وْصلْت مْعطَّل
************
لْقيت الجَّذبة بادْية
ولْحرف ناطَقْ بْ شلاَّ معاني
شْربت شربة مَ لّْخابية
وگلت لَ لْحُضَّارْ هاني
سلَّمْت لْ ميرة وْشافْية
وشدِّيت الجّْمَر مَاكْواني
شْعلت الشَّمْعة الطَّافْية
وْتهْتْ َف بْحُور غِِيوَاني
خْذاني لَ عْوالمْ زاهْية
وشْحال منْ سرّْ ورَّاني
وْزان ، صْرُوفْ وْقافْية
وْبَ لْزوم الجَّذْبة وصَّاني
ويَّاكْ تَرُومْ لْ حاشْيََة
وتْگولْ خايفْ زْماني
زَوَّدْ حْرُوفَكْ بْ عَافْية
وَغْرُزْها غَرْزَة زِِِيوَاني
مادَامْ ليَّام مْواتْية
وُلْحرْف مَا هُو برَّاني
تلْقَاه لُوْذَانْ الصَّاغْية
تْقيّْمُو مْقَام سُلْطَانِي
أوْتْرفْضُو لقْلُوبْ لْغَاوْية
كْلاَم السّْفَاهَة الشِّيطَاني
النَّاسْ صْنافْ مَا متْسَاوْية
منّهُم مَجنُون ومَنّْهم عقْلانِي
كْذاك ثْمَارها غْراسْ الدَّالْية
تعْطي لَبْيَض وْلَحْمر لْقَاني
لو ماربنا وزقنا لعافية
وعْقل مْنوَّر بْنُورْ ربَّاني
نْكُونو وْحُوش ضْوَاري طَاغْية
أوْ متْفرَّقِين كلَّهَا وَحْداني
جيتْ مْعطَّل شْكارْتي خَاوْية
رْوَاتْني الجَّذْبة طَلْقَتْ
لْسَاني
طلَّقْت الصَّمْت ولْعِينْ لْعامْية
نْبُوحْ نَفْضَحْ مَاتْشُوفُو
عْيَاني
لَعْمَر زَرْبانْ والدُّنيَا
فانْية
ولْكَلمَة سْلاَح لْقَاصِي والدَّاني
المريني ادريس
القصر الكبير بتاريخ : 23 / 04 / 2013
ليست هناك تعليقات:
إرسال تعليق