سْخن لْحال

سْخن لْحال
*************
شي بنيَّاتْ بلاماتْسَالْ
وْمازال ماسْخن لْحال
قاسْهوم لهْبالْ
اللِّي مْعرّْية الظّْهَر
وُاللِّي فاتْحَة السّْدرْ
لْفُوق حْجابْ
وُلتحْت مُنكَر
وُمع مَن تَهْضَر
يازَرْوالْ
وْبينِي وبينك
ايْلا ماحْدرْتي عِينكْ
وْضَربتْ لْعين فَ لْعِين
مْشِيتي فيهَا يامسْكِين
تبْسيمَة تْحُلّْ
وْغَمْزة تَقْتل
ورْيوگْ مْدلَّية تهْطَل
وُكْلام لَغْزلْ يْشيَّر
من بُونْجُورلْ أُونْ سُوفِيرا
آرا نْمرتك هاك نْمَرتي
وْحتَّى لْ إيمايْل يْلا سْمَحْتي
نَورِّيكْ فيهْ شي تَصْويرة
وْمازالْ شِي ماشَفْتي
ادَّاكْ لَهْوَا اتَّسْحَرْتي
وَسْحُوركْ مَاليه بطَّالْ
اللِّي بْغا يفْلت مايتَّشْمت
يحْذرْ عينُو مايتْلفَّتْ
أوْ يتْخلْوا وَيْشَدَّ لْقُنْت
التِّلفُون وُلْ آيْفُون
التَّلْفزة وُلْ إيبَّادْ
فسْدت بْناتْ وُوْلاَدْ
وْمازالْ مَازَالْ

المريني ادريس
القصر الكبير بتاريخ : 16 / 04 / 2013