آجِيوْ تْسَمْعُوغْرِيبْتِي

آجِيوْ تْسَمْعُوغْرِيبْتِي

************

فَاتِي وآهْيافاتي
وآشنُو بيَّا درْتي
بَ عْيونَك شيَّرتي
وخلِّيتِيني مْفُوتي
اضَّاربْت مْع مرْتي
وسْمحْت فْ حانُوتِي
جيتَك نَجْري للدَّار
لْقيتْ مْعاك عَطَّار
عْلى شْمالُو مَجْمر
يتَمْتَم ويْبخَّر
هاذُو وْذينَات حْمَار
هاذُو زْغِيبَاتْ لْفَار
ونْتي شادَّة لَفْنَار
خْرجْت بْ رَاسي هَارَب
كَ نْبرِّي وَنْقلَّب
عْلَى شِي فْقي أوْطَالَب
نعْطِيه اللِّي يْناسَب
ذْبيحَة ولاَّ قَالَب
غِي مانَبْقا مْعذَّب
وَفْ نُومي نتْشَقْلَب
لْقيتْ الطَّالَب سَبْتِي
خَطَّاط وْكا يَفْتِي
غ مدِّيتْلو لَفْتُوح
بْديت نشْكي ونْبُوح
وْهوَّ يْحنَّشْ فْ لُوح
وْمرْتي گُدّامي تْنُوح
شويَّة الطَّالبْ نْطَق
رجَّع وبْدا يْحَوْلَق
صَيَّحْ واكْ واكْ آلْحَقّ
خَيْطكْ رَاه اتَّطْلَق
هْنيَّة اللِّي تْفكِّيتِي
هاذي قصَّة مَحْبُوكة
من خْيالِي وْمسْبُوكَة
مَا كاين لاَ فَاتي
وَلا حَادَّة  مْرَاتِي
مابيَّا ماعْليَّا
لبّسْت رَاسِي قَضِِيَّة
باشْ نْبسْطُو شِي شْويَّة
راكُوم عْزاز عْلِيَّا
خُوتي وَخْواتَاتِي

*********
المريني ادريس

 
القصر الكبير بتاريخ : 17 / 05 / 2013