آشْ ظْهرلِيك

آشْ ظْهرلِيك

*************

احْضي راسَكْ يافطُّومة
من زيَّادات لْحكُومَة
وآيِّيه آيا راجْلي لحْبيب
ورَاها زَادتْنا فْ لحْليب
آشْ هاذ لقْضا وآشْ هاذ لقْدرْ
لمًّنْ نْوجَّه اللُّومة
وآشْ لَ لْمخزن ولاَّ للشَّعب
لِّ ضْرب الطَّم مانَاضْ اشْجب
نَاسْ ملْهيَّة  مْع السِّيسِي
وناسْ تابْعة تْناصَر مُرسِي
وآنا حرْگو ليَّا الضُّوسِي
زادُو فْ لسْعار حسِّي مسِّي
اللهْ يارَاسي شْحال تْقَاسي
لْحنَانْ والرَّحْمة معْدُومَة
عنْد لْحُكُومة لْمَعْلُومة
حتَّى التُّفَّاح مْع لْبنَان
لِّ غْوانا بِيهْ ذَاكْ بنْكِيرَان
ما تْلينا نْجبْروهْ فَ التِّيرَانْ
ولاَ فَ صْبِيطَار لْحُومَة
لابَرْلمَانِي نَاضْ يهْضَر
ولاَ حقُوقِي يسْتنْكَر
لْ كُلّْ تْوارا وتْسَوْخَر
بزْطام الشَّعْب خَاوِي يْصفَّر
وآشْ ماشِي عِيبْ أوْ حْشُومَة
آشْ ظْهرلِيك يآ فطُّومَة

***********
المريني ادريس
القصر الكبير بتاريخ : 31 / 08 / 2013