا وفْهَمنا
غادي يگول : تانا فْهمْتُكوم
احنا شعب صبَّار
ناقصنا النَّجاحْ
ماخصّْنا بنانْ
ماخصنا تُفَّاح
غِ عْطينا التِّيقَار
وبايْباي يامُولْ لْكارْ

المريني ادريس
القصر الكبير بتاريخ : 07 / 06 / 2013