دواير الزمان
************
من دْواير الزّْمان لا تحْضي
وخلِّي لْمكْتوب الله يْصرّْفُو
لَعْمر قْصير وْلابدّْ يَمْضي
وُتْخلِّي لحْبيب اللِّي مْوالْفو
شلاَّ ما تْريدْ وُاللهْ يقْضي
حْكامْ اللهْ مْقدَّر ماتْخَالْفُو
شْحال قدَّك تْغضَبْ وْتَرْضِي
والطَّامَعْ فيكْ بْ عِينكْ شَايْفَُو
يْرومْ يْفرْزَك وْليكْ يَفْضي
بَ مْكَايرْ خدَّاعْ ونْتَ عَارْفُو
رايدْ صَرعَكْ وعْليكْ يَقْضي
وكْثِير مْثايْلُو عْليكْ يتْناتْفُو
عِيشْ حْياتك طَيِّبْ مَرْضِي
واللِّي يْصارْفكْ بْ لمْثلْ صارْفو
المريني ادريس
القصر الكبير بتاريخ : 02 / 05 / 2013
ليست هناك تعليقات:
إرسال تعليق