أَنَا لَقْصَرْ لَكْبِيرْ

أَنَا لَقْصَرْ لَكْبِيرْ

أَنَا اللِّي كُنْتْ مَشْهُورَة فَزْمَانِي بْلَغْرَاسِي

أَنَا اللِّي كُنْتْ عَايْلاَ  لَهْلِي وْنَاسِيِ

أَنَا اللِّي مَاكَانْ حَدّْ فِيَّا يْقَاسِي

أَنَا اللِّي كُنْت لِلْغْرِيِبْ  مِضْيَافَة ، وْلِلْمَضْيُومْ ، نْصَبَّرْ وُنْوَاسيِ

وَاشْ عْرَفْتُونِي شْكُونْ آَنَا ؟ وُلاَّ غِي كَنْصَدَّعْ رَاسِي ؟

أَنَا بْلاَدْ الأَوْلِيَّا ، مَنْبَعْ لَمْجَاذِيبْ الصَّالْحِينْ ، وْلَعْمَارَة مْتَحّْفَة

فِيَّا الدَّرْقَاوِي وُلْعِيسَاوِي ، لْهَدَّاوِي وُلْگْنَاوِي ، فِيَّا مَنْ كُلّْ طَايْفَة

نَذْكَرْ عْلِي وُعْلِي ، سِيدِي سْلِيمَانْ وُلْفََاضْلِي ، وْلاَلَّة عَيشَة لْعَارْفَة

عَِايْشَة الثَّانْيَة مَاخْفَاتْ ، بَجْوارْ يَعْقُوبْ لَعْتِيدْ ، نْخَايْلُو مَازَالْ وَاقَفَة

وُوُمّْ عَسْكَرْ الشّْجِيعْ ، وْسِيدِي احْمَدْ الضّْلِيعْ ، هُوَّ رَمْزلْمْضَايْفَة

سَيِدِي لََخْطِيبْ مَايْغِيبْ ، ذَكْرُو كَايِنُّو طْبِيبْ ، مَقْصَدْ لَعْدُو وْلَحْبِيبْ ، بَعْدْ الله للِشّْفَا

الْهَزْمِيرِي ذَاكْ الزّْهِيدْ ُ ، اللاَّنْجْرِيِ وْمَنْصُورْ ، رْمُوسْهُومْ وَآخَّا مْطَرّْفَة

أنا لَقْصَرْ لَكْبيرْ ، بْرَاسي مَرْفُوعْ ماخْفَا

تَاريخي مْجيدْ ،عْريقْ ، سيرْتي مَاهيشْ تالْفَة

وْلادي فُرْسانْ حرار، مَنّْهُومْ لَعْدا خايْفَة

عَانَاوْ الظُّلْمْ وُلْقْهَرْ وُصْْنَافْ الْحِيفْ وُلَجْفَا

قَالُو عَنْهُومْ غِي وْبَاشْ  ،السَّرْقَة عَنْدْهُومْ حَرْفة

وُاللِّي قَالْهَا مْشَا وْرَاحْ ، غَابْ ع عْلِيَّا وُنْخْفَا

جْحًدْ فْضَايْلُومْ مَنْ زْمَانْ ، لْمُوسُومَة بِالصّْفَا

وْلَمْخَازَنْ شَاهْدَة عْلَى لْغَزْوَة  السَّالْفَة

عَبْدْ لْمَالِكْ لًعْظِيمْ ، حَارَبْ فِيهَا وْ شَرّْفَا

سِبَاسْتْيَانْ الذْلِيلْ ، مْعََاهْ لْمَسْلُوخْ مَا كْفَا

وُعْسَاكًرْهُومْ لُوْغَادْ ، تْلاَحَتْ فَلْوَادْ جَايْفَا

قْبُورْ لْمَظْلُومْ شَاهْدَة ، عْلاَ لْمَعْرَكَة لْخَاطْفَة

شْهُودْ لْعَنْصْرَة بْلَكْمَالْ قْبُورْهُومْ بِيهَا مْتَحّْفَة

أنا لَقْصَرْ لَكْبيرْ بْرَاسي مَرْفُوعْ ماخْفَا

تَاريخي مْجيدْ وَعْريقْ سيرْتي مَاهيشْ تالْفَا

قالُو عَنِّي كْلامْ كْثيرْ مْنْقُوعْ فْعَلْقَمْ َوَجْميعْ النَّاسْ عارْفا

سْيُوفْ لْحُسَّادْ بِلْجْهَرْ ْديما عْلِيَّا واقْفَا

******************

يا قْصْري ، مَهْمَا لَبعَادْ خاذْني عَنّْكْ وُطُولْ ُلْجْفا

عْلَى فْطامكْ ماصْبرْتْ ارْيايي صبْحاتْ تالْفَة

بِهْواكْ آنا نْغَنِّي وْلِيكْ نَهْدي فَنٌِي وُقْصايْدي عْليكْ واقْفَة

 

المريني ادريس

 

القصر الكبير بتاريخ : 14 / 04 / 2011

لِيَّامْ الزِّينَة مْشَاتْ

لِيَّامْ الزِّينَة مْشَاتْ

***********

لِيَّامْ الزِّينَة مْشَاتْ

مُوحََالْ تْعُودْ مَنْ جْدِيدْ

وْجُوهْ لْخِيرْ، كْثِِِيرَة گَفَّاتْ

وُخْلَفْهَا الْخَزّْ وُ الصْدِيدْ

مَابْقَاشِي گَدْ مَافَاتْ

تْعُودْ لْحَانَة مْسِيدْ

خْلاَقْ النَّاسْ مْشَاتْ

رَاحَتْ مَنّْهُومْ بْعِيدْ

طَلْقَتْهُومْ بْ الثْلاَثْ

حَلْفَتْ مْعَاهُومْ مَاتْزِيدْ

يَاوِيحْ اللِّي لاَحْهَا فْتَاتْ

بَعْدْ نْ كَانْ لِيهَا  مْرِيدْ

دْْعَاوِي لْبْلاَ اتَّسْتَاجْبَاتْ

وُفَّا الْوَاعَدْ لِلْوْعِيدْ

النَّاسْ لِلدّمْ تْنْكْرَاتْ

لَرْحَامْ مَاتْلاَتْشِي تْفِيدْ

فِيهَا النِّيرَانْ گْدَاتْ

دَارُُوهَا حْْطَبْ وُوْگِيدْ

آشْ يْصَبَّرْ َخَاطْرِي ، مَنْ بَعْدْ عِينِي مَا رَاتْ

خْصَالْ لْفُسَّاقْ شَايْعَة ، بِينْ كْبَادْنَا ذَايْعَة ، خْاذُوهَا مَدْحْ وُنْشِيدْ

لاََ حَاكَمْ يَرْْدَعْ ، وَلاَمَخْزَنْْْ يَخْلَعْ ، وَلاَ فُقْهَا الفُتْيَاتْ

رْجَايَا فْ اللهْ لَكْرِيمْ ، هُوَّ اللِّي بْ خَلْقُو عْلِيمْ ، وَآمْرُو دِيمَا رْشِيدْ

لَمْرِينِي ادْرِيسْ يَاسَادَاتْ ، مُولْ ذَا النَّظْمْ وْلْبْيَاتْ ، يَرْجَا مَنْكُومْ دَعْوَاتْ

تَرْجَعْ لِيَّامْ زِينَة ، تْعُودْ قْلُوبْنَا حْنِينَة ، قْبْلْ يْفُوتْ لْفُوتْ ، وْمَايَبْقَى مَايْفِيدْ.

لِيَّامْ الزِّينَة مْشَاتْ بْ دْعَاوِيكُومْ ياسَادَاتْ

تَقْدَرْ تْعُودْ مِنْ جْدِيدْ

المريني ادريس

القصر الكبير بتاريخ : 22 / 08 / 2012

غْزيلْ الْحَرْفْ 3

غْزيلْ الْحَرْفْ 3

سُْولْني شِيطَاني كّّالِّي، مْنينْ تْكُون ْيَامَغْفُولْ ؟

جَاوَبْتُوكُّلْتْ ليهْ : أَنَا مِنْ شَعْبْ اللهْ الْكَسُولْ

سِيرْتِي مْرَايَة ،وُحْكَايْتِي آيًة ، مَاعَنْدَكْ مَا تْقُولْ

مَانْخَافْ مَانَرْجَفْ ، مَا نْتِيهْ مَاْنتْلَفْ ، وَيلْاَ نْطَقْتْ كْلاَمِي مَقْبُولْ

عَاوَدْ سُوَّلْني وْكٌّالْ : وَاشْ انْتَ مُحَامِي ؟ فْهَمْتي قَصْدي وَكْلاَميِ

ولاَّ حَافَظْ لَمْثُولُ ؟

جَاوْبْتوُ كٌّلْتْ لِيهْ : مَانِي ذَا وُلاَّ ذَا ، مََاعَنْدِي إحْسَاسْ وَلاَ كَبْدَة

مَانَعْرفْ حِيلَة وَلاَ حْلًولْ

هَاعَارْ اللهْ بِينِي وْبِينَك ْ ، لا انْتَ  مِنْ دِينِي وْلاَنَا مِنْ دَينَكْ

قِيلْنيَ عْليكْ مَانيِ مَهْبُولْ

أنا زْلاَفْتي خَاوْيَة ، وْطَيْفُورِي مَقْلُوبْ ، زَهْري مْعَوَّجْ ، وْأَمْري مَغْلُوبْ

سَارَحْ فْ أَرْضْ اللهْ كََنْجُول ْ

سَرِّي مَدْفُونْ ، فْغَارْ مَسْكُونْ ، سَاكْنو رُوْحَانِِي ، مَاهُو جَنّْ ، مَاهُو غُولْ

سَاكْنُو مَخْزَنْ ، مْرِيضْ مْعَفْنْ ، جَاثْمْ عْلاَ حَقِّي ، وَاكَلْ رَزْقيِ ، هُوَ الْفَاعِلْ

وَآنَا المَفْعُولْ

هَاعَارْ اللهْ بِينِي وْبِينَك ْ ، لا انْتَ  مِنْ دِينِي وْلاَنَا مِنْ دَينَكْ

قِيلْنيَ عْليكْ مَانيِ مَهْبُولْ

غِيبْ عْلِيَّا وْخَلِّينِي ، اللِّي فِيَّا يَكْفِينِي ، نْبُوسْ الْحَجْرَة ، نَشْعلْ الشَّمْعَة ،

نَرْوَي مْحَابْقِي بِالدَّمْعَة ، وَنْعِيشْ بَهْلُولْ

المريني ادريس

القصر الكبير بتاريخ : 06 / 05 / 2012

غْزيلْ الْحَرْفْ ( 2 )

غْزيلْ الْحَرْفْ ( 2 )

عْلىََ قَدّْْ مَّاطَالْ اللٍِيلْ ، لا بُدْ يطلعْ النْهَارْ

يْزُولْ اللُّبْسْ ، يَقََْلاَلْ الهََمْس ْ ، تَقْوَى لَبْصَارْ

يَرْحَلْ الطَّاغِي، يْمُوتْ الْبَاغيِ ، وََالفَرْعُونْ الجَبَّارْ

تَرْتَاحْ لَعْْبَادْ ، بْمُوتْ الجَلاَّدْ ، يْنُوضْ الرّْبيعْ ، تَخْضَارْ لَشْجَارْ

تْعُودْ الْبَسْمَة لْمُوحََا وْعَلاَّلْ ، وْلْسٌَاكْنْ لََجْبالْ ، وُلْكُلْ قَرْيَة َومدْشَرْ

الْمَعْلُولْ يَدَّاوَا، وًالشَّعْبْ يَتْخَاوَا ، كْبَارْ وَصْغَارْ

الْعَانِسْ تَتْزَوَّجْ ، وَالسُُّوقْ تَتْرَوَّجْ ، ليلْ وَنْهَار ْ

الأَمْن ْيْسُودْ ، وْلاَمَانْ يْعُودْ ، وَلْمَرَاكَبْ ، تْوَاصَلْ الِإبْحَارْ

حْلِيمَة وْكَلثُومْ ، وْلَحْريمْ تْهُومْ ، مَا تَخْشَا قُطَّاعْ ، وَلاَ َتْخافْ شَفَّارْ

وَانَا وانْتَ حُرَّاسْ ،عْلاَ عْراضْ النَّاسْ ، نْقُولُو لاَ لِلْمُنْكَرْ

عَرْضي هُوَ عَرْضَكْ ، اللِّي مًسْنيِ يْمُسَّك ْ ، جْمِيعْنَا ضِدْ الْعَارْ

المريني ادريس.

القصر الكبير بتاريخ : 07 / 05 / 2012

حَالْ يْنَسِّيكْ حَالْ

حَالْ يْنَسِّيكْ حَالْ

الْمَكْسِي مَا دَارِي بْ لْحَافِي
 وُالزَّاهِي يَضْحَكْ عاَلْ مَهْمُومْ
وَلْدْ الفَارْ مَا يْكُونْ غِي حَفَّارْ
 وُوُلْدْ الثَّعْلَبْ مِنْ صَغْرُو مَكَّارْ
وُلْدْ الذِّيبْ كَيْتْزَادْ غَدَّارْ
 اللَّهْ يَحْفَظْنَا وْيَحْفَظْكُومْ مَنْ بْنَادَْمْ لْحَگَّارْ
الْعِينْ لْخَايْنَة رْمَقْهَا دَوَّارْ
يْحَوَّسْ عَا لَعْيُُوبْ يْمِينْ وُيْسَارْ
حََاضِِي الشَّاذَّة وُلْفَاذَّة لِيلْ وُنْهَارْ
مَايْغْفَلْ مَايْجْفَلْ فْ تَلْقَاطْ لَخْبَارْ
يْوُصَّلْْ ذْ هَذَا لْهَاذَا مَاعَنْدُو كَاسَارْ
وُُيْلاَ تَّفْضَحْ تَلْقَاهْ سَبَّاقْ لْخَلْقْ لًعْذََارْ
تَبْدَالْ رْفَاگْتُو خِيرْ وَلَوْ بَرْبَعْ دِينَارْ
شَكْلُو عِيفَة ، رِيحْتُو جِيفَة ، عْطِيهْ بْ التِّيقَارْ
سِيرْ وْخَلِّيهْ ، لاَ تْوَالِيهْ ، مَاهُو مَعْشَارْ
سَمُّو فِيهْ حَايَلْ ، مَوْسُومْ بْ الزْبَايَلْ ، لاَ زِينْ لاَ وْقَارْ
واشْ تَرْجَا مَنْ لْخَايِبْ ، غِيرْ فَعْلْ لَشْرارْ
ضَحْكُو لِيكْ صْنِيعَة ، قَلْبُو مَلْيَانْ خْدِيعَة ، يْطْعَنْ فِيكْ فْ الظْهَرْ
المريني ادريس
القصر الكبير بتاريخ : 19 / 08 / 2012

سَرْ لْخَايِنْ

سَرْ لْخَايِنْ

سَرْ لْخَايِنْ ، فُوْجَاه ْبَايِنْ
وُجْهُو مْقََزْدَرْ
جَلْدُو مْبَنْدَرْ
يضْحَكْ ، يَسْمَعْ ، يْسَايِنْ
يْرَافْقَكْ ، يْوَانْسَكْ ، يْجَالْسَكْ
غِي يْسُلْ لْسَانَكْ ، وَآرَاكْ للْمْحَايَنْ
يْزِيدْ فُوقْ لِيفَكْ هَمْزَة ، يْوْصَّلْهَا فُوقْ مَطْراحُو خُبْزَة
وْلَتَّخْمَارْ ، مَايْسَايْنْ
فَرَّانُو زَانَدْ بْلاَحْطَبْ ، يَعْرَفْ يْزُوَّقْ وْيَكْذَبْ
مَلاََكْ تْگُولْ ، مَاشِي شِيطَانْ
فْ ضْرِيبْ لَمْثَالْ ، لاَ تْسَالْ وَاعَرْ ، فَنَّانْ
يْجِيبَكْ يْجِيبَكْ ، مَنْ حْجَرْ حْبِيبَكْ ، بْْسِحْرْ لْبَيَانْ
بْلِيْتُوفْ دْخََالُوعََامْقَة ، نِيْْتُو حُفْرََة غَارْقَة ، مَايْحُدْهَا إِنْسَانْ
مَنْ حْيالُو، يَبْلِيسْ لِيهْ سَلّْمْ سْوََارْتُو ، رَاحْ خْوَا السَّاحَة ، وْلَمْكَانْ
غَلْبُو بْ لْحُُجَّة وْلْبُرْهَانْ
بْ صْنَافْ التْبَوْحِيطْ ، عَمَّرْ حَانُوتْ ، وُبْلاَصْرُوفْ عْبَارُو مِيزَان ْ
دَاخَلْتْ عِْليكُومْ بْ اللهْ ، وَآشْ مْثَايْلُُو فِيهُومْ آمَانْ ؟؟

ادريس المريني

القصر الكبير بتاريخ :19 / 08 / 2012

شْكُونْ حْْرُوفُو وَلاَّدَة

شْكُونْ حْْرُوفُو وَلاَّدَة
فِيهَا لْمُتْعَة وْلِيفَادَة
فِيهَا حْكَايْمْ بِزْوَاهَگْ وُقْلاَدَة
تْفٍيَّقْ لْوُسْنَانْ ذَاكْ وْذَاكْ وْهَاذَا
تَطْرَشْ لْغَافِلْ ، تْنَبَّهْ الظَّالَمْ يَاسَادَة
غِيرْبْ لْحَرْف ، مَنْ فوَاهْ الرْجَالْ ، كِ جْرَاتْ لْعَادَة
شْكُونْ مُولْ لْحَرْفْ اللاَّذَعْ ، قَاضّْ لَمْضَاجَعْ ، هَجَّارْ لُوْسَادَة
شْكُونْ لْفَارِسْ فْ الرّْجَالْ ، بَكْلاَمْ سِيَّالْ ، مَنْ غِيرْ الزَّجَّالْ ،وَاخَذْ الرْيَادَة
شْكٌونْ يَنْطَقْ ، يَصْدَحْ بْ لْحَقّْ ، يُومْ تَتْكَمَّمْ لَفْوَاهْ ، وُتْعُودْ لْبُومَة صَايْلَة تَتْمَادَا
وَيْعُُودْ لَغْرَابْ حَاكَمْ عَالْ الطِّيرْ لْحُرّْ ، وُلْهَامَة خَايْفة ، تَمْشِي تَتْهَادَا
وُالسْبَعْ فََآجَامْتُو مَشْلُولْ عَالْ الصِّيدَََا ، زَادُو نَافَذْ ، قُوتْ عْيَالُوفْنَا ، وْتْقَاضَا
مُولْ لْحَرْفْ يَاسْيَادِي كْلاَمُو سْلاَحْ ، وُقْوَالُو رْمَاحْ ، صَمْتُو مَاهُو عْبَادَة
مُولْ لْْحََرْفْ رَادُو لْخَالَقْ حْكِيمْ ، ْمْخَاصَمْ مِيمْ ، مََاشَافْ مَارَا مَايْدْلِي بِشْهَادَة
مُولْ لْحَرْفْ عَنْدُو تَوْكِيلْ مَنْ ضْمِيرُو ، من لْمَحْگُورْ وْغِيرُو، مَنْ لْغَايْبَة عْلِيهْ السّْعَادَة
إِيْلا انْخْرَسْ مُولْ لْحََرْفْ ، مْشَا لْحَالْ ، مَايْفِيدْ نْواحْ عْلَى الرّْجَالْ ، بَعْدْ لَغْرَابْ
تْعُودْ مُوكَة حَاكْمَة وْبَلاَّرْجْ وْزِيرْ يَفْتِي ب ْلْقَرْفَادَة
المريني ادريس
القصر الكبير بتاريخ : 16 / 08 / 2012