صْبَاحْ بْلاَدِي

صْبَاحْ بْلاَدِي

*********************

صْبَاحْ الشّْتَا وُلْغِيِسْ

صْبَاحْ التَّكْمَاشْ وْلَغْطِيسْ

 صْباحْ لْبَرْدْ وْلَغْطَا بْ التَّلِّيسْ

 صْبَاحْ لْخِيرْ وُالتَّشَمْكِيرْ

 صْبَاحْ الضَّبَابْ  فْ لَقْصَرْ لَكْبِيرْ

وُسْطْ لَمْدِينَة عَامَرْ حْمِيرْ

وَاشْ هَذَا تَغْيِيِرْ ؟؟

 بْنَادَمْ حَارْ بْ التَّفْكِيرْ

خَانُو التَّعْبِيِرْ

كِ لَكْبِيرْ كِ الصّْغِيرْ

كَثْرَتْ السَّرْقَة

وُ الشَّمَّانْ فْ لْخَرْقَة

لَگْرِيِسَاجْ فَ الزَّنْقَة

فِينْ لْمَخْزَنْ لْ آمِرْ ؟

 فِينْ أَهْلْ لحَلْ

وُالتَّدْبِيرْ ؟

فِينْ لَمْكَلَّفْ بِالتَّسْييِرْ ؟

الصَّغِيرْ تَالَفْ

 الشَّيخْ شَارَفْ

 لَكْبِيرْ خَايِفْ

لْمَسْؤُولْ هَارَفْ

وُلْمَخْزَنْ شَايِفْ

وْعَارَفْ

وُعْلاَشْ مْخَبَّعْ

 وُمْقَوْقَعْ

آشْ كَيْدِيرْ ؟؟

فِينْ بَنْكِيرَانْ ؟؟

وُ خْوَانْجِيَّةْ لْبَرْلَمَانْ ؟؟

 نَايْمِينْ بَارْكِينْ عَِالْ شْخِيرْ !!!!

عْدَادْهُومْ رَبَْعَة

مَاتْلَمْهُومْ جَمْعَة

صْبِيطَارْ مَخْصُوصْ

لْمُوَاطِنْ مَفْقُوصْ

لا َأَمْنْ لاَأَمَانْ

السِّيبَة والطُّغْيَانْ

وَلاَحَدّْ فِيهُومْ بَانْ

فِينْ وَعْدْكُومْ بِ التَّطْوِيرْ ؟

شْهَمْتُونَا بَ لْمَعْسُولْ

بْخِيرْ لَكْلاَمْ وُلْقُولْ

 وَآشْ كَايِنْ شِي مَعْقُولْ ؟؟

 بَ لْفِعْلْ وُلْمَفْعُولْ

 أَوْ مَايْكُونْ غَ لْخِيرْ

 تَسْوِيفْ وُتّْجَرْجِيرْ ؟؟

المريني ادريس

القصر الكبير بتاريخ : 30 / 04 / 2012

اليَوْمُ العَالَمِي لِلأُسْتَاذْْ

اليَوْمُ العَالَمِي لِلأُسْتَاذْْ

*******************

فْ يُومْ عِيدَكْ يَا أُسْتَاذَة ، يَا أُسْتَاذْ

يَاللِّي بَ فْضَلْكُومْ تْفَقَّهَتْ لَعْبَادْ

دْحَرْتُواجّْهَالَة ، وْنُورْ لْعِلْم  تْقَادْ

ارْفَعْتُولْخَلْقْ ، عْلاَشَانُو، وْسُومُوتْزَادْ

بَعْدْ كَانْ بْهِيمْ ، فْ أَرْضْ اللهْ يْهِيمْ ،

طَالَعْ هَوَّادْ

يَا أُسْتَاذْ يَاأُسْتَاذَة ، رِسَالَتْكُومْ

عْبَادَة وُ جْهَادْ

فْ أَرْضْ لُوطَانْ مْفَرَّقِينْ ،

صَابْرِينْ مْكَابْرِينْ ،

عْلَى جُورْ التَّعْيِيِنْ ،

هَاللِّي فْ الجّْبَلْ ،

هَا للِّي فَلْوَادْ

وُلْوِزَارَة عْلَى تَرْتََابْكُومْ ،

شَادَّة فْ لَعْنَادْ

شِِي دَايْرَالُو دْرُوجْ

وْشِي مْرَكْبَاهْ مِصْعَادْ

يْلاَ لُُوْزِيرْ تْقَوْقَعْ

فِ بْلاصْتُو وُتْخَبَّعْ

لْ مِلَفّْ التَّّعْلِيمْ مَارَاجَعْ

وُعْلَى لْ أُسْتَاذْْ مَا دَادْ

يَطْلَبْ السّْمَاحَة وُالتَّسْلِيم

لِنْسَا وُرْجَالْ التَّعْلِيِمْ

وُيْعْتَرَفْ بَ اللِّي

لْ أُسْتَاذَة وُلْ أُسْتَاذْ

بْ تَضْحِيَّاتْهُومْ

فِِِ مْصَالَحْهُومْ

فِعْلاً زُهَّادْ

فْ خِِدْمَةْ لَوْطَنْ

فِعْلاً خِيرْ لْعُبَّادْ

فْ يُومْ عِيدَكْ يَا أُسْتَاذَة ، يَا أُسْتَاذْ

يَاللِّي بَ فْضَلْكُومْ تْفَقَّهَتْ لَعْبَادْ

دْحَرْتُواجّْهَالَة ،

 وْنُورْ لْعِلْم بْ جْهُودْكُومْ شَعْشَعْ وُتْقَادْ.

المريني ادريس 

القصر الكبير بتاريخ : 02 / 10 / 2012

مُوسَمْْ التّْقَوْلِيِبْ

مُوسَمْْ التّْقَوْلِيِبْ

*****************

تْقًوْلَبْتِي يَا لْكَامْبُو
بَعْتِي صُوتَكْ بْ دُولاَرْ
عْلِيكْ صَارُو يَتْلاَعْبُو
لَمْخَيَّرْ فِيهُومْ شَفَّارْ
كُلْ وَاحَدْ وَآشْ نَََاسْبُو
مِنْ لَقَبْ وْيَخْتَارْ
يَرْسَمْهَا فُوقْ حْوَاجْبُو
زَعِيمْ أَوْمُسْتَشَارْ
لَقَبْ وَاحَدْ مَا عَاجْبُو
لْسِيدِي لْحَاجْ اخْتَارْ
النَّاسْ تَتْسَابَقْ فْ بَابُو
بَاغْيَاهْ يَقْضِي لُوْطَارْ
اللِّي مَادّْ لِيهْ كْتَابُو
وُاللِّي مْوُسَّطْ سَمْسَارْ
اللَّي يْمَسَّحْ فِ ثْيَابُو
وُاللِِّي مْنَزَّلٌّو لْعَارْ
وْهُوَّ مْخَرَّجْ نْيَابُو
تْگُولْ غِ قَانَعْ وُسْعَارْ
هَاذِي خْصَايَلْ مَنْ نَابُو
عْلَى شَعْبْْ اللهْ لْمَحْتَارْ
غِِيرْ اللَّي جَا يَصْطَابُو
يَسْتَاحْمْرُو فْ نْهَارْ
وُيْقُولُو شْكُونْ سْبَابُو
مْوَخْرُوعَا لِّزْدِهَارْ
كُلَّ قْطِيعْ لِيهْ ذْيَابُو
يْمَزَّگُ فِيهْ بَ لْمُنْشَارْ
كُلّْهَا يَضْرَبْ حْسَابُو
يْشُوفْ لْوَطَنْ كِ صَارْ
يْرَتَّبْ عْلَى تَرْتَابُو
يَسْتَنْكَرْ لِ لْمُنْكَارْ
لاَ لِلْفَسَادْ وُحْزَابُو
لاَ لِِلْمُجُونْ وُلْعَارْ
لاَ لِلْفَاسِدْ بِ قْرَابُو
لَ الذُّلّْ وْلِسْتِهْتَارْ
وُيْلاَ لْ أُمُورْ صْعَابُو
نْقُومُو كِيفْ الثٌّوَّارْ.

المريني ادريس

القصر الكبير بتاريخ : 01 / 10 / 2012