شْكُونْ يْصَدَّقْ ؟

شْكُونْ يْصَدَّقْ ؟

مَوَْقِعْ الشْقَاقْ

 وُالنْفَاقْ

بْ زْيَادَةْ  لْقُولْ

 وُالتَّلْفَاقْ غِِيِ

كُوبِّي كُولِي وْلصّقْ

طَايِشْ عَايِشْ

خَارِجْ النّْطَاقْ

كَيْعْلَمْ وْكَا يْحَقَّقْ

عْلَى لْفَايِسْ

 يْظَلْ يَسْرَقْ

 اللِّي تَّكْتَبْ

وُاللِّي تَّْنْطَقْ

النَّاسْ تْغَرَّبْ

هُوَّ يْشَرَّقْ

مَالَصْهَا

مَنْ ذَاكْ اللِّي سْبَقْ

تْزُوَّجْهَا لاَ مَهْرْ

بْ لاَ صْدَاقْ

لْمُولاَهَا غَصْباً طَلَّقْ

عَوَّالْ مَنْهَا يَسْتَرْزَقْ

يْحُطْْ خْبَارْ وْمَا يَتْحَقَّقْ

وْباغِي لَعْبَادْ تْصَدَّقْ

وَآشْ عَاقَلْ هَذَا

 وُلاَّ حْمَقْ ؟؟

حَاسَبْ النَّاسْْ گَاعْ

حْمِيرْ كَتَشْهَقْ  وُتََنْهَقْ

وُاللِّي كَذَّبْ مَاصَدَّقْ

يَدْخُلْ يَقْرَا بَاشْ يَتْْحَقَّقْ

كُولْشِي فِيهَا رََاهْ مْوُثَّقْ

مَنْ يُومْ هَاذَاكْ لَمْطَلَّقْ

السَّرْقَة عَاطِيهَا قَتْلَة

مَايَمْرَگْ عَنْدْ لْحَصْلَة

لَكْذُوبْ عَنْدُو حَطَّة بَّ طْلََة

يَعْرََفْ يْمَكْيَجْ وُيْزُوَّقْ

يْلاَقِي السْلُوكَا وُيْنَسَّقْ

يَتْلَمَّسْ يْبَحْصَصْ يَتْجَسَّسْ

الْبَقْ مَايَزْهَقْ

زَمِيلْ وْعَمِيلْ

صِيَّادْ فَنَّانْ

بْ شَلاَّ صْرُوفْ

 مِِيزَانْ وْمَسْمَارْ

يَعْبَرْ يَْدُقْ وُيْطَرَّقْ

نُونَة بْ صَابُونْ بَلْدِي

مَدْهُونَة كَتَنْسَلْ

كَتَزْهَقْ

فْ حْدِيثُو كَيْزْعَقْ

كَيْفْهَمْ فْ كُولْشِي

إِلاَّ الْحَقْ

هَاذْ الشِّي كَايِنْ

عَاصَرْنَاهْ وُبَايِنْ

شْكُونْ يْتِيقْ ؟

 شْكُونْ يْفِيقْ  ؟

شْكُونْ يْصَدَّقْ ؟؟؟

المريني ادريس

القصر الكبير بتاريخ :14 / 09 / 2012