الرَّقَّاصْ
***************
جَانِي الرَّقَّاصْ ب ِبْرِيَّّة
بَاعِثْهَا لْغَالِي عْلِيَّا
وْعَارَفْنِي أُمِِّيَّة
مََانَكْتَبْ مَانَقْرََا
قُلْتْ لْجَارْتِي حُورِيَّة
عَفَاكْ قْرَايْهَا عْلِيَّا
بَالسَّرْ مَاشِي جَهْرَا
نْخَافْ مَنْ خُوتِي عْلِيَّا
يْلَبْسُوهَالِي قْضِيَّة
مَانَقْدَرْشِي نَّكْرَا
وَنَايَا غِيرْ وْلِيَّة
هُمَّا يَتْحَكّْمُو فِيَّا
وَخَّا أَنَا الْكُبْرَى
هَذَا مَاكْتْابْ عْلِيَّا
مَ نْهَارْ مَاسَمْحَتْ فِيَّا
لَمِّيمَة الْحُرَّة
نَطْقَتْ جَارْْتِي حُورِيَّة
وْقَالَتْلِي قَرّْبِي لِيَّا
نَهْمَسْْ لِيكْ غِِِيرْبَشْوِيَّة
لَكْتَابَة اللِّي مْسَطّْرَة
هَاذْ لْغَالِي يَاصَبِيَّة
بَاغِِي يَلْقاكْ عْشِيََّة
وُتْكُونْ لَنْوَارْْ مَطْفِيَّة
عَنْدُو فِي قَلْبْ الدَّارْ
وَآنَا نْفْتِي لِيكْ فَتْيَة
يْلاَ طِّيعِينِي يَاهْنيَّة
بَعْدِيهْ عْليِكْ بَشّْوِيَّة
بَايْنَة عْلِيهْ مَكَّارْ
يَصْرَفْ عْلِيكْ بَسْخِيَّة
حِينْ عَرْفَكْ فِيهْ مَعْمِيَّة
وُفْ طَبْعَكْ عَاطِفِيَّة
كَتْخَافِي مَ لَبْوَارْ
عَنْداكِي يَا الزُّوغْبِيَّة
تْعَمْلِي فِيهْ النِّيَّة
تَرْجَعْ عْلِيكْ بَ لْعَارْ
طَلْبِيهْ يْجِيبْ هْدِيَّة
وُيْخُطْبَكْ بْ الشَّرْعِيَّة
مَنْْ اخْوَانَكْ شِي نْهاَرْ
آشْ گَلْتيِ فْ لُوْصِيَّة
دْيَالْ جَارْتَكْ حُورِيَّة
النّْبِي وُصَّى عْلَى الجَّارْ
رَبِّي يْخَلِّيهَا لِيَّا
نِعْمْ الجُّورَة وُالسَّمِيَّة
لُولاَهَا كُنْتْ ضْحِيَّة
وُلْخُوتِي نْجِيبْ لْعَارْ
وُنْتُومَا سَمْعُو لِيَّا
دِيرُوكِيفِي بْ لُوْصِيَّة
اللِّي سْدَاتْهاَلِي حُورِيَّة
شْحَالْ مِنْ وَحْدَة غُشْمِيَّة
زَلْقَاتْ فْ اللِّي تَّحْظَرْ
الْمَكَّارَة فْكُلْ نَاحِيَّة
شْبَاكْهُومْْ دِيمَا مَرْمِيَّة
بَاشْ مِنْ صَايْدَة تَظْفَرْ
الزَّوَاجْ قَسْمَة رَبَّانِيَّة
كِيفْ الأَرْزَاقْ مَخْفِيَّة
مَاهُو بْيَدَّ الْبَشَرْ
مَايْفِيدْنَا غِيرْ الصَّبَرْ
المريني ادريس
القصر الكبير بتاريخ : 02 / 11 / 2012
ليست هناك تعليقات:
إرسال تعليق