عِلمُها عندَ ربِّي

عِلمُها عندَ ربِّي

******

منْ ذاكْ لْكُدية طاحَتْ لَمْنامة
تْهرّْست وطارو شْقُوف لحْلامة
وبنْ سيرينْ ماجْبر مايقفَّل
لاحْ التَّفسِير وتْعاطا لَّ حْجامة

*********
المريني ادريس
القصر الكبير بتاريخ : 28 / 09 / 2013

سُبْحَان منْ لايسْهَا

سُبْحَان منْ لايسْهَا

*********
دَازْعَ لَّقْصيدة
حْسبْها صَابَة فَ حْصيدة
وْصار يْذرِّي فْ لحْرُوف
تْشعْتر لكْلامْ
ومْشاتْ لمْعَاني بْعِيدَة

**************
المريني ادريس
القصر الكبير بتاريخ : 28 / 09 / 2013

ربِّي يَخْلَفْ

ربِّي يَخْلَفْ

********

طَاحَتْ لَحْرُوف
فْ ضايَة لَقْصِيدَة
وْماهي عوَّامَة
اتَّحْرگْ السّْطَرْ
مَ لّْخوفْ
عْليهَا وْهيَّ وْليدَة
عينْ لَمْدَادْ تْشُوفْ
وْماگَادَّ لَقْلَمْ يَدْمَعْ
أَوْ يْطلَّعْ تنْهِيدَة

***********
المريني ادريس
القصر الكبير بتاريخ : 28 / 09 / 2013

بِينِي وْبينَكْ

بِينِي وْبينَكْ

********

گول عليا نگول عليك
قطَّع فيا نشرَّگ فيك
ياك حنا غِ عرب
تجمعنا زريبة
فيها حْبيبة
وْعصير عْنبْ
ياك حنا غِ عرب
كلامنا كذوب
فعالنا نا تْلاَوي
ينفخنا لخاوي
ويْفشّْنا السَّماوي
ريقنا كيماوي
وصرفنا جمرة خبيثة
تزندنا تزغريتة
تطفينا بخَّة من گْليتة
يخذَّرنا دولار
يستغبينا شفَّار
ف كل موسم يبْني عقَّار
وْشُوف فيَّا نْشُوف فِّيك

***********
المريني ادريس
القصر الكبير بتاريخ : 29 / 09 / 2013

يَالايَمْنِي

يَالايَمْنِي

********

يَالايَمنِي عَ لَّغْرام
ومانْت ذاري لِيه
لحُبّْ ماهُوشْ حرام
ايْلا نْتايَا جرَّبتيه
تشْرق شمْسُو ف ظْلام
لْقلب ينوَّر بيه
يصيْرو كِ عش حْمام
لْحَنانْ وَالدْفا مَالِيه
ايْلا نْتَ قلْبك مضْيام
بَعَّدْ خُويا لْذَاك الجِّيهْ
وْسمَّعْني صَْلاَ وسْلاَمْ
وَجْهك عنِّي ذَارِيهْ
كنْتْ نْحسْبك مَقْدَامْ
وحْصنْ لهْوا غَازِيهْ
خابْ ظنِّي فيكْ ياهُمَامْ
طْلعْتيلِي جاهَل فِيهْ
وَسْمعْ منِّي ذَا لْكْلاَم
ايْلا نْت فْهمْتي مْعانِيه
مادُمتِي قاصَر ياغْلام
طْريقِي بعَّدْ عْليهْ
خلِّيني فَ هْوا لَرْيَامْ
يَجْلينِي ولاَّ نَجْلِيه

*************
المريني ادريس
القصر الكبير بتاريخ : 30 / 09 / 2013

مَاشِي بْعِيدْ

مَاشِي بْعِيدْ

*******

شلاَّ ماتذْري يامُوسى
لْعين تبْكي دْموعها دمّْ
ولْقلْب خَارْطاهْ السُّوسَة
لاما يْوخَّر لاما يْقدَّم
النَّخْوة ف ذاتْها محْبُوسة
مَغْلُولة تْكابد لْهمّْ
ولْحقّْ سْرايْرو مَطْمُوسَة
شْكُون يدْوي أوْ يَتمْتَم
وَلوْ بْ حجَّة ملْمُوسَة
زْمان الشِّيخ وْلَمْقدَّم
والتُّهمَة واجْدة مدْرُوسَة
تَا لْقَاضي ماكانْ يحْشَم
لحْكَامْ جَايُّو بَ لْكمُّوسَة
طايَعْ لسْيادُو وَ يْعظَّمْ

************
المريني ادريس
القصر الكبير بتاريخ : 30 / 09 / 2013

آشْ وجَّدْتِيلُو ؟

آشْ وجَّدْتِيلُو ؟

*******

ياللِّي بحُبّْ الدُّنيا تْعادا
وآش جْنيتي شي يْفادة
شْحال جمْعتي ولمِّيتي
لحْتيه وْراكْ ومْشِيتِي
صرْطك لقْبر يَاهَاذا
مامنْعاتو غْلاضَة
وْماهمَّاتُو قرْفَادة
وحْدكْ غْريبْ
لاوْنيسْ لاحْبيبْ
حتَّى وَلاَ وْسَادَة
كنْتي فْ همَّة وْشَان
نَاشِي زَاهِي سَكْرَانْ
تَاوي بينْ لْخِلاَّنْ
جْواري وعْبِيد
وَرْكاوِي نْبِيذْ
ورْيام راقْصة تتْهَادَا
ماوَعْظكْ شِيبْ
وَلاَ اللِّي صارْ غِيبْ
ف لقْبَر ماتْفيِد مْناصَب
وحْدك لْيُومْ تتْحَاسََب
وَعْلى زلاَّتَك تتْعَاقْب
مَاليكْ عْليه سُلْطَان وَلاسْيادَة

**************
المريني ادريس
القصر الكبير بتاريخ : 30 / 09 / 2013