غْزيلْ الْحَرْفْ 1

غْزيلْ الْحَرْفْ

 
بْلادي بْْلادْ التابَعْْ والمتْبُوعْْ

المفْعولْ بيهْ عَالْ الدْوامْ مجْرورْ

والفاعلْ مَعْزوز ْ وْمَََرْفًوعْ

بْلادي بْلادْ لِنْكِسَََارْ، بْْلادْ الحُكْرَة والْخُضُوعْ

بْلادْ ادْهنْْ السيرْ يْسيرْ وْجُولْ فْ الرُّبُوعْ

هْتْكْ ماتْريدْ فْ المًحْظُورْ وُلْمََمْْنُوعْ

بْلادي وَرْدَة ذَبْلانََة ، سَاعَة عَطْلانَة، بْطُونْ جَيْعانَة، وُبْنادََمْ مَفجُوعْ

بْلادي بْلادْ آسِّي وْسِّي ، كُلْهَا يْعَيَّطْ رَاسِيَ ، شِي دَافَعْ ، شِي مَدْفُوعْ

بْلادْ النَّافَعْ ، بْلادْ لَْمَعدُومْ وَلْمَقْطُوعْ

شيِ مْشَمْكَرْ ، شي فْلَكْلامْ يْخَسَّرْ ، حَرْفُو فَ السَّمْ مَنْقُوعْ

وَقْتَاشْ يْزُولْ الضِّيمْ ، وْتَنْقْشَعْ لَغيُومْ وْيَرْتاحْ الْقَلْبْ بينْ الضّْلُوعْ

وًقْتَاشْ تزْهَرْ بْلادَي ، وَيْصِيحْ المُُنادِي ، يَاقَصْرَاوي يَامَغْرِبيَ رَاسَكْ

الْيُومْ رَاهْ بالعَزّْ مَرْفُوعْ.

المريني ادريس

القصر الكبير بتاريخ : 04 / 05 /

2012

لِيكْ نْوَصِّي

لِيكْ نْوَصِّي

بَعْدْ شَابْ الرَّاسْ وَانْحْدَبْ الظْهَرْ، عَاوَدْتْ قْرَايْتيِ لَجْمِيعْ لَسْوَارْ
لْقِيتْ رَاحْتَي فْ التَّسْطَارْ وُالْقْرَايَة
وُبْدِيتْ نْرَاجَعْ لَحْسَابْ لِيلْ وُنْهَارْ
نْفَذْ صَبْرِي عْلَى كْلاَمْ النَّاسْ فِ قْفَايَا
وُضْحَاتْ جْفَانِي تْغُضْ عَنْهُومْ لَبْصَارْ
ضَاقْ صَدْرِي مِنْ حَرْ الْغْدَرْ وْلْوْشَايَة
وَانَا اللِّي طْوِيتْ عْمَرِْ لِيهُومْ شَكَّارْ
مَا كُنْتْ نْشَكْ فَصْدَقْهُومْ اَوْ نَتْحَرَّزْ ِلنْوَايَا
بَانْ الْمَكْنُونْ وُعْلَى رْسَامُو تْفَضْحَتْ لَسْرَارْ
هْجَرْتْ لَفْقِيهْ وُالسٌّلْطَانْ ، وْطَلَّقْتْ قَوْمْ الدْهَايَا
خْذِيتْ خْلِيلِي كْتَابْ يْبَدَّدْ ظْلاًمِي َيشْعَلْ لَنْوَارْ
يَصْقلْ عَقْلِي، يَجْليِ لَهْمُومْ ، يْنَقيِّ جْوَارْحِي وُ حْشَايَا
دَرْكُو لْعُزَّالْ شْنُو دَارُو ، أُوَّاشْ اللِّي صَارْ
رَسْلُو الرَّقٌَاصْ يَلْغِي جْفَايَا
جُرْحْ السِّيفْ يَنْذْمَلْ ، وُيْزُولْ لاَثَارْ
وْجُرْحْ اللّْسًان ْ ، يَبْقَى آيََة
نْوًصِّيكْ لاً ثِّيِقْ بْشَي بَشَرْ
لْسًانْهُومْ حْلُو، مْذَاقُو غًايَة
قَلْبُومْ كْحَلْ ، يَسْقِي لَمْرَارْ
سْمَعْ كْلاَمِي ، وْخُذْ لِيفَادَة ، هُوَّ مَنِّي لِيكْ وْصَايَا
كْلاَمْ لَمْجّْربْ ، كُلٌّو تَحْقِيقْ ، إِيْلاَ انْتَ نَاوِي بيهْ تَعْتْبَرْ
يْلاَ غَابْ عَقْلكْ ، شُوفْ سْوَايَا
يْكُونْ لِيكْ نْصِيحْ ، بْلاَ مَاتْفَكَّرْ
آخَرْ قَوْلِي لِيكْ دْعَايَا
نَطْلَب رَبِّي ، لَزْلاَيْلَكْ يَغْفَرْ
وْمُولْ لَكْلاَمْ اللِّي آنََيَا
يْنَجِّينِي مَنْ عْذَابْ لَقْبَرْ
وُيْسَامْحُونِي وَاِلِيدِيَّا
هَذَا مْنَايَا مَابْغِيتْ كْثَرْ
غَِي يْحْشَرْنِي مْعَ لآنْبِيًّا

المريني ادريس

القصر الكبير يتاريخ :27 / 05 / 2012

شْكُونْ اغْتَصَبْكْ ؟؟؟ !!!

شْكُونْ اغْتَصَبْكْ ؟؟؟ !!! 

 هذا مجرد رثاء لما آلت إليه مدينتي الحبيبة


شْكُونْ اغْتَصَبْكْ وْخَلاَّ فِِيكْ لِيمَارِة

كُنْتِي غْزَالَة فَعْيُونِي كُنْتِي جُوهَارَة

كُنْتْ نَقْرَا فِيِكْ كْتَابْ عُمْرِي يَالْمَسْرَارَة

هَجْلُوكْ يَتّْمُوكْ دَمّْرُوكْ رَجْعُوكْ الْعُديَانْ مَطْيَارَة

مَارَاعَاوْ ليكْ تَارِيخْ وَلاَ رَدْعَتْهُومْ حْزَارَة

هُولاَكُو فِيكْ تْفَنّْنْ بِجْيُوشُو الْجَرَّارَة

جِنْكِيزْ خَانْ ، قُدَّامُو، خَانْتُو الْعِبَارَة

الأُوبِّيدُومْ يَازِينَتْ الْعُمْرَانْ وْلَعْمَارَة

نَبْكِي بَالدَّمْ عْلاَ مَادَارُو فِيكْ الشَّفَّارَة

حْسَبْنَاهُومْ مْسَلْمِين لْقِينَا فْعَايَلْهُومْ فْعَالْ النْصَارَى

آلاَطِيفْ عْلاَ جَنْسْ يَبْلِيسْ مَنْهُومْ هْرَبْ وُتْوَارَا

وُكّْلْنَا عْلِيكُومْ اللهْ عْطِيوْنَا التِّيسَاعْ خْلاَصْ مَنْ الدْصَارَة

تَّغْنِيتُو حَتَّى تْقَوْرَنْتُو ، بَارََاكََا بِيْنُو شْوِيَّا دَ التْمَارََة

اللِّي سَبْقُوكُومْ آشْ قْضَاوْ ْ، يَاكْ جَلْهُومْ فِ الْمَقْبَرَة

خُوذُوا العِبْرَة مِنْ السَّابْقِينْ لاَ تْكُونُوشْ هَوَّارَة

لِيَّامْ لِيكْ وُعْلِيكْ، السْوايَعْ بَدَّالَة، وُالدُّنْيا غَرَّارَة

تَبْنِي وُتْعَلِّي تًمْشِي وُتْخَلِّي وَالْمُوتْ غَدَّارَة

آهْ لوُكَانْ تسْمَعْ ، قَلْبَكْ يَخْشَعْ ،وْعِينَكْ تَجْري بِدْمُوعْ لَمْرَارَة

تُوبْ لْمُولاَكْ يَاهُولاَكُو، طْحَنْتي لَعْبادْ ،خَلِّيتِي لَبْلاَدْ عِبَارَة

كَانَتْ لمْدِينة غْزَالًة وْفِعْيُونْ الْكُلْ جُوهَارَة

هَجْلُوهَا يَتْمُوهَا طَلْقُوعْلِيِهَا لَحْمارْ وُلْحْمَارَة






المريني ادريس

القصر الكبير بتاريخ : 29 / 05 / 2012

الجافي

الجافي

 
دُوَّرْ طَالْعَكْ لْجِيهْتيِ يالْعَاطِينِي بَلْقْفَا
لاَتْخمْمْ يَاعْشِيرْ ، يَمْكَنْ تَشْفَقْ لْحَاليِ
شوف فِيَّا بْعينْ الرْضَا، يازِينْ اللَّمْحَة وُالشُّوفَة
دَابَا لِيَّامْ تْصُدْنِي عْلِيكْ ، وْنَرْحَلْ فْحَاليِ
بَعْدْ وْلاَعْتيِ بِيك ْ، وُلْمْوَالْفَة
وَسْهِيري مْعاكْ إِيَّامْ وُلْيَاليِ
الْوَلْفْ صْعِيبْ ، وْلَفْرَاقْ سْمَاهْ غْيُومْ مَاتَصْفَا
وُالزْمَان ْ، يَفْرََزْ الرْخِيصْ مِنْ الْغَاليِ
الطِّيرْ الْحُرْ مَا يَنْسْجْنْ ، وْمِنْ طَبْعُو الصِّدْقْ وْلُُوْفَا
وُلْبٌومَة غَدَّارَة ، مَا تَنْشافْ غِي فْحَُلْكْ اللّْيَاليِ
شُوفْ فِيَّا وْخَبَّرْنِي عْلاشْ الْجْفَا
وُعْلاشْ تْحَرْك ْ لَجْمَارْ فْدْخَاليِ
شْعَلْتيِ نِيرَانْ حَلْفَت لاَ تَنْطْفا َ
وَآنَا الليِّ مْتِيَّمْ بَهْوَاكْ يًاغْزَاليِ
سْقِيمْ بِغْرَامَكْ نَرْقَبْ الشّْفاَ
وجْمِيعْ الْعُوَّادْ ترْثِيِ لْحَالِي
وُقْتَاشْ لَغْيُومْ تَنْقْشَعْ وَيْعُمْ الصْفَا
تْسَامْحِينيِ مَنْ قَلْبَكْ وْب اللِّي فَاتْ مَا تْبَالِي
نََتْرَجَّا قَوْلَكْ، قَلْبِي عْلِيكْ صْفَحْ ،وُعْفَا
وُاللِّي فََاتْ مَاتْ ، رْجَعْ ثُراتْ ، قْدِيمْ ،وْبَالِي
لاَ تْخَلِّيشْ لْعْدَا فِينَا تَتْشَفَّا
تَتْغَزَّا فِيَّ وْفِيكْ مَنْ لَعْلاَليِ
غِي دُورْ بْطَالْعََكْ لْجِيهْتي ، سَاعْتَي بْلاَ بِيكْ ، ضَْحاتْ وَاقْفَة
وُالسَّاعِة يْلاَ وُقْفَاتْ ، رَايْتِي تَنْتْكَسْ ، وُعْلاَمِي مَايْشَاليِ
غِي دُوَّرْ طَالْعَكْ لْجِيهْتيِ يالْعَاطِينِي بَلْقْفَا
لاَتْخمْمْ يَاعْشِيرْ ، يَمْكَنْ تْحَنْ وْتَشْفَقْ لْحَاليِ.

المريني ادريس


القصر الكبير بتاريخ : 25/ 05 / 2012

حالة شروذ

حالة شروذ 
 

ساعاتْ كِي نَتْخَلوَا نَتْفَكَّرْ صُغْري

وايَّامي اللِّي راحتْ ومْشاتْ عَا لْبَكْري

هْْنا كُنْتْ نَلْعَبْ وَهْنا كُنْتْ نَجْري

هْنا كُنْتْ نَرْتاحْ وهْنا كُنْتْ نْباتْ مِنْ سُهْدي وْسَهْري

منْ هََاذي كُنْتْ نَقْلَقْ وْمنْ هاذي يَنْفذْ َصبْري

ْومنْ هاذي كُنْتْ نْخافْ وَْمَنْ عِيني الدَّمْعاتْ تَجْري

آهْ يا ليَّامْ ماظَنِّيتِكْش تْكًفِّي وَتْغُوري

ْوتْخَلِّيني فبْكَايًا ندمان عْلىَ اللٌِي فَاتْ مِنْ عُمْري.

المريني ادريس


ا لقصر الكبير بتاريخ : 03 / 02 / 2012

عْلاَ لْسَانَكْ يَامَلْسُوعْ

عْلاَ لْسَانَكْ يَامَلْسُوعْ ، رَتَّبْتْ كْلاَمِي وْسَتَّفْتُو
هُوَّ عْلِيكْ نْيَابَة ، إِيْلاَ رْضِيتْ بِيهْ وُقْبَلْتُو

***********************

طَبْعَكْ حْفْظْتُو
لَعْبَكْ عْرَفْتُو
فْرَاقَكْ وَالَفْتُو
كْلاَمَكْ صَرْفْتُو
لْقِيتْ نَصُّو كْذُوبْ، وٌلْبَاقِي تْوَاشِي
كَنْتْ غَالَطْ فِيكْ ،كُنْتْ نْحَسْبَكْ مَعْدَنْ نْفِيسْ وْغالي
بَعْدْ لْمْرَافْقَة وُْلْعَشْرَة، لْقِِيتَكْ مَا تَسْوَاشِي
عَرّْجْتْ عْلاَ الطْرِيقْ اللِّي لاَقَاتْنِي بِيكْ، وُرْجَعْتْ فْحَالِي
فْعَقْلِي قُلْتْ نْسَامْحَكْ ،مَهْمَا وْقَعْ، مَانْحَاسْبَكْشيِ
قَلْبيِ مَاطَاوَعْنِيشْ ، مَارْثَاشْ لْحَالِي
ذَكَّرْتُو بِخْصََالََكْ ، قَالِّي مَايْحْتَاجْشِي
قُلْتْ لِيهْ شُوفْ وْكَانْ ، رَاهْ عْزِيزْ وْغَالِي
قَال لِيَّا فَاتْ لْفُوتْ خَايَفْ مِنْ حَرّْ جَرْحُو نْمُوتْ ، وآنا مانسامحشي
لُوكَانْ غِي جُرْح السِّيفْ ،مَانَهْتًمْ مَانْبَالِي
وْجَرْح اللّْسَانْ كَيْرْسَخْ ، وْقَالُو، مَايْبْرَاشِِي
اللّْسَانْ تُرْجْمَانْ لْقَلْبْ ، يْخَرّْجْ مَا فْ لَدْخَالِي
سَعْدَاتْ اللِّي لْجَمْ لْسَانُو، وفَعْرَاضْ الْغِيرْ مَانْهَاشِّي
سًبْحَانْ الْحَيْ الْوَاجِدْ ، رْقِيبْ عْبَادُو فْلَعْلاَليِ
يْجَاوَزْ عَنَّا فِيمَا مْضَا ، يَغْفَرْ وْمَايْعَذْبْشِي
خُوذْ نْظًامِي بِلْجَدّْ ، وَحْفَظْ مَنُّو قْوَالِي
الصْلاَةْ عْلاَ سِيدْ لَبْرَارْ، تْنَفْعَك مَاضُرَّكْشِي
وْتَكْرَارْهَا فْكُلّْ لُوْقَاتْ ، تَْنُوَّرْ لِيكْ اللّْيَالِي
وَخْتَمْهَا بِالتُّوبَة ،وْلَخْطِيَّة مَاتَتْعَادْشِي.

المريني ادريس

القصر الكبير بتاريخ : 31 / 05 / 2012

الرُُّجْلََة حَدْهَا ََمََوَازينْ

الرُُّجْلََة حَدْهَا ََمََوَازينْ

الرُُّجْلََة حَدْهَا ََمََوَازينْ، واللِّي قالْشي، يْوَرِّينا حنّّْةْ اليدِّينْ
فْضَحْتُو لفْقِيهْ ،وْمَيّْكْتُو عْلى السْفيهْ وْمُولايْ الزِّينْ
مُولْ الرَّمْلَة ولْكَارْيانْ، الشَّعْبْ جايَعْ عَرْيانْ، غارقْ تًالْوَذْنينْ
هَََآلضُّوْ، هالْمَا ، هاصْبيطَارْ النَّقْمَََة ،هَا الشُّبَّانْ عَاطْلينْ
شي يْتْوَظَّفْ بلْوَاسِيطَََة، شي بْلْفاسْ والْبَرْوِيطََة، ضَابْرَاهْ ،هَاذِي سْنينْ
كِيفْ بَنْكيرَانْ كِي عَبَّاسْ، بْجُوجْكُومْ فْرَعْتُولِينََا الرَّاسْ ،عْيينَا صَابْرينْ
نْكٌّولْ لِيكُومْ حَاجََة ، طلْقُونَا لّْفْرَاجَة ْ،وْعْطِيوْنَا التِّيسَاعْ كَامْلِينْ
سيدْنََا وَحْدُو يَكْفينَا، رَاضْيينْ بْحْكَامُو عْلينَا ، دٍيمَا رْحيمْ وُحْنِينْ

المريني ادريس

القصر الكبير بتاريخ : 30 / 03 / 2012