مَ گْواكْ يابْلادِي
**********
سرَّات السَّرْبة وْلَعْلَع لْبارُود
وبْدات لَ لْسُون لْخارْسة تنْطَق
رابْ السُّور لْ فَاصَل لَحْدُود
وْخرْجَت لْمجْرَابَة مْحنّْية تْصفَّق
لَعْرُوسَة حايْرة مابْين الشّْهُود
ولْحاضَر مبْهُوضْ سَايَر يْحَولَقْ
وْلفْقِيه غَايِبْ ، مَرجْاه إيمْتَا يْعُود
يَدْخُل بَ الصُّلْح ، أوْ يفْتِي يْطَلَّق
مَ گْواكْ يَابْلاَدي ماشَفْتي سْعُود
وُكْبادَك كُلّْها يگُولْ مْعايَا لْحَقْ
لله ياسْيَادي وَقْتَاشْ عْلينَا يْجُود
لْبَارِي بْ لَمْخَاوْية بينَاتْنا تتْعمَّق
لَعْلوجْ جْنابَك راهُومْ فَ صْعُود
وحدك يابْلادِي جَاثْية مَا تْفارَق
ملِّينَا من فَرْط عْهُودْ وَوْعُودْ
رْجَال لَّ حْكَامْ ومْناصَب تتْسَابَق
لْكُرسي يْنسِّي حتَّى لَو منْ عُودْ
وُلِّ تْگُولْ زَاهَد يَطْلعْلَك سَارَقْ
المريني ادريس
القصر الكبير بتاريخ : 13 / 05 / 2013
ليست هناك تعليقات:
إرسال تعليق