آه ياراسي

آه ياراسي

*************

حاول تلبسني دُغْري

خذ منِّي نْصيحة ويْفادة

ياراسي وْطاوع فكري

لا تْعانَدْني لاَ تتْمادا

شفت لبْياض قصْدك بَكْري

ونْت شاردْ كيف لْعَادة

ياراسي غرَّكْ صُغْري

وخْدودك حُومَر وْرَادا

قدَّك رْشيق كيفْ لْگُمْري

ونْتايا تَرَْفَلْ فْ سْعادَة

تتْمخْتَر مرَّة وْتَجْري

ودايرفي عنقك قْلادَة

ذهبيَّة تلمع وْتبْري

ومعاها ياقوتة زيادة

مالك ياراسي صخْري

ماتتْهرَّسْ لوْ تتْآَذا

طال زْمان فيكْ انْقرِّي

ونْت رافَضْ ماتتْرَاضَا

تْروم تَرغَمْني وتْبرِّي

على سبَّة بِيهَا تتْفَادا

لُومي لِيكْ ونْتْ تَذْري

خُوفي عْليك رقَّة وهَْوَادَة

يا ذَا الرَّاس نْفذْ صبْري

راكْ تْعدِّيتِي لَحْدادَة

كان مُرادي لَوْ تسْري

فْراسك يَارَاسي لِيفَادَة

وْتَلبسْني زعْما دُغْري

راه مارايد معاك نتْعادا

ياراسي طاوَعْ فكْري

خْلاص عْليَّا ماتتْمَادا

المريني ادريس

القصر الكبير بتاريخ : 25 / 04 / 2013