بِينْ لْهَابْلَة وُلْغَافْلَة
حُبْ الْهابْلَة يْخَبَّل
وْحُُبْ الْغَافْلَة يْهَبَّل
وَآنَا حَايَرْ بِينْ جُوجْ
وَآش نَطْلَعْ وُلاَّ نْزْلْ
قَصْدُولِي فْقِيهْ عَزََّامْ
كَ يْشَلْ وْكَ يْبْطَلْ
وَافَقْتْهُومْ آشْ نَعْمَلْ
دَقِّيتْ عْلِيهْ حَلّْ
بََعْدْ سّْلاَمْ قَالِِّي دْخُلْ
هَزّْ قْلَمْ وُدْوَايَة
ضْرَبْ لْخَطْ حْدَايَا
لاََحْ لْحََرْزْ فْ صْطَلْ
طَلَّعْ فِيَّا وْنَزَّلْ
وْگَالِّي لْهَابْلَة رَاهَا
حُكُومَة
آسْمْهَا فَطُّومَة
مَاتَبْغِي مَنْ يْعَارَََضْ
وَلاَ اللِّي يْلُومَا
عْطَاهَا قْلِيلْ
بَرْنَامْجْهَا فْشَلْ
شِِِي فَهْْمُو وُقْبََلْ
شِي مَالْقَا مَا يَعْمَلْ
وْشِي عَنُّو مَاغْفَلْ
قََالَتْ فَطُّومَة وُدْوَاتْ
بَاغَا نَّمِّي لَبلاَدْ
نْحَارَبْ الرِّيعْ وُلْفَسَادْ
لَمْقَالَعْ وْلاَگْرِيمَاتْ
لَْمَقَّاصَة وُلْجِبَايَاتْ
فَطُّومَة عَرْكَتْ
وَقْفَتْ عَنْدْ الجْبلْ
حَلْفَتْ مَاتْكَمَّلْ
لَفْقِيهْ تْحَرََّكْ وُتْخَلْخََلْ
جْبَدْ حَرْزُو مَْ صّْْطَلْ
وْگَالِّيَّا مَنْ جْدِيدْ
لْغَافْلَة هِيَّ الشَّعْبْ
آسَمْهَا بَنْتْ سْعِيدْ
دِيمَا بْلاَنْهَا جْدِيدْ
كُولْشِي عْلِيهَا رْكَبْ
اللِّي سْرَقْ وُاللِّي نْهَبْ
اللِّي زُوَّقْْ وُاللِّي كْذَبْ
اللِّي مِنْ تَحْت كَ يْحْلَبْ
وُاللِّي مِنْ فُوقْ كَ يَلْعَبْ
مْكََابْرَة صََابْرَة هَازََّة
لََحْملْ
خُُوفِي عْلِيهَا يْلاَ تْمَلْ
تَصْبَرْ تَعْيَا وْتَشْعَلْ
تْحَطّمْ لْقِيدْ وْلَقْفَلْ
وُتْهِيجْ هْيَاجْ الجّْمَلْ
تْصِيحْ رْحَلْ أَوُرْحَلْ
أَوْآتِينَا بْ لْحَلْ
فَطُّومَة غَا تَوْحَلْْ
كْْلاَمْ لَحْلاَقِي مَانْفَعْ
وُلاَ مْعَ لْغََافْلَة يَشْفَعْ
لْغَافْلَةَ لْحُرَّة
لْغِيرْ اللهْ مَاتَركَعْ
هْدِيرْهَا كَ يْخْلَعْ
وَخَّا يْزَمْتُوهْ يَرْتْفَعْ
يَاوِيلْ اللِّي مَاعْتْبَرْ
گْلَسْ عْلَى لْمَنْبَرْ
نََاوِي مَا يَنْزلْ
يَسْْمَانْ وْمَا يَهْزَلْ
وَآشْ عَنْدُو شِي عْقَلْ ؟؟
شُوفُُو اللِّي فْهَمْ هْرَبْ
بََعْدْمَاخَرَّبْ وُسْلَبْ
لْمَعْشُُوقْتُو صْحَبْ
وُمْشا لِلْحَجْ يَغْسَلْ
واللِّي حْگَرْ تََّقْبَرْ
غَبْرُو لِيهْ الأثَرْ
شَبْعُوهْ شْبيعْ الطّْبَلْ
سْلِيلْ لْفَرْعُونْ فْ لْكُونْ
دَايَخْ مَسْكينْ مَغْبُونْ
ب ْلْمَنْبَر عَاشْ مَفْتُونْ
كَرَّرْ عَيْطَةْ الجّْمَلْ
غَلُّوهْ غْلاَلْ الجْرَادْ
وَثْقُوهْ دَارُولُو صْفَادْ
يْطُوَّحْ كِيفْ لَعْجَلْ
يْحَاكْمُوهْ عْلَى لْمَحْمَلْ
عَمِّي صَالَحْ لَحْمَقْ
تَّشْوَاتْ لَحْمُو وُنْحَرقْ
لاَحُوهْ تَلْوَاحْ الزّْبَلْ
وُلْدْ السّْبَعْ لّْئِيمْ
حَاسَبْ رَاسُو فْهَيمْ
دَايِرْلُومْ فِيهَا زْعِيمْ
طَامَعْ يَخْلَدْ وُيْدُومْ
سَايَرْ يَطْحَنْ فْ لْقُومْ
يْقُولْ رَانِي مَظْلُومْ
يَحْصَدْ كِيفْ لْمَنْجَلْ
وَاشْ فَطُّومَة وْعَاتْ
ْْولِلدُّرُوسْ فَهْمَاتْ
رَاهَا لْهَابْلَة يْلاَدْوَاتْْ
وْجَمْرَتْهَازَنْدَاتْ
آشْ يْطَفِّي اللِّي شْعَلْ
وُخْرَجْ عَقْلُو وُهْبَلْ
وآشْ فْهَمْتِي يافَطُّومَة
؟؟ لْغَافْلَة مَاتَهْزَلْ
المريني ادريس
القصر الكبير بتاريخ : 05 / 09 / 2012
ليست هناك تعليقات:
إرسال تعليق