آهْ يآالدُّنْيا

آهْ يآالدُّنْيا

*********

آهْ يآالدُّنْيا يادانْية

شْحال فيك من سَاوي

وشْحال فيكْ مَ نّْساوي

شحال من ساوي ب مالو

وشحال من ساوي ب عْمالو

وعلْمُو وسْط رْجالُو

وشْحال مَ نّْساوي ليه

لْوالْعات مَالو

آه يآالدُّنْيا يادانْية

شْحال فيك مَ نَّمْس

غاوي الرّْيَال ولْفلْس

وشْحال فيك مَ نَّحْس

لْ حقّْ النَّاسْ يبْخَسْ

بْ سرّْهوم يجْهر وْيهْمَس

آه يآالدُّنْيا يادانْية

قوْم فيك لْ تَحْتْ

تْهشّْ وتْنشّْ

 تًحْفر وْتبْحثْ

عْلى التَّخْتْ

وْقَوْم فيكْ عَالْية

عَ لّْخَلق تتْكبَّرْ متْعَالْية

تَتْالَّهْ مَاهِي رَاضْيَة

لْغيرعَندهُومْ وْضِيع

فيه الشّْرا وَلْبِيع

لازَمْ يسْمَع ويْطيعْ

مايْزيغْش عَ لَّقْطِيعْ

آهْ يآالدُّنْيا يادانْية

لُومَا لَفْراقْ وْحرُّو

كُنَّا بَ لْخُلْد نتْغَرُّو

تعْجَبْني فيكْ لْمُوت

تْفرَّقْ عَدْيانْ وْخُوت

تْساوي لْكُلّْ فْ تَابُوثْ

بْ ثُوب وَاحدْ منْعُوت

مَامْطرَّزْ مامَسْلُوتْ

ولمَّا الرَّبْعِينْ تْفُوتْ

بعْدمَا صارْ للدُّودْ قُوتْ

يصْبَحْ عنُّو مَسْكُوتْ

ذَكْرُو يرْجَعْ مَوْرُوث

آهْ يآالدُّنْيا يادانْية

إِيمْتا يَلْحَقْنِي الدُّورْ

وعْلى وجْهكْ نْغُورْ

رَانِي فِيكْ مامَسْرُورْ

شَرَّك فْ وجْهي يْثُور

وَآنا نْسَطَّر لَ سْطُورْ

رَانِي نْخمَّمْ فَ لْعُبُورْ

وْجُودِي فيكْ آشْ يْسَاوي

ايْلاَنَا تَابعْ غِي الشّْهَاوي

أوْغَارَسْ شَجْراتْ بْلاَوِي

شْكُونْ يذْكُرْنِي لَوْ نتْوَارَا

وْتحْت الطِّين عَظْمي يَرْشَا

أوْ يْقُولْ فيَّا عِبَارَة

حتَّى لُو لْحَالْ مْشَا

آهْ يآالدُّنْيا يادانْية

عْرفْتك رْخِيصَة ماغَالْيَة

مَاعْليَّا قُرآنْ تْنزَّل

أوْ تشْرِيع بَ سْبَابِي تْعطَّلْ

مََاخَطِّيتْ غِي حْرُوفْ تتْنَاقَل

ومْعَ الزّْمَانْ يمْكَن تَتْآكَلْ

يادُنْيا طَلْقي منِّي

اللِّي كْسبْتُو منَّك يكْفِينِي

عزْفِي أَوْ عَزْفِي

وْتَارِي رَاهْ مْسَاوِي

***********

المريني ادريس

القصر الكبير بتاريخ : 10 / 08 / 2013