اشْطَحْ وُرْدَحْ

    اشْطَحْ وُرْدَحْ

***************************

    اشْطَحْ وُرْدَحْ

وْمُولاَهَا رَبِّي

    لاَ تَهْتَمْ لاَ تَغْتَمّْ

 لاَ تْكُونْ كُوعْبِي

    يْلاَ ضْيَاقْ عْلِيكْ لْحَالْ

 صَلِّي عْلَى النَّبِي

    وُاللِّي مَاصَدَّقْ

 يَسْتَفْتِي فْقِيهْ لاَگْرَِيمَة

     يَجْبَدْ لِيهْ فَتْوَى قْدِيمَة

    تَعْجَبْ نَجْلاَءْ وْفِيفِي

وْطَاطَا حْلِيمَة

    مَوَازِينْ فَرْضْ وْسُنَّة

 وَوَاجِبْ وَطَنِي

    فِيهَا لَطْرَشْ يْدَرْدَكْ

وُالزِّيزُونْ يْغَنِّي

    بِيهَا لاَلَّة مُولاَتِي

 وْسِيدِي مُولاَيْ فَرْحَانْ مْهَنِّي

    مَامْسُوَّقْ حَدْ

 لِلشْتَا لْمَحْبوسَة وُلْجَفَافْ

    وُلاَّ لِ ِلْ أَعْرَاضْ لْمَهْتُوكَة

وُلْفُقْدَانْ لْعَفَافْ

    آشْ هَاذْ لْمُوصِيبَة

اللِّي صَبْحَاتْ كِي الضَّرِيبَة ؟

    لاَ مَنْ يَسْتنَْكَرْ

لاَ مَنْ يْعَارَضْ

ويرْفَضْ هَاذْ لَغْرِيبَة

    شِي جَايَّة مَنْ لْمِيرِيكَانْ

 وْشِي جَايْ مَ لْفَاتِيكَانْ

    وُالشَّعْبْ مَضْرُوبَة فِيهْ

عَرْيَانْ

وُحْمَارْ الشِّيخْ

 وْقَفْ فْ عْقِيبَة

    مَا گَادْ عْلَى تْحَرنِيطْ

وَلاَ ْتزَعْرِيطْ

 فْحَالْ ذُُوكْ

 اللِّي فْ الزّْرِيبَة

    هَذَا رَاهْ النِّفَاقْ

 وُالتَّعْيَاقْ

 بَاللهْ عْلِيكُومْ

آشْ هَاذْ السِّيبَة ؟؟

    المريني ادريس .

 القصر الكبير : 30 / 03 / 2012

عْرَفْتَكْ زْوِينَة

عْرَفْتَكْ زْوِينَة 

******************

عْرَفْتَكْ زْوِينَة

وُمْفَاتْنَكْ خَلاَّبََة

عْيُونَكْ جَذَّابَة

وُضْحَكْتَكْ مَْسيَابَة

تْْوُزْعِيهَا عَالْ

كُلْ بَرْتَابَة

عْرَفْتَكْ زْوِينَة

فْ ظَاهْرَكْْ حْنِينَة

تَمْشِي فْ سْكِينَة

رَافْضَة لْهَمْ

رَافْضَة لَغْبِينَة

عْرَفْتَكْ زْوِينَة

وْمَصْوابَة

تْصَدْحِي الطِّيرْ

 بَ صْوَابَكْ

يْلاَزَمْ بَابَكْ

تْخَلِّيهْ يْحَلقْ فْ جْنَابَكْ

يْشَقْشَقْ وُيْغَنِّي

وُلْنفْسُو يْمَنِّي

لِيكْ بَقْرَابَة

عْرَفْتَكْ زْوِينَة

وُمْفَاتْنَكْ خَلاَّبََة

عْيُونَكْ جَذَّابَة

لَكِنْ خْسَارَْتَكْ

... كَذَّابَة !!!!

المريني ادريس

القصر الكبير بتاريخ : 14 / 10 / 2012

يوم عيد المرأة

يوم عيد المرأة 

 

**********************

يامََغْربيَّة يا لَلاَََّتْ لَعْيالاَتْ

عْْليكْ الشَّاعِِرْ تْكلّْمْ وُدْوَى
والزّْْجَّالْ بْْدَعْ فيكْ

وْفقْصَايْدُو

عْلِيكْ نْظَمْ وَرْوََى
عَقْلكْ ارْزينْ

وكْلامكْ زِينْ

مْْذاقُو عْسلْ

وْلَذْ منْْْ الْحَلْوى
انْتِ يالُمِّيمََة حْبَاكْ الله

الْجْنَّة تحْتْ قْدَامْكْ

مايْعَقّْك غِي اللِّي مايْسْوا
سُبْحانْ منْ انْشاكْ

اوُ فْخْْلَقْتَكْ عَدّْلْ وْسُوََّى
ياللِّي اوْرَقْتَكْ ديمَا رابْحََة

ورْضاكْ

تُرْْياقْ وُدْوَا
رََبِّي عَلاَّ شانكْْ

انْتِ الكُلْْ فلْكُلْ

انْتِ الْعَشْقْ و لَهْوَا
يَّامَكْ كُلْها عيدْ

يالصَّابْرَة عَالْ الضَََّّنْكْْ وُالْقَسْوَة
صََابْرََة صْبَرْ الزَّيْتُونََة عْ لْمََا

صْبََرْ أَيُّوبْ عَا لْبَلْوَى
شْكُونْ يْرُدّْْ جْمَايْلَكْ مْنْ لََعْبَادْ

شْكُونْ يْْدَخّْلْْ لْقَلْبَكْ السَّلْوَى
يالْمَقْصُودََة بكْلامي

ليكْ نهْدي ْسلامي

شوقي ليكْ

فْكُلّْ ساعَة يْزيدْ يَقْوَا
تْفكَّرْتكْ يا لُمِّيمَة

ياللِّي كُنْتي ساتْراني بِرْضاكْ
كٌنْتي ليََّ نجْمَة ضُوَّاية

وُقْمرْ فَسْمايا

وقْتاشْ يكْتابْلي نَلْقاكْ
الشوقْ ليكْ حْرَقْْ كْبادي

وْذاتي قلبي عَمْرُو مانْساكْ
لُوْكانْْ حْسبْتْ فْراقك ْعني يْطُولْ

لُوكانْ راني مْْشيتْ

وْرْحَلْت مْعَاكْ

المريني ادريس القصر الكبير : 18 / 03 / 2012

لْحُبْ مَاتْ

لْحُبْ مَاتْ

******************

لْحُبْ مَاتْ وْسَالاَ

وُبْقَاتْ غِي لَبْسَالة

لْحُبْ مْشَا مْعَ اللَّوَالاَ

شَنّْكُوهْ وْبَهْدْلُوهْ التْوَالاَ

لْحُبْ مَاتْ وْسَالاَ

لْحُبْ كَانْ رْبَاطْ

كَانْ قَيْدْ وْسَلْسَْلَة

مَابِينْ لْوَلْدْ وُالطَّفْلَة

لْحُبْ خَيْطْ مْتِينْ

بِينْ لَ ثْنِينْ

صْفا وُوْفَا

قْلُوبْ مَتْوَالْفًة

انْسِجَامْ وُدْفَا

وُعَْوَاطَفْ مَتْبَادْلَة

وُزْوَاجْ لْحُب

مْنُوَّرْ يَتْلاَلاَ

لْحُبْ مَاتْ وْسَالاَ

لْحُبْ مَاتْ

يُومْ بْدَا لَحْسَابْ

لْوُدْ غَابْ

وُالظَّنْ خْيَابْ

وُالزَّوَاجْ عَابْ

مَابْقَاتْ تْمَارَة

غِي هَاكْ وَآرَا

هِيَّ شْحَالْ تَرْبَحْ

وْهُوَّ شْحَالْ فْ

الشّْكَارَة

طَالْبَاهْ مْوُظَّفْ

وْبَاغِيهَا مْوَظْفَة

مَنُّو تَتْسَلَّفْ

وُمَنْهَا يَتْخََفَّا

لْ أَهْدَافْ مَتْقَابْلَة

وُيْلاَ لْحَقْ تَّجْهَضْ

لَعْفُو يَتَّرْفَضْ

وُزّْوَاجْ عَادْ مَهْزَلَة

لْحُبْ مَاتْ وْسَالاَ

وُبْقَاتْ غِي لَبْسَالة

لْحُبْ مْشَا مْعَ اللَّوَالاَ

شَنّْكُوهْ وْبَهْدْلُوهْ التْوَالاَ

وَآشْ فْهَمْتُونِي وُلاَّ لاَ ؟؟

المريني ادريس

القصر الكبير بتاريخ : 11 / 10 / 2012

بْلاَدْ لْخِيرْ

بْلاَدْ لْخِيرْ

 
********************

قَالُو عْلِيكْ بْلاَدْ لْخِيرْ
بْْْْلاَدْ لْمَا وُلخُضْرَة
وُلْوَجْه لْحَسنْ
خِيرَكْْ تْبَاعْ لِلْغِيرْ
وْحُسْنَكْ هْجَرْ لْوَطَنْ
اللِّي رْجِينَاهْ لِلتَّغْييِرْ
صَارْ فِينَا يْمَحَّن
َيَضْرَبْ الطَّرْ وُلْبَنْدِيرْ

وُ فْ خْطَابُو يَتْفَنَّنْ
وُيْلاَ عَارْضُوهْ لْغِيرْ
يَجْبَدْ لْمَلَّة وُالدِّينْ
حِينْ طْلَعْ للَِّتنْظِيرْ
طَلَّعْ قْصِيدْ مْلَحَّنْ
خْرجْ بْ أَمْرْْ وْتَقْرِيرْ
وُزَادْ فْ السُّوقْ دَرْهْمِينْ
ضَحَّكْ لَكْبِيرْ وُالصَّغِيرْ
وْهَجَّرُو لِلْْمَزْلُوطْ مَسْكِينْ
نْطَقْ رَايِسْ التَّحْرِيرْ
بَعْْدْ سْمَعْ وُتْمَعَّن
هَاذْ الشِّي رَاهْ كْثِيرْ
الدَّرْوِيشْ غَا يَتْجَنَّنْ
بَآشْ يْعَمَّرْ الطَّنْجِيرْ ؟
وَآشْ التَّفَّاحْ طْحِينْ ؟
أَوْلْبَنَانْ يْلِيقْ يَتَّعْجَنْ ؟
مَلِّينَا سَرْدْ لْحَلْقَة وُالنْگِيرْ
وُكْلاَمْ الزَّنْقَة بْلاَ تََصْبِينْ
عْدََفْنَا وُكْرَهْنَا فْكَارْ لْغِيرْ
وُدْيَالْنَا لْ تَحْتْ دْفِينْ
قََانُُونْْ السِّيرْ مْْسَوْسَرْ
وُالتَّعْلِيمْ وْفَا وُتْرُوَّنْ
لَحْكََام عْمَشْ مَابْصِيرْ
ل ْإعْلاَمْ تْخَلَّّفْ وُتْقَنَّنْ
السَّكَنْ تْْقَدَّمْ بْ لْقَزْدِيرْ
وُالطِّبْ تْوَرَّدْ وُتْعَفَّنْ
لَفْلُُوسْ نَزْرُو بْ التَّبْذِيرْ
ْزرَعْنَا وُُُلْحُوتْ تْخَشَّن
دَوَّدْتُو التَّعْلِيمْ لَكْبِيرْ
وُبْ الشِّيبْ بْغِيتُوه يَتْحَسَّنْ
بْلاَدِي طَارْ مَنْهَا لْخِيرْ
مْشَا لِلْغِيرْ تْسَالاََ مَاتْ
وُتَّدْفَنْ مْسِيكِينْ .

المريني ادريس

القصر الكبير بتاريخ : 26 / 09 / 2012