ولاَ تقْفُ ماليْسَ لكََ به عِلْمٌ

ولاَ تقْفُ ماليْسَ لكََ به عِلْمٌ
**********
اللهْ واحدْ مَاليهْ شُرَّاكْ
************
عفاك خُويا عفَاكْ
ايْلا ريِّي ماجاشْ مْعاك
لاتْقُولِّي مانْتاشْ مسْلم
حيث بَ هْمُومنا ماتهْتَم
ونْت شايفْ إسَمِي
عرْبي ماهُوشِ مْبهَّم
مذْهب مالِك لْ إمَام
ف لمَغْرب منّْ لْقِدَم
باشْ من حقّْ تكفَّرني
وْمن لْملَّة تخرَّجني
ونتايا كيفي كيفك
الرَّبّْ اللِّي خْلقْني خلْقك
نْت فيَّا ماشي سُوقكْ
مانْتاشْ عْليَّا مَسْؤُولْ
مانْت نبِي وْلاَ رسول
مانا غَبي وما مهْبُول
باش نْسايْرك ف لِّ تْقُول
كلّْ واحد فِ قبْرُو وْحيدْ
لاتْكُونْشي للرَّب عْنيد
تْوزَّع بطاقة شهيد
على من تْحبّْ أوْ تْريد
عَفَاك يا خُويا عَفَاكْ
ايْلا ريِّي ماجاشْ مْعاك
خلِّي الله هوَّ يْحاسبْني
ونْت كَ إنْسان عاملْني
حتَّى لُو ريِّي شَقَّاكْ
ماطالب عَطْفك وُرْضَاكْ
طْلبْلي هْداية رْفَع دْعَاكْ
لاَ تْنصَّب نَفْسَك إِلاَهْ
وَتْقُولِّي فِيمَا معْنَاه :
انْتَ مارَقْ
دَمَّك زَاهَقْ
وَتْصدَّر فيَّا فتْواكْ
اللهْ واحدْ مَاليه شُرَّاكْ

**********
المريني ادريس
القصر الكبير بتاريخ : 21 / 08 / 2013