الحرف السَّارد

الحرف السَّارد
***************
شي حروف ساردين وباردين
حلْفُو باللهْ ماهُم خارْجين
ومن جيهْتي مادايْزين
حيّْروني
خبّْلوني
سوَّلتهومْ
يْجاوْبونيِ
مابْغاو يْخبْروني
ماشي عْوايدهُوم يْعقُّوني
خلاَّوني حْزين
وحيت انامعاند
نغزت منهوم واحد
وبداو يتسرسبو
شي يدْلف وشي يحبو
شي ضاحك وْشي يْنين
من حرّْ صهد لْوغْد
لْعايث فْساد فْ لَبلاد
هوَّ وهولاكُو خوت
هواه تَصْحير وتْمنْشير
ف صباه كان مزموت
وْيُوم جاهْ التِّيسير
ودَّا لَخْضر لَ لْمُوت
شفقتْ لَحْروفي
جمعْت صْروفي
وقلت مكاين لاش يْخرْجو
خفْت لايتْحَرجُو
ويگولو عْليهوم : كافرين.

المريني ادريس
القصر الكبير بتاريخ : 23 / 03 / 2013

دير جهدك لا تقصر

دير جهدك لا تقصر

******************

دير جهدك لا تْقصَّر

اتَّعْطالك الضُّو لَخْضر

افْعْل ماتْريد وتبْغي

من حقَّك تْنقِّي وْتخْتار

ومن حقَّك تزْبد وْترْغي

ومن حقِّي تَانا نهْضَر

ولمَّنْ مابْغيتْ راني نصْغي

مامْعوَّد عُمّْري نشْكر

مَنْ هُو جايَرجاهَرْ يبْغي

ولا حتَّى عْوايدي نْشهَّر

ولو جات الدقَّة ف صدْغي

انَّمَا انْتايا عْليك مانصْبر

وآنا حْسابي نْعدُّو دمْغي

حاسس روحك فوق لْبشر

تسْتهَل نقَطَّر عْليك صمْغي

المريني ادريس

القصر الكبير بتاريخ : 21 / 03 / 2013

ذَاكْ اللِّي ...؟؟

ذَاكْ اللِّي ...؟؟

 

*************

مالْ سْوادْ قَلْبك قَاتم

ولْسانك شايط عْليك

تحْسبْ روحك بَ لِّ فاهمْ

ونْت ضُحْكة الاَّ يهْديكْ

عادَدْ غيركْ گاعْ بْهايمْ

وُنْت وحْدك يوْحَا ليك

نْت الدَّارَك وُنْتَ لْفَاهم

ونْت مُول لَ بُّولِيتِيكْ

وحْنا رْوايسْ أوْعْوَالمْ

ليكْ عْبيد وْبِينْ يْديكْ

تخْتار فينَا منْ يْوَالمْ

ب الرُّكوعْ يْبنْدقْ لِيك

فيكْ لْعلَّة مانْت سَالمْ

شُوفْ ليكْ حْكيم يْداويكْ

وآنَا عْليَّا نْدير اللاَّزَم

حُرّْ نْصُومَك أَوْ نرْثِيك

ماني خْليل ليكْ مْلازَم

أوْ مْتاعْ ليكْ تَمْليكْ

مانِي طالبْ ليك دْرَاهم

باشْ نْمدْحك أَوْ نهْجِيك

وَآنا شايفْ حَرفي يْأَلَّم

سَهْمُو غَابر داخَلْ فِيك

هاذي رشَّة ليكْ ياظَالم

غِي لبَس قدَّك يْوَاتِِيك

ماكان قصْدي ليكْ نْحَاكم

إنَّما زْهاگْتَك جَابْتا لِِيك

قْبل ماتنْطق عُودْ تْخمَّم

وْشُوف لْبيب لِّ يفْتيكْ

وُخْتام كْلامي لِيكْ سْلام

بينْ سْطُوري ايْلا يعْنِيك

رانِي أُمِّي لَكنْ حازَمْ

وُنْت مْعبْقَر مانْوصِّيكْ

لو تتمادا راك تندم

وتزيد تسمع مايرضيك

////////////////////

المريني ادريس

القصر الكبير بتاريخ : 19 / 03 / 2013

أنا لقصر لكبير

أَنَا اللِّي كُنْتْ مَشْهُورَة فَزْمَانِي بْلَغْرَاسِي

أَنَا اللِّي كُنْتْ عَايْلاَ لَهْلِي وْنَاسِيِ

أَنَا اللِّي مَاكَانْ حَدّْ فِيَّا يْقَاسِي

أَنَا اللِّي كُنْت لِلْغْرِيِبْ مِضْيَافَة ،

وْلِلْمَضْيُومْ ، نْصَبَّرْ وُنْوَاسيِ

وَاشْ عْرَفْتُونِي شْكُونْ آَنَا ؟

وُلاَّ غِي كَنْصَدَّعْ رَاسِي ؟

أَنَا بْلاَدْ الأَوْلِيَّا ، مَنْبَعْ لَمْجَاذِيبْ الصَّالْحِينْ ،

وْلَعْمَارَة مْتَحّْفَة

فِيَّا الدَّرْقَاوِي وُلْعِيسَاوِي ، لْهَدَّاوِي وُلْگْنَاوِي ،

فِيَّا مَنْ كُلّْ طَايْفَة

نَذْكَرْ عْلِي وُعْلِي ، سِيدِي سْلِيمَانْ وُلْفََاضْلِي ،

وْلاَلَّة عَيشَة لْعَارْفَة

عَِايْشَة الثَّانْيَة مَاخْفَاتْ ، بَجْوارْ يَعْقُوبْ لَعْتِيدْ ،

نْخَايْلُو مَازَالْ وَاقَفَة

وُوُمّْ عَسْكَرْ الشّْجِيعْ ، وْسِيدِي احْمَدْ الضّْلِيعْ ،

هُوَّ رَمْزلْمْضَايْفَة

سَيِدِي لََخْطِيبْ مَايْغِيبْ ، ذَكْرُو كَايِنُّو طْبِيبْ ،

مَقْصَدْ لَعْدُو وْلَحْبِيبْ ، بَعْدْ الله للِشّْفَا

الْهَزْمِيرِي ذَاكْ الزّْهِيدْ ُ ، اللاَّنْجْرِيِ وْمَنْصُورْ ،

رْمُوسْهُومْ وَآخَّا مْطَرّْفَة

أنا لَقْصَرْ لَكْبيرْ ، بْرَاسي مَرْفُوعْ ماخْفَا

تَاريخي مْجيدْ ،عْريقْ ، سيرْتي مَاهيشْ تالْفَة

وْلادي فُرْسانْ حرار، مَنّْهُومْ لَعْدا خايْفَة

عَانَاوْ الظُّلْمْ وُلْقْهَرْ وُصْْنَافْ الْحِيفْ وُلَجْفَا

قَالُو عَنْهُومْ غِي وْبَاشْ ،السَّرْقَة عَنْدْهُومْ حَرْفة

وُاللِّي قَالْهَا مْشَا وْرَاحْ ، غَابْ عْلِيَّا وُنْخْفَا

جْحًدْ فْضَايْلُومْ مَنْ زْمَانْ ، لْمُوسُومَة بِالصّْفَا

وْلَمْخَازَنْ شَاهْدَة عْلَى لْغَزْوَة السَّالْفَة

عَبْدْ لْمَالِكْ لًعْظِيمْ ، حَارَبْ فِيهَا وْ شَرّْفَا

سِبَاسْتْيَانْ الذْلِيلْ ، مْعََاهْ لْمَسْلُوخْ مَا كْفَا

وُعْسَاكًرْهُومْ لُوْغَادْ ، تْلاَحَتْ فَلْوَادْ جَايْفَا

قْبُورْ لْمَظْلُومْ شَاهْدَة ، عْلاَ لْمَعْرَكَة لْخَاطْفَة

شْهُودْ لْعَنْصْرَة بْلَكْمَالْ قْبُورْهُومْ بِيهَا مْتَحّْفَة

أنا لَقْصَرْ لَكْبيرْ بْرَاسي مَرْفُوعْ ماخْفَا

تَاريخي مْجيدْ وَعْريقْ سيرْتي مَاهيشْ تالْفَا

سْيُوفْ لْحُسَّادْ بِلْجْهَرْ ْديما عْلِيَّا واقْفَا

يا قْصْري ، مَهْمَا لَبعَادْ خاذْني عَنّْكْ وُطُولْ ُلْجْفا

عْلَى فْطامكْ ماصْبرْتْ ارْيايي صبْحاتْ تالْفَة

بِهْواكْ آنا نْغَنِّي وْلِيكْ نَهْدي فَنٌِي

وُقْصايْدي عْليكْ واقْفَة

المريني ادريس

القصر الكبير بتاريخ : 27 / 04 / 2012

فْ يومْ عيدكْ يالالَّة

يامََغْربيَّة يا لَلاَََّتْ لَعْيالاَتْ

عْْليكْ الشَّاعِِرْ تْكلّْمْ وُدْوَى

والزّْْجَّالْ بْْدَعْ فيكْ

وُقْصَايْد

عْلِيكْ نْظَمْ وَرْوََى

عَقْلكْ ارْزينْ

وكْلامكْ زِينْ

مْْذاقُو عْسلْ

وْلَذْ منْْْ الْحَلْوى

انْتِ يالُمِّيمََة حْبَاكْ الله

الْجْنَّة تحْتْ قْدَامْكْ

مايْعَقّْك غِي اللِّي مايْسْوا

سُبْحانْ منْ انْشاكْ

اوُ فْخْْلَقْتَكْ عَدّْلْ وْسُوََّى

ياللِّي اوْرَقْتَكْ ديمَا رابْحََة

ورْضاكْ

تُرْْياقْ وُدْوَا

رََبِّي عَلاَّ شانكْْ

ب لْحمْل كلّْفك ربِّي

انت تْولْدي وتْربِّي

ف لْقرْية تعزّْبي

تشْقايْ وتَّعْبي

تفلّْحي وتْحطْبي

تْكسْبي وتْحَلْبي

فيكْ مُعلِّمة تْقرِّي

أوْ طْبيبة تْبرِّي

فيك حْكيمة تْورًّي

وخيَّاطة تكْسي لْمعرِّي

انْتِ الكُلْْ فلْكُلْ

انْتِ الْعَشْقْ و لَهْوَا

يَّامَكْ كُلْها عيدْ

يالصَّابْرَة عَالْ الضَََّّنْكْْ وُالْقَسْوَة

صََابْرََة صْبَرْ الزَّيْتُونََة عْ لْمََا وُالرّْْوَا

صْبََرْ أَيُّوبْ عَا لْبَلْوَى

شْكُونْ يْرُدّْْ جْمَايْلَكْ مْنْ لََعْبَادْ

شْكُونْ يْْدَخّْلْْ لْقَلْبَكْ السَّلْوَى

يالْمَقْصُودََة بكْلامي

ليكْ نهْدي ْسلامي

شوْقي ليكْ

فْكُلّْ ساعَة يْزيدْ يَقْوَا

وحْدكْ بعد اللهْ يا لُمِّيمَة

ياللِّي ساتْراني بِرْضاكْ

أَنْتي ليََّا نجْمَة ضُوَّاية

وُقْمرْ فَ سْمايا

على وُدَّكْ قايمْ لْكونْ

بْلابيكْ تاشِي مايكُونْ

لاطٌعْم لامْذاقْ لا لُون

الدَّنيا يْصيبْها الجّْنُونْ

المريني ادريس

القصر الكبير : 18 / 03 / 2012