أنا لَقْصَرْ لَكْبيرْ

أنا لَقْصَرْ لَكْبيرْ

أَنَا اللِّي كُنْتْ مَشْهُورَة فَزْمَانِي بْلَغْرَاسِي

أَنَا اللِّي كُنْتْ عَايْلاَ  لَهْلِي وْنَاسِيِ

أَنَا اللِّي مَاكَانْ حَدّْ فِيَّا يْقَاسِي

أَنَا اللِّي كُنْت لِلْغْرِيِبْ  مِضْيَافَة ، وْلِلْمَضْيُومْ ، نْصَبَّرْ وُنْوَاسيِ

وَاشْ عْرَفْتُونِي شْكُونْ آَنَا ؟ وُلاَّ غِي كَنْصَدَّعْ رَاسِي ؟

أَنَا بْلاَدْ الأَوْلِيَّا ، مَنْبَعْ لَمْجَاذِيبْ الصَّالْحِينْ ، وْلَعْمَارَة مْتَحّْفَة

فِيَّا الدَّرْقَاوِي وُلْعِيسَاوِي ، لْهَدَّاوِي وُلْگْنَاوِي ، فِيَّا مَنْ كُلّْ طَايْفَة

نَذْكَرْ عْلِي وُعْلِي ، سِيدِي سْلِيمَانْ وُلْفََاضْلِي ، وْلاَلَّة عَيشَة لْعَارْفَة

عَِايْشَة الثَّانْيَة مَاخْفَاتْ ، بَجْوارْ يَعْقُوبْ لَعْتِيدْ ، نْخَايْلُو مَازَالْ وَاقَفَة

وُوُمّْ عَسْكَرْ الشّْجِيعْ ، وْسِيدِي احْمَدْ الضّْلِيعْ ، هُوَّ رَمْزلْمْضَايْفَة

سَيِدِي لََخْطِيبْ مَايْغِيبْ ، ذَكْرُو كَايِنُّو طْبِيبْ ، مَقْصَدْ لَعْدُو وْلَحْبِيبْ ، بَعْدْ الله للِشّْفَا

الْهَزْمِيرِي ذَاكْ الزّْهِيدْ ُ ، اللاَّنْجْرِيِ وْمَنْصُورْ ، رْمُوسْهُومْ وَآخَّا مْطَرّْفَة

أنا لَقْصَرْ لَكْبيرْ بْرَاسي مَرْفُوعْ ماخْفَا

تَاريخي مْجيدْ ،عْريقْ سيرْتي مَاهيشْ تالْفَا

وْلادي فُرْسانْ حرار مَنّْهُومْ لَعْدا خايْفَا

عاناو الظُّلْمْ ولْقْهَرْ وُصْْنَافْ الحيفْ وُلَجْفَا

قالو عنهوم غي وباش السرقة عندهوم حرفا

واللي قالها مشا وراح صد وعطانا بلقفا

جحد فضايلوم من زمان لموسومة بالصفا

المخازن مازال  شاهدة على المعركة السالفا

عبد المالك لعظيم نزل بجنودو وشرفا

سباستيان الذليل معاه المسلوخ ما كفا

بعساكرهوم لوغاد تلاحت فلواد جايفا

روضة المظلوم شاهدة على المعركة الخاطفا

رجال العنصرة بالكمال قبورهوم فيها متحفا

أنا لَقْصَرْ لَكْبيرْ بْرَاسي مَرْفُوعْ ماخْفَا

تَاريخي مْجيدْ وَعْريقْ سيرْتي مَاهيشْ تالْفَا

قالُو عَنِّي كْلامْ كْثيرْ مْنْقُوعْ فْعَلْقَمْ َوَجْميعْ النَّاسْ عارْفا

سْيُوفْ لْحُسَّادْ بِلْجْهَرْ ْديما عْلِيَّا واقْفَا

يا قْصْري ، مَهْمَا لَبعَادْ خاذْني عَنّْكْ وُطُولْ ُلْجْفا

عْلَى فْطامكْ ماصْبرْتْ ارْيايي صبْحاتْ تالْفا

بِهْواكْ آنا نْغَنِّي وْلِيكْ نَهْدي فَنٌِي وُقْصايْدي عْليكْ واقْفَا

لُغَتُنَا الْمَرْحُومَة

لُغَتُنَا الْمَرْحُومَة


قْريتْْ لْيُومْ لْشِي مْضَالَعْ وْهُومَا فلْعْقَلْ دْرَارَي.

قْصَايْدْ لاَ طِيبَة تَنَسَّمْ لا حْلاوَة فيهًا لامْذَاق ْ

غَيرْ المَقْت والبْسَالَة فَسْطُورْها تَجْري وُتْجَارَي

الشْمَاتَة وْْلَحْسدْ فْطَيْ حْرُوفْهَا مْغَلْفينْ بِالنْفَاقْ

وْتَكْيالْ المْديح ْ لْخَطَّاطْها بِالقُنْْطَارِي

لاَ ترْتيبْ لِنْظَامْها وُلْمْعَانيِ بْلاَ تَنْسًاقْْ

غِي خَوَّرْ وْكُوَّرْ وَاعْطي للْقَارَي

لاَ نَحْوْ لاَ إِعْرابْ لاَ بْلاَغَة بْلُغْتْ لْعُشَّاقْ

آرْوَاحْ آصَاحْبي تشوف بالضَّادْ آشْ طَارِي

ريحة الشياط عطات

ريحة لحريقة بالشياط عطات                 
والطموع عمات لينا عينينا ايام العز والتفطاخ مشات
ودارالزمان وليام عليناكثر علينا الصياح ولغوات
بنار بعضياتنا تشوينا
ولينا كي لعريفات كون عي فصباغتا بقينا
دعاوي البلا فينا خرجات
آش يرد قضاها علينا
ياك تعاهدنا بلا توراث
وبلا تحماض لعجينة
ذقتو الكراسا ولعاقات
ونسيتو باش تواعدنا
شركنا الطعام وصناف الحلوات
والناس جيعانة تحنزز فينا
المرجعية ماتلات نفعات
الناس كولها عاقت بينا

القصر الكبير : 17 / 11 / 2011

رَايًسْ لَبْلاَدْ فِينْ غْبَرْتِي؟

رَايًسْ لَبْلاَدْ فِينْ غْبَرْتِي؟

رَايًسْ لَحْكَامْ فِينْ غْبَرْتِي؟

فِينْ مْشِيتِي تْخَبَّعْتيِ؟

وآشْمَنْ غَارْ فِيهْ قْرَمْتِي ؟

فين الْوُعُودْ اللِّي وْعَدْتيِ ؟

وْلِكْلاَمْ الْمَعْسُولْ اللِّي بِيهْ خْطَبْتيِ ؟

كْلاَمَكْ قْبَلْ حْكَامْكْ ، كَانْ مَقْبُولْ

عْلِيهْ السَّرْ، يْنُوَّرْ لَعْقُولْ

كْلاَمَكْ بَعْدْ ، حْكَامَكْ بْنِيِتيهْ لِلْمَجْهُولْ

حَرْفْتِيهْ ، بَدَّلْتِيهْ ،  فَصَّلْتِيهْ عْلَى مْقَاسَكْ ، فَسَّرْتِيهْ كِي بْغِيتِي

سِيدِي الرَّايْسْ ، وْلِيدَاتْنَا مَازَالْ عَاطْلَينْ ، وُفْ كُلْ قَنْتْ مَعْتَاصْمِينْ ، وُنْتَ وْحُكُومْتَكْ مَتْماطْلِينْ ، ولاَ حَدْ فِيهْ شُفْتِي

سِيدي الرَّايْسْ ، مَِوَازِينْ وُزْنَاتْ لَقْوَالْ ، دْيَالْ الْيُومْ ، وُدْهَاذِي شْحَالْ ، وْبَانْ تْمَرْ غَرْسَكْ اللِّي زْرَعْتِي  

سِيدِي الرَّايْسْ ، مَوَازِينْ تْسَالاَتْ ، جَمْعَاتْ حَبْ وُتْبَنْ ، قَدْمَتْ فَنْ وَعْفَنْ ، حْضَرْهَا لُوْزِيرْ بَمْرَاتُو ، وُلْفَقِيرْ بَعْيَالاَتُو ، شافْتُو امِّي ، وُحَتَّى خْتِي

رَايَسْ لََحْكَامْ آشْ سْتَافْدْنَا ؟ وآشْ جْنِينَا مَنْ ٱلْهَزَّة وُالرَّكْزَة ؟ وَآشْ اسْتَنْتْجْتِي ؟

خُسْرَانْ مَالْ الشَّعْب ،  فَ الضَّحْكْ وُاللَّعْبْ ، لْعَاطْلِينْ بِلْأُولُفَاتْ ، قَلْةْ لَعْنَايَة فَصْبِيطَارَاتْ ، الِّلي وَالْدَة فْ الطَّاكْسِي ، وُاللِّي وَالْدَة عَالْ الدَّصْ ، وَالِّلي مْشَمْكَرْ عَالْ الْدْوَامْ ، وُالِّلي طَارْلُو الْفَرْخْ بَ التَّخْمَامْ ، وُنْتَ نَشْوَانْ مَادْرِيتِي ،

رَايِسْ لَحْكَامْ ، رَاجَعْ سْوَارَكْ ، السَّتَّة فَايْتَة ، عْمَرْهَا قْصيرْ ، وُعْقَابْهَا خَطِيرْ ، دِيرْ عْلاَشْ تَرْجَعْ إيْلاَ بْغِيتِي

كُونْ قَدْ فُمَّكْ قَدْ ذْرَاعَكْ ، التَّاريخْ شْهُودْ ، لَحْسَابْ صَابُونْ ، وُالمَضْرُورْ مَايَنْسى ، إِيْلاَ انْتَ انْسِيتِي

شكون هو مسؤولنا

شكون هو مسؤولنا
لما راسْ المسؤولْ يصْبحْ نْقي ْو مْنُوٌرْ
ومايبقاشْ ف الضٌوسياتْ يْخَربقْ ويْزُوَّرْ
وينهج اسلوب التعامل بميزان واحد
ويتْجنبْ سياسة راسي ياراسي كُوَّرْ وَعْطي لَعْور ْ
لمَّا المْسؤولْ يْحَسْ بيَّا وْبيّكْ وبْهاذاكْ وهاذيكْ
وْبْلوخْرا وْلاخورْ وْمايبْقاشْ يْنقي ويخْتارْ
لمَّا المسؤولْ يْفيقْ يْخاويكْ ويْخَاويني
ويساوي بينْ المسْلمْ خُوهْ كانْ ولاٌ كافرْ
لمَّا المسؤولْ يْسُوسْ رْعيٌْتُو بْعَدالة
من الظَّالمْ يقْتصْ وللمظْلومْ ينْتاصرْ
لمَّا المسْؤولْ يْساوي فْتوزيعْ لَحْقوقْ
تْزول لْعْقوقْ والكل يَفرحْ ويفْتاخرْ
الكلْ يهْتفْ ويْقُولْ عاشْ مسْؤولْنا عاشْ
مسؤولْنا لْيوم ْبْغا العدالة بينْ رْعيّْتو تنْتاشرْ
عاشْ مسؤولْنا عاشْ نْسمْعُوها لَمْوَاتْ فْلَمْقابَرْ.

القصر الكبير بتاريخ : 14 / 09 / 2011
إدريس المريني

شكون هو حولي العيد

شكون هو حولي العيد

جَا الصِيفْ 
 وْجَابْ مْعَاهْ رَمْضَانْ ضِيفْ 
 عْطِيناهْ الصْوابْ ، حَلِّينَا لِيهْ لْبَابْ مْنْ بْعِيدْ
قَلْنَا لِيهْ ، مَرْحْبابِيكْ ، تْفَضَّلْ زِيدْ
الصَّايَارْ فِيهْ مْضَوْبَلْ 
 بْحَالْ لآجَرْ، وْنْهَارُو طْوِيلْ مْدِيدْ
دُوَّزْنَاهْ بِسَتَّة وْسِتِّينْ كْشِيفَة 
 خَرَْجْنَاها مْعَاهْ طْرِيفَة ، حَتَّا قَرَّبْ الْعِيدْ
لْمادَامْ بَاغْيَة لْحَوْلِي
 الثّْلآجَة ، الصَالُونْ ، وْكُولْشِي جْدِيدْ !!
وَاشْ آنَا مْهَنَْدْ وَلآ حْدِيدْ
النَّاسْ تَتْقَدَْمْ لْفُوقْ وُتْزِيدْ
وَآنَا خَارْجَة عْلِيَّا 
 بَنْتْ بَّا سْعِيدْ
الْقِيلْ وَلْقَالْ بِلْسَانْهَا 
هَارْدَاهْ هْرِيدْ
هَذَا حَالْهَا 
 تْقَيّْلْ عِي فْ اللِّي مَايْغْنِي مَايْفِيدْ
إِيْلآ نَقْنَقْت قُدَّامْهَا 
 كَتَنْشَرْنِي، فْحَالْ الْقَدِّيدْ
آشْ ظْهَرْ لِيكُومْ نْبَعْبَعْ 
 وَنْقُولْ، آنَا هُوَّ لْحَوْلِي 
 نْهَارْ الْعِيدْ ؟؟؟

الحيا والحشمة

الحشْمة طارتْ وْعلاتْ

وَقْفاتْ جْنيحاتْها، وْفرْفْراتْ

الحْيا ضاع ْ مابينْ الخُو وْلخْواتاتْ

ْومابين البوُ وْلمَّاتْ

مابقات عيشة تفرح من زمان هذا فاتْ

العفة عفُّوها ،لاحوها، لا تْسوْلْ فين مْشاتْ

الستْرة عادتْ عيب وضْحاتْ منْ الثراتْ

ْزمانْ واشْ من زْمان هاذا ، بْناتْْ الآصلْ فيه بايْراتْ

بْناتْ الشِيشة والقْصايرْ، مفْضُوحينْ السّْرايرْ فيه مَطْلوباتْ

سَعْداتَكْ يا المَجْذوبْ لَحْْتي كْلامكْ وْسَرَِيتِي تْقَلَْبْ وينْ تْباتْ

لُوْ كانْ عُمْرَكْ طْوالْ ،وْهُوَّ مُحالْ وآشْ تْقولْ فْهاذْ الْخْصْلاتْ

كْلامْكْ عادْ مَفْهًومْ ، مابْقَاشْ مَبْهُومْ ، وْلْغَامْضَة فيهْ تْوَرّْقاتْ

يا عَابْدْ للرَّحْمانْ يامَجذُوبْ زْمَانُو واشْ مازَالْ هاذْ القُومْ يَحْنانُو أوْْ اللِّي فاتْ فاتْ

يارَبْ لَبْلاَدْ وْلعْبَادْ ، الطَّالَعْ وْلْهَوَّادْ السْفِينَة بْداتْ تَجْنَحْ دَلِّي لينَا حبْلْ النَّجاةْ

ادريس المريني : القصر الكبير في 6 / 10 / 2011