حيَّاني
********
حيَّاني ياحِيَّاني
تْشرْبكْت فيَّا
وتَلَّفْتْ لمْعَانِي
حيَّاني ياحِيَّاني
مَادَرْتَاشْ بَ لْعَاني
تْسَارا حَرفي فيَّا
وْمالْگا غِيرْ لْكِيَّة
تالْفَة مجْليَّة
منْ ذَاك لْعَهْد
مَنْ جدّْ لْجدّْ
قْبل مانتْزَادْ
فيَّا وْهيَّ تَوْلَدْ
واللِّي فيَّا ماهنَّانِي
شْحالْ ضحَّكْني
وشْحَال بكَّانِي
وْماشِي بَ لْعَاني
حيَّاني ياحِيَّاني
هَلْكتْني ذَاتِِي
السَّاكْنَانِي
حَوْرجَتْني
تْجَوْعَرَْت
غْرسْت نْيابِي فَ سْنَانِي
عضِّيتْ وماحسِّيتْ
تْصَرْطت لْعضَّة
وْرَدِّيتْ
ردِّيتْني منِّي
مْرَارْ
حيَّاني ياحِيَّاني
الزّْمَان غَدَّار
درْتُو لْحَافْ
كْشفْ عْليَّا وْعرَّانِي
ماحْشمْ دََارْها بَ لْعَانِي .
**********
المريني ادريس
القصر الكبير بتاريخ : 18 / 08 / 2013
ليست هناك تعليقات:
إرسال تعليق