فِينَكْ يا ليَّام

فِينَكْ يا ليَّام
*******
توحشت صوت النقطة لْقاطرة
من لْبزْبوز عْلى فمّْ الگنبورة
وتوحشت اطَّردِيگ الرَّعد فوگ
 الزَّنگ وآنا مْفرش هيْضُورة
وتوحشت ابا يعطيني دهكة عصا
 لما دْرابلي يتوسّْخو ب لعب لْكورة
توحشت خبيز امي فوگ لْكانون
 ريح الشَّرگي يْصُوط وشْراوطي
فازگة عْلًى تشْريبتْ نْوالتْنا مْعلّْقة منْشُورة
توحشت يد لفقيه عرْگانة نْبُوسْها
وذْهِين اللُّوح بالصَّلصَال والصمق
فْ قاع الدّْواية ولقْلم لشْقة
من گْصَبة حايلة منْجُورة
توحشت هزان لميدونة
نهار عرفة وحْنا رفاگة
طالْبين حقّْها جايْبين الدُّورة
تْوحَّشت نتْكامَرْ وآنا صْغير
مْع بنْت الجِّيران بْ معْيُورة
تْوحشْت  وقْفة حْدا السَّبُّورة
وَلْ أُسَّادْ مْوقَّفْني عْلى رْجَلْ
وقْفَة عَسْكْري رجْلُو مبْتُورَة
فِينَكْ يا ليَّام ؟
تْوحَّشْت شْيُوخْ وَعْگايزلْحُومَة
تْوحَّشْت الجَّارِي يْفيدْني بْ مَعْلُومة
ومْقَوّْسَتْ الظّْهَرْ خْتِيتِي فَطُّومَة
ودَّا حْمَادْ مُولْ لْفاخَرْ وتْنقْيَة مَشْمُوم
فْ يدُّو تَعْراگْ وْلُوحة التَّقْصَاصْ
ولْمَطْوي فْ جنْبُو السَّبْسي امَّحَّطْ
والدَّكَّة أتَاي الزِّيزْوَة بايَتْ فَ رْضُومَة
فِينَكْ يا ليَّام ؟
توحَّشت تبْرَاح عمِّي شْعايْبْ عَ لَّوْزِيعَة
الذّْبيحَة فَ الجَّامَع والنَّاسْ ملْمُومَة
وْلَفْقِيه گزَّارْ يْسَاوِي لَگْراعِي
لْحَمْ وْهَبْرة ، شْحمْ وعْظُومَة
تْوحَّشْت لْگعْدَة جَنْب الزَّرْب
تَحْت لْكَلِّيطَة لَكْبِيرَة وطْيُورْ
الجَّوْشْ تْفقَّص بِيضْهَا خَايْفة مَهْمُومَة
لا تْشُوفْها سْلَعْفَانة أوْ فَارْة لْخِيلْ
تَحْرمْهَا لْ أُمُومَة
تْوحَّشْت مْحاجِي لْگنْفُودْ والذِّيب
يْسرْقُو لَبْحِيرة وْعمّْتي لْغُولَة وْسبْعْ بْنَات
وعْلي بَابَا وْرَبْعينْتُولْمَشْؤُومَة
فِينَكْ يا ليَّام ؟
كْبرْنا وكْبر لْهَمّْ مْعانَا
يَاريت لُوكانْ الزّْمَان
وْقَف نْسَا راسُو وَنْسَانَا
**************
المريني ادريس

 
القصر الكبير بتاريخ : 11 / 08 / 2013