وَزيرْ لَكْلاَمْ

وَزيرْ لَكْلاَمْ

***********
اليُوم صارت لبْلادْ ناشْفة
فْ عهْد لْحُكُومة التَّالْفة
تْخلَّط لَفْساد بُ الرَّشْوة
كِيفْ لحْلِيب مْع لْقَهْوة
والسِّيبَة دايْرة گْرُونْ
نَبْكِيو عْلَى السَّالَفة
ماكانْ لاجُوع لاَحْفا
لاَ بُويا عْمَرلا وْفَا
كانَت لبْلاَد واقْفة
ولْيومْ الطَّرحْ سخُون
لاَ تمَاسِيحْ كانُو
لاَعفَارِيتْ بانُو
وَآغيرْ جَات اللاَّمْبَة
وْلاحتْ لينَا لْكَذْبة
بْلاشْرعْ وُبْلاَقانُون
حاسْبِين الشَّعْب مجْنُون
هَاذي هيَّ اللَّحْية
لاَحشْمة لاحْيَا
لْمُعارَضَة لاَحُوهَا
وْمَوازِين فَرْضُوهَا
رفْعُو لَسْعار زَادُوهَا
وْقَالو سُنَّة فَ لْكُونْ
هاذُو مْعاهُوم مَاتْكُون
الدُّوزِيم هيَّ لْحَاكْمة
تقَطَّع الضُّو وَلْمَا
لمُوبقَات عُرْمَة
فَ حْضُورْبَابَا وْيمَّا
وْحتَّى عمِّي حَكْمُونْ
لازِينْ فَ لْبَارَامِيج
كُولْشي مْعفَّنْ خَامَج
كَايِن غِي اشْطَح وًرْدَح
مْع فنّْ لَعْفَن سبَّح
وَلوْ تْكُون زَيْزُون
الدُّوزِيم يانَاسْ ذْلِيلَة
شْحالْ من دْشَر وقْبِيلة
سَكْناتُو كِيفْ الرَّتِيلَة
فَسْدتْ عَايَل وْعِيلَة
وْخلاَّت لْكُلّْ مَرْهُون
قْبَالْتا وْبْ التِّلِيفُونْ
فينَكْ آسِّي لَوْزِيرْ
ياكْمَا شادّْ لْبنْدير ؟
فايْناهُوَّ الدِّفْتَر
وآش قَدِّيتِي تْغَيَّر
ولاَّ عاجْبَكْ تهْضَرْ
وْمرَّة مرَّة تْنضَّر
وبْ ذَاك الشِّي مسْكُونْ
شْمَعْتك بْداتْ تَطْفا
يَا لْحُكُومة التَّالْفة
لالَّة وْجمْعي لْوگْفة
مَرْضكْ ماليهْ شْفَا
ليعْتراف بعْد لْكبْوة
رُجْلَة
والصَّبَر عَ لّْبَلْوى
عُمْلة
شْكُونْ فيكُوم صْمدْ ماتْفَافَا ؟؟

المريني ادريس
القصر الكبير بتاريخ : 11 / 05 / 2013