الْكونِيكْسْيُون

الْكونِيكْسْيُون

 *********************

سْمعت تْسرْسِيرَة
فزَّاعة
هزِّيت السَّمَّاعة
طبْعا التِّلفُونْ
گالِّي : پَّارْدُونْ
راني بِدُونْ
گلت ليه وضَّح يامغبُون
گالِّي :
عاطل
وُبْلاهويَّة
متْهُوم
وبْلا قضيَّة
وحتَّى صُورْتي
وهْميَّة
يمْكن تْكُون أنَا
يمْكن يْكون غِي لُونْ
قْطع لْخطَّ وْخَلاَّني
كْلامُو بْلا مانقْراه
عْمَاني
وخلاَّني مرْهُون
ودْخَلني الشَّكّْ
وَآش آنا وُلاَّ هوَّ
وَاحد فينَا أكيدْ مجْنونْ
كانت حلامة
طْلَع لْكونِيكْسْيُون

المريني ادريس
القصر الكبير بتاريخ : 14 / 04 / 2013

آش بلاك ياعويشة ؟

آش بلاك ياعويشة ؟

*****************
اللهْ عْليكْ ياعْوشة
وآشْ بْلاك بالشِّيشة
طول حيَاتك دَرْويشة
شْكون سْبابك گُولِّي
داركوم رسلوك تقراي
وگالوليك تْهلاَّيْ
باشْ ترْقا وتتْعلاَّي
كنْتي زينة وْتسْواي
گلْتي لَّ حْيا بايْ بايْ
بْلا حتَّى ماتْسوّْلي
كنْتي شابَّة مرْضيَّة
قدَّامْ داركُوم محْضيَّة
ف عْيُون النَّاس دُغْريَّة
يُوم رحْتي لَ لْ كُلِّيَّة
ادَّاتَك مُوجة عصْريَّة
نْسيتِي حتَّى لْعرْبية
رْجَعْتي للدَّارْ مبْليَّة
عْلى لكْمايَة تْقيّْلِي
تَبََّعْتي ريّْ صْحابَاتك
لَقراية بْ دُورْها مانفعاتك
ضيَّعْتي وقْتك لْ ذاتك
ايَّام شْبابَك غَادْراتَكْ
حتَّى لْعُنُوسة سكْناتك
ومازالة تبْرمي وتْفتْلي
لشِّيشة تْزنْدي وتْشَعلي
للهْ فينْ نَّاوية تْوصْلي

المريني ادريس
القصر الكبير بتاريخ : 11 / 04 / 2013

قالولي اسكت

قالولي اسكت

ومازال شيما قُلت

آنا عادغانقول

عْلى الشّْفَارة

وعْلى أ:1 حضارة

رجْعت عبارة

نْقُول عْلى لْمعقُول

اللِّي مالْمسْت

نْقول على السَّبْحة

والذَّبْحة

وُعْلى لمذْلُول

اللِّي رْجَع غُول

وعلى مول الدِّين

والتّْمسْكين رْجع

غصَّاب بعْد التَّمْكين

على مُول النَّطْعة ف السَّنطِيحة

وُشْحَال دارْ من فْضيحَة

نْخرَّج لَكْلام وْما نصْمتْ

گلْبي وَگْلُوب النَّاسْ عامْرة

اللِّي اتَّكْوا بْ جَمْرة

واللِّي اتَّكوا بْ هَضْرة

واللِّي اتَّخْذع واتَّشْمت

واللِّي حْليبُو رْجَع زفْت

نْگُول عْليك يا الظَّالم

مقنَّع فْ صيفْت عَالم

مْساوي لنْعام بَ بْنَادم

رايدْ غِيرك يتْلاَطَم

ياكْما طامع تخْرُج غانم ؟

وْبَ لْهمْزة ناوي تسْلت

نگُول عْلَى التَّعْمير

وْسفَّان جْياب لْغِير

نْگُول عْلى التَّسْيير

وْسُوءْ التَّدبِير

نْگُول عْلى غزْوتْ لَحْمير

لْ فضَاءْ لَقْصر لكْبير

بْراز وْرَوْث

نْگولْ عَ لَّمْخَنَّث

عَ لِّ تْوظَّفْ بَ لْواسِيطَة

بْ همْسة بْسيطَة

فاز وفْلت

نْگُول عْلى بُورَاس

وْإقَامة دَالاَسْ

ماهي نُقرة ولاَنْحاس

فيها بگْرة وْشجْرة

وْآلفْ عسَّاس

فيها لْبيعْ وُالشّْرا

وْشي مسَائِلْ خْرى

بْلانعْثْ

نْگُولْ عْلى لْفرُّوجْ

وْلفْلالَس بْجُوجْ

طلْعُو بْلادْروجْ

نْگُول عْلى زهْري لمْعوًّج

كانْ بْ الزَّلْط مْجَوَّج

قلَّشْ وْروَّجْ

لمَّاوْرقْتُو حَكْمَت

نگُول عْلى لْبحْلاسة

لْقالْبين الدّْواصا

سْماسْريَّة ف لْمدرسة

هذا ديالْنا وْهذا يتْباصا

هُوما الرَّاي وُالشّْْوار

وْهُوما اصْل لْمُنْكر

داخل وْخارج لقْصر

كُلَّ ساعة وكلّْ وقْت

نگُول عْلى مولْ لبِّيكالة

وحْوايج الدّْلالة

الشَّافْ لْهرَّاف

حلاَّلْ لْمسْأَلة

يْلا تعقّْدت

مازال نتْكلَّم

وْمازال نْگُول

ياكْ آنا غي بهْلُول

وُ فْ نَظركْ بْهِيمْ

ونْت عبْقري فْهيم

بصَّحْ ماناشْ عْديم

ولاَّ فْحالك لْئِيم

خلِّي لْساني يَفْلت

وْلاَ تْقُولِّيشْ أُسْكُت

ماجَايْشِي نَتْجَدَّاك

وَلا هِيَّ دار ابَّاك

هاذِي راها إِدارة

ونْت عبَّاد الشّْكارة

حْسابك مايفْلت

غي لا تْقُولِّيش اسْكُت

المريني ادريس

القصر الكبير بتاريخ : 26 / 03 / 2013

حرّْ لَقهَر

حرّْ لَقهَر

**********

من حرّْ لَقهَر

تْعلَّمت الصَّبر

ومن كيّْ الجّْمَر

وْنار لَغْدر

تعلَّمْت كْثر

ومْع دْوازْ لَعْمر

عرفْت نميَّز

آلنُّقْرة من التّْبر

وُلْمعْدن منْ لَحْجَر

وعْرفت لْحياةْ سْفر

وْلِسْتراحَة قْبَر

وتعجَّبت بْلا قْدَر

لَ لِّ ما اعْتْبَر

وْما زَال صارّْ عَ لّْمُنكر

عاجْباهْ فْعايْلو مَاتْبصََّرْ

لَ لْحرام ساجدْ يْكبرْ

بْ شيطانُومنْصورْمظفَّرْ

وْياوِيلُو يومْ لْمَحْشر

يُوم مَا لَمْكان وُالجَّلْد

يشْهد وْيهْضَر

وصْحاف عْمالُو تَتْحْضََّر

وْعَ لَّمْلا فْضَايْحُو تَنْتشَر

سَاعتْها مايعْتب مايتْحسَّر

ايْلاَ ماربِّي تْجاوزْ وغْفَر

الله يَحفَظنا جْميع منْ سْقَر

المريني ادريس

القصر الكبير بتاريخ : 02 / 04 / 2013